Bugagia Bidibo Kolesagade Po Asęai Buku 5:1-12

¹Ogwa, te eno mobo mabo poba olo bugagia muao. Eno te wiegi yai homu me kolesaga nageba mawainu ebao.

²Tama tibaso da, teda nage te doloba pai kolesagade bilaibao, tama te nago po tigidali te wiegi yai kolesaga koneai bidigo po tiwai yaibao.

³Nago tama tiao, magi baso meni, te we me deligo aga bidi tagalama, tama nage dali te gedu ebaso da, teda agai te nage homu bega sabo pusu yai po hauwa nage dali waibao. Awe, agai po wabo dwagi yai dao, te wel bugagia bilibo tiwai dao.

⁴Tama nago agai po wali pali da, teda nosali nago aga te dwai nai tiwai ąǫ eyu, te ha ebo nai gagawai eyu, tama te dene ebo te hwą bainatgo nage enebo tiwai dene tilama yaibao.

⁵Te tobage wego nage te isali bidi dabego pesageba dolo mu odasa paibao. Nago aga wali pobaso da, nage te gų pageba mu paibao.

⁶Agai te bidibo ula elaluabo doloba pai sunumidu wali me pogobeo. Menio. Te dwai sunumi dabedu wali pobao weyu, te agai me konegobeo, tama tiyu, te aga subigila naga pabo dao.

⁷Tialima, ogwa, eno poba bugagia olo muao. Nago te po me sela sągio.

⁸Nage te tobage wede te digibulu mu bidibo tiwai yao. Nage te agai be sunumi pąba me pigio.

⁹Tiyu, te nago wiegi yai nogi elaluali te tagalabuo. Te agai bidigo te nageba wiegi yai homu eyu, nago te sę yali te wiegi yai yali da homu elama, nage tau sabo homu me egobeo. Menio. Te nage te gesi ogwa bidi elalubadi, te agai nage ela muaibao.

¹⁰Tama nago te sainogo sę dene yali wiegi yai nai dabe te gasa bidi dabego nogