Buk Song 59:4-17

⁴Bikpela, mi no mekim rong na mi no bikhet long lo bilong yu, na mi no gat asua long wanpela samting. Tasol ol i hariap i go sambai bilong pait long mi.

⁵God, Bikpela I Gat Olgeta Strong, yu mas hariap i kam helpim mi. Yu God bilong Israel, lukim ol dispela man. Yu kam kwik na mekim save long olgeta lain manmeri. Yu no ken sori long ol. Bekim tru ol dispela lain manmeri i tok olsem ol i laik mekim gutpela pasin, tasol ol i tingting long mekim pasin nogut.

⁶Long nait ol i kam bek long biktaun na ol i raun raun long banis na singaut olsem ol dok.

⁷Harim. Tok bilong ol i nogut tru, i olsem bainat i sap moa. Tasol ol i tok, “Husat bai i harim mipela?”

⁸Tasol Bikpela, yu save lap nogut long ol. Yu save tok bilas long olgeta lain manmeri.

⁹Yu tasol i save strongim mi na lukautim mi. God, mi save go long yu tasol na mi hait long ol birua.

¹⁰God bilong mi em i save laikim mi tru, na em bai i kam helpim mi. God i larim mi na bai mi lukim em i winim ol birua bilong mi.

¹¹God, mobeta yu no kilim ol i dai. Nogut ol manmeri bilong mi i lusim tingting long ol samting yu mekim long ol man nogut. Bikpela, yu wasman bilong lukautim mipela. Long strong bilong yu tasol, yu mas rausim ol birua nabaut na bagarapim ol.

¹²Oltaim ol i tok long mekim sin tasol. Larim ol i kisim bagarap long pasin bikhet bilong ol. Ol i save tok nogut long nem bilong yu, na ol i tok giaman oltaim.

¹³Olsem na mobeta yu belhat long ol na yu kilim ol. Pinisim tru ol dispela man nogut. Yu mekim olsem, na bai ol manmeri i ken save, yu God, yu stap king bilong ol Israel, na yu king bilong olgeta hap.

¹⁴Long nait ol birua bilong mi i kam bek long taun, na ol i raun raun na singaut olsem ol dok.

¹⁵Ol i wokabaut i go i kam bilong painim kaikai, na sapos bel bilong ol i no pulap, ol i save singaut nogut tru.

¹⁶Tasol mi bai singim song long bikpela strong bilong yu. Long moningtaim long olgeta de bai mi singsing bikpela bilong tingim yu i save laikim mi tumas oltaim. Long wanem, ol kain kain hevi i kamap long mi bipo, na yu bin lukautim mi gut na yu stap olsem banis bilong mi.

¹⁷God, yu tasol yu strong bilong mi. Mi laik mekim song bilong litimapim nem bilong yu. God, yu save laikim mi tru, na yu strongpela banis bilong mi.