1Ne midlaus si Jacob te kedhipanew zin, ne nekeuma sikandin diyà te tanà te menge etew he zapit te edsilaan.
2Ne zuen neehè din diyà te unayan he sevaha he kalut, ne ziyà te uvey kayi zuen tetelu he leyuzan he kerehidu, su ziyà egkuwa is menge etew zutun te wahig he ibpeinum dan te menge kerehidu zan. Heini he kalut ne midtengevan te zekelà he vatu.
3Edteǥan te menge bekidu te kerehidu he egkevurunburun is langun he menge kerehidu zan ne human dan id-awà haazà is batu he intangeb. Emun egkepasad dan te kebpeinum is menge kerehidu zan, ne idlikù dan haazà is batu.
4Ne mid-insaan ni Jacob haazà is menge bekidu te kerehidu te, “Geli, hendei kew ebpuun?” Midtavak sikandan te, “Tig-Haran key.”
5Ne mid-insè en maan si Jacob te, “Egkekilala niw ve si Laban he apù ni Nahor?” Midtavak dan te, “Uya, egkekilala zey.”
6Ne mid-insaan en maan ni Jacob te, “Egkemenumenu en sikandin?” Midtavak dan te, “Meupiya zed man. Ahaa nu, heeyan ded is anak din he si Raquel is ebpelingguma duma te menge kerehidu zin.”
7Ne migkeǥiyan en maan ni Jacob te, “Metikang pa is andew, ne kenè pa uras he edtudilen is menge kerehidu, deyzey vuwa ke ibpeinum niw sikandan, ne ipeuman niw pa ipepenabtab.”
8Midtavak sikandan te, “Kenà egkehimu emun kenè dey pa egkevurunburun is menge kerehidu zey. Emun kayi en is langun he kerehidu ne edlilizen dey haazà is intangeb he vatu su wey mekeinum sikandan.”
9Kemulu pa ebpekibitiyara si Jacob kandan dutun kebpekeuma ni Raquel he edtundan te menge kerehidu te amey zin, su sikandin is ed-elima kayi.
10Ne hein naahà ni Jacob si Raquel, is anak te anggam din he si Laban he edtundan te menge kerehidu, midhendutun sikandin te kalut, ne in-awè din is batu he intangeb dutun, ne impemeinum din is menge kerehidu te anggam din he si Laban.
11Nepasad haazà, ne midhezekan din si Raquel, ne nekesineǥew sikandin su nehilelaut.
12Migkeǥiyan din si Raquel te, “Anak a ni Rebeka, umbe enaken a te amey nu.” Mibpelelaǥuy si Raquel is ed-ulì ne midtudtulan din is amey zin.
13Hein nezineg ni Laban he zutun si Jacob is enaken din he anak te etevey zin he si Raquel, migègaanan din sinuǥunga. Migkepkepan din ne midhezekan din ne miduma zin diyà te valey zan. Ne ipenudtul ni Jacob ki Laban is langun he nengeulaula.
14Ne migkeǥiyan sikandin ni Laban te, “Tutuu iyan he mesipeg ku sikew.”
15Ne hein senge vulan en is ked-ubpà ni Jacob diyà te ki Laban, migkeǥiyan ni Laban sikandin te, “Kenà meupiya he edterebahu ka kayi te kedì he wazè nu suhul minsan pa te enaken ku sikew. Keǥiyi a kenikew ke hengkey is egkesuatan nu he idsuhul ku kenikew?”
16Duen dezuwa he anak ni Laban he raǥa. Iyan ngazan te kakey si Lea ne si Raquel is hazi.
17Meupiya he ed-ahaan is mata ni Lea, piru edhuna he mekempet wey mezagwey he ed-ahaan is dagwey ni Raquel.
18Tenged te egkesuatan ni Jacob si Raquel, migkeǥiyan din si Laban te, “Edterebahu a kayi te kenikew seled te pitu he tuig emun ibpeesawa nu kedì si Raquel.”
