Miti Mânec 59:4-17

⁴Hehesic‐nane moc mi foha quruŋ herâ fisi birickeŋgopieŋ, irec fahare ware sacfozic enarehuc honec‐jopac.

⁵Anutu Tâpiri Ɋuŋɋasaŋ Wofuŋ, Israere Anutu, go mana ɋâɋârerâ qâpuc guru sasawa bâtiŋ‐jopac; docbapa repicne jaŋeraonec moc mi akickezemec!

⁶Hae owâeme sâc risie warerâ qâto iŋucne qâŋkeeŋgopieŋ, ehuc haemaŋko rarac wawarec eeŋgopieŋ.

⁷Erâ owa ruruckehuc dâŋfânâŋ sâko erâ ʒiŋuc mueŋgopieŋ: “Dâŋepene mozi manaocmu?”

⁸Wofuŋ, go ine gâwie‐jarekomec, qâpuc guru sasawa mana wahac‐jopakomec.

⁹O tâpiri‐nane, no mumumbiaŋ gae hegarepe; o Anutu, go hâcne huec sanaŋ‐nane.

¹⁰Anutu‐nane e aki anonoc‐ticneheczi bâfuacnuocmu, Anutu‐nanezi manaha râsifâc‐nane honec‐jopahuc saoreŋ qapemu.

¹¹Mi qâhâmoc‐jopac, ŋicfâc‐nane jaŋe nikec‐jopazacte. Tâpirigezi ejaretec biric boroc enʒepieŋ, erâ herândiŋ‐jopazemec, o Wofuŋ, maro‐nâŋec.

¹²Micbipic‐jeŋickonec dâŋ wahaekac i sindaŋ hârindaŋne; irec penaroŋ â sosopec â burecdâŋ‐jeŋic, izi ufic ejareme ira jowanʒepieŋ.

¹³Kimbeŋko bâsirowec‐jopakutec omaenʒepieŋ. Eme ŋic sasawa jaŋe ʒiŋuc mananʒepieŋ: Anutu e Jakoborao guriŋ bapa gie baekac, guriŋ bapa izi raku mâreŋ qaŋeŋnao tarakac.

¹⁴Hae owâeme sâc risie warerâ qâto iŋucne qâŋkeeŋgopieŋ, ehuc haemaŋko rarac wawarec eeŋgopieŋ.

¹⁵Jaŋe nânâ basahuc ra ju ware ju eeŋgopieŋ, â mi gapec‐jopame kio kâroŋ eeŋgopieŋ.

¹⁶No ine tâpirigere mumuteŋ gae hepemu, furictea aki anonocgere ʒeri gae hesokapemu. Goki hâcne huec sanaŋ enaremeŋ, â ʒârâ ʒâpâ fuame dapeŋ enaremeŋ.

¹⁷O tâpiri‐nane, no mumumbiaŋ gae hegarepemu. O Anutu, go hâcne huec sanaŋ‐nane, Anutu go aki anonocge bâfua‐nareekic.