Bumpaida 8

1

2

3

4

6

7

8

9

11

12

13

14

15

16

17

18

19

21

22

24

25

26

28

29

30

32

35

37

39

40

41

42

45

46

47

48

49

50

¹Tane God Noa ita pue dobinoa do pue gamolala me do waa bedewe waimoia insamone baiwa lanunu dewasano tawo osowe wisene esa dewasano aisidene iene alen.

²Ita do me esa tawo bedewe naimedi wisedia tane do unu debama uboe wadie nosedia intawa enabodamon.

³Tane abaia aisidene iene aleidie ita walama 150 wadedio esa aisidedie.

⁴Ita uaboa 7 bedewe walama 17 wadedio waa wadi Ararat osowe ependoden.

⁵Tane esa aisidene iene aleidie uaboa 10 ualeidio wadi iu sabamontoiena.

⁶Ita walama 40 dialeno aupe Noa waa nagawa imaasano winedia wadenaubene nene wadene itunieno alen. Tane nene galobu sa nosene alene leidie mai leulepe wisepona ipawa esa mai aisidepe iape alepona.

⁸Tauma me sala dauwa ewepie atenlepia baiwa me nene bunebune itunieno alen.

⁹Tane nene sa nosene alena mai wanwan bola da donsapona esa uduuduleno baiwa leulene wisen. Ita Noa nene sa wadene leusane ain.

¹⁰Me wandio walama 7 dialeno osowe nene bunebune wadene itunieno alen.

¹¹Tane rawileidio nene bunebune ia olib asiwa wasiipa euwaida apusene wiseno Noa ewene atenlen tauma esa aisidene iene alen.

¹²Tane walama 7 da dialeno me nene bunebune osowe wanaubeno alen. Ita nene sa mai leulepe mampe wisepona, dia.

¹³Tauma Noa enawa 601 waden. Ita ena sa bedewe uaboa dea bumpe esa aisidene iene alene dialen. Ita me waa iwa wadenaubene sala makolena ewen.

¹⁴Tane uaboa natawa bedewe walama 27 wadedio esa uduudu makolene diaidalen.

¹⁵Ema aupe God Noa diene wanase,

¹⁶“E manainaa nata ita obanaa manamanaipu do waa ene nolena.

¹⁷Tane nitu uduudu inawaa e do wainilana, nene, pue debamau ita do pue kerakera tetelala uduudu otaaubamoe do nolena dogo osowe muba otootontopue uarantopu tawo osowe.”

¹⁸Mape Noa manainapa nata ita obampa manamanainapu do waa bedewe waimoia ene nomoiena.

¹⁹Ita pue uduudu nene ita pue isiwa tawo osowe lalala waa ene mubaawomubaawo nomoiena.

²⁰Tane Noa Iawe God mampe pue pulolepie supia watawa dewasan. Ita me pue ita nene uduudupau eubu otene wisene wata osowe teamone sumon.

²¹Ita Iawe God pulo sa idia bonawa euda etene nuawa bedewe insene wanase, “Ne tauma ita ando tawo mai matangelasapa ipawa apana dewau baiwa. Mo sanaape muntoie odeie eiantoia ipa kadi do muntoi. Mo kadiwa insempe dewasampa tane ne mo ita nitu uduudu inawaa waimompa mai osowe kadimopa, dia.

²²Tane tawo ema winompa walamawe, lawuru anamba ita uwauwa walamawa, obasa ita ginasa, unu ita omo, walama ita tadina, dewa ema ideita winamompa.”