19Migkaǥi si Laban te, “Deyzey pa ke iyan ke zà ebpekeesawa kandin kenà te zuma he maama. Kayi ke zà ubpà.”
20Ne zutun, impepeniwakà ni Laban si Jacob taman te pitu he tuig wey zin meesawa si Raquel. Tenged te utew zin nesuati si Raquel henduen te pira zà he andew ziyà te kandin haazà is pitu he tuig.
21Hein netuman en haazà is pitu he tuig, migkeǥiyan ni Jacob si Laban te, “Nepasad-en is kebpeniwakè ku kenikew, iveǥey nu en kediey si Raquel su ebpehulizè key en.”
22Mid-uyun dutun si Laban, umbe midtukud sikandin te keemuran ne mid-imbita zin is langun he menge meǥinged dutun.
23Piru hein mezukilem en, iyan miduma ni Laban si Lea ziyà ki Jacob, he si Raquel man pezem. Ne mibpehulizà si Jacob wey si Lea.
24(Ne zaan he imbeǥey ni Laban si Zilpa is suluǥuen din he vahi ziyà te ki Lea wey mehimu he suluǥuen din.)
25Hein nepawà, netuenan ni Jacob he si Lea ves is hulid din. Ne zutun mibeyaan din si Laban he egkaǥi te, “Maan is mid-ulaula nu heini kediey? Mibpeniwakà a kenikew para meesawa ku si Raquel. Maan is mid-ekalan a kenikew?”
26Ne midtavak si Laban te, “Kenà heeyan betasan kayi te kenami he lugar is iyan ibpehuna ibpeesawa is hazi kenà is kakey.
27Teǥazi nu zèpa he mepasad heini is pitu he andew he keemuran te eseweey niw ki Lea, su ibpeesawa ku human kenikew si Raquel, emun ebpekeuman ka ebpekepenilbi kedì te pitu pa maan he tuig.”
28Ne mid-uyun dutun si Jacob te migkaǥi ni Laban. Hein nepasad haazà is sengesimana he keemuran te eseweey ni Lea, impeesawa zaan ni Laban kandin si Raquel.
29(Imbeǥey zaan ni Laban si Bilha is suluǥuen din he vahi ziyà te ki Raquel su wey mehimu he suluǥuen din.)
30Ne mibpekidhulid si Jacob ki Raquel. Utew minahal ni Jacob si Raquel kenà si Lea. Ne mid-uman en maan si Jacob mebpeniwakà diyà te ki Laban te pitu pa maan he tuig.
31Naahà te Nengazen he kenà mahal ni Jacob si Lea, umbe mibpengelinteuwan din he mekaanak si Lea, piru si Raquel ne kenà.
32Mibmeǥingey si Lea ne mid-anak te maama ne migngezanan din ki Reuben, su ke sikandin te, “Naahà te Nengazen is merasey he egkeulaula ku, guntaan siguradu he ebmahalen ad human te esawa ku.”
33Ne mid-uman sikandin mebmeǥingey, ne mid-anak en maan sikandin te maama. Migkaǥi sikandin te, “Mid-umanan a veǥayi te Nengazen te sevaha he anak he maama su nezineg din he wazà a mahala te esawa ku.” Umbe migngezanan din haazà is batà te Simeon.
34Ne mibmeǥingey en maan si Lea, ne mid-anak sikandin te sevaha pa maan he maama. Migkaǥi sikandin te, “Human ad buwa ebmahala te esawa ku su tetelu en is anak dey he maama.” Umbe migngezanan din haazà is batà ki Levi.
35Mibmeǥingey med-uman si Lea ne mid-anak sikandin te sevaha pa he maama. Migkaǥi sikandin te, “Edeliǥen ku is Nengazen.” Umbe migngezanan din haazà is batà te Juda. Puun dutun, wazè en sikandin med-anak.
