Bugagia Bidibo Kolesagade Po Asęai Buku 6:2-21

²Nago te dąų walali pogo te naga digi kalabus ilibao, te naga digi kekelama, te muani wago te naga ma tola sabo tiwai gilama ebao.

³Ogwao, nage te kalabus elalubo polo tama tagalao. Tiyu, nage te bidi dologode bidabuo. Nago te dąų walali po sela sąwainu te agaba hanalugi pao. Te kolesagago nage nogi elaluama, te nage hale elalubo te tagalao, nage peyu naga yao.

⁴Nage me pila mudigio, nage asesa elama pao.

⁵Nage te kalabus elalubo tagalao, te uni hasago ma te bago te wa tagalama, wi pabo tiwai yao.

⁶Dage hagela bidi dabe, eno te tama po dagede elalubao. Dage pelama, te sagado dabego kolesaga bugagia sugi pobaso da, tama teda dage te kolesaga konea pai bidi pedelaibao.

⁷Te sagado dabe da, te augwa tonalubo polalubo tobolu bidi, ma genuai bidi, ma te ofisa, te me elalubeo.

⁸Te nai hauwa elalubo sogo, te sagado dabego te nai sǫą pabo sogo tuabo nai sisinama, te sabobo dao.

⁹Tiali goli, dage hagela bidi dabe, te dage sesabi gana elama, pila mudabo homu eba, agawe? Mena sogo te dage duga betde pila muani te hogodaluaibawe?

¹⁰Dagego te tama po wai, “Tagalao, da dwasianu gana godege manu piaibao,” wai. “Da te dwasianu sogo naga tama te toma tulama, tama te da hogodaluaibao,” wali.

¹¹Dagego te tiwai ebaso da, teda polo tama te dagego doado bage tigidali silama, tama dage te magi nai doado bage meni yai bidi tiwai pedelaibao, te nai wi sabo bidigo te dagego doado bage tigidali wi sela pabo tiwai yaibao.

¹²Te dwai bidi mu dabego te tibo po wabo dao.

¹³Augwaligo te tama po geme dualama wali. Augwaligo te gedu aluama, tama te nogogo po miyu, tama sągągo te usu sabo sę ebo dao.

¹⁴Sesemane sogo augwaligo te dwai sę yabo homu kolesaga kone paludu, tama augwaligo te bidi dabego te gasa bidi dabeba dwai haliga yabo sę eyu ebo dao.

¹⁵Tiali digi, polo mu tama te dolobo genuai sęgęgo te augwaliba pedalubaso da, teda augwali te usu ma ilabo sunumi me elalugobeo.

¹⁶Genuai Bidigo te bidi dabego te e 7 kolesaga dabe ebo da te godolo homu mu meni isąwanio, agai tede sębę ebo dao. Augwali e dao.

¹⁷Te hagoma ebo kolesagago te gasa bidi dabe tonobo te olo bage tiwai ebo kolesaga. Me te tibo po wabo kolesaga. Me te gasa bidi dabe olo dali ela mubo kolesaga ebo.

¹⁸Te dwai sę yabo homu ebo kolesaga. Tama me te dwai sę asesa polo ebo kolesaga.

¹⁹Te tibo po tų yainu ebo kolesaga. Me, te bidi dabego te augwa ama hasi te dwai haliga ilibo kolesaga ebo dao.

²⁰Ogwao, nago te naga ayago po wali pao, tama nago idago po me sela sągio.

²¹Nago te augwaligo po te naga homude munama, tama sesemane bugagia wali pobaso da, tama teda te nago tobolude me magede te wiegi yai au tiwai te pedelabo dao.