Sam 59:4-17

⁴Kxmule-esz', a' se tzoliqtilr nztz-krdr ninge. Tulzm x vzm mz nzokatr-krm ninge.

⁵Yawe, nim Gct kc tqrninr, Gct r lr Israel. Dwalzm mz nzayrplapx-krm lr mrkzbleng. X bzkq ycngr drtwrm krkcng tzryrlqng drtwr kxtrka.

⁶Nzyzluti-zvzmlr mztea mzli kc milzpq, Nzapulr kuli kzpeto kcng tzkclwzng mz nzvzne-krdr mztea.

⁷Drtwrdr nzamqmqlr x natqdr nzapulr toki r vea kxmalc. Mz drtwrdr nzrpilr trpnzngr kx rkrlztrpz x trpnzngr nzayrplapxngr nidr.

⁸A' nim Yawe, yrpalelvzq kxnzmnc-mrbr lcng, X xtrnga-ngrn nidr.

⁹Gct rnge, abrtr-zvzbo drtwrnge mz nzxplr-krm, Murde nim lrpalvc nyznge.

¹⁰X krlzx kx sa na-aovxiox enqmi rngeng, Murde naokatrq ninge mz nzaodu-zvz-krm.

¹¹Yawe, nim temz ngr lomrgr kc tqyrputrngr nipna. Nibqti nidr, murde leplz nengeng nadcpx mz drtwrdr Kx nim Gct kc tqayrplapxle kxnzaleng alwx. Aodaliti nidr mz zmatq ngrm, murde nataong mz drtc'.

¹²Batrpz mz nzglqpx-lzbq-krdr nzatao-mou-krde nidr. Murde mz nzycmne-krdr natqdrng ngi dalr alwx, mz nzrpibqtingr x nzpokiangr.

¹³Odati nidr mz nzmilxtxo-krm nidr mz zngya ngr drtwrm. Murde leplz nakrlzlr kx nim Gct kc tqaclvele lr Israel x lr nrlc tulvzo.

¹⁴Nzyzluti-zvzmlr mztea mzli kc milzpq, Nzapulr kuli kzpeto kcng tzkclwzng mz nzvzne-krdr mztea.

¹⁵Nzrtangrng nadr dakxnzng me yctxpqng, X drtwrdr nzamqmqlr mz trnzkrlc-kru nelzdr.

¹⁶A' sa nangr-kato-zvzx mz nourla kang kqlu, Mz nzpipx-krnge zmatq ngrm x nzaodu-zvz-krm. Murde apu-zvzme bange lrpalvc nyznge Kxrlakitrx mz mzli r nzkxpungr.

¹⁷Sa na-angrlvz-zvzx nim, Gct kc tqaodu-zvzle ninge. Murde nim lrpalvc nyznge kx xplr-esz'ngr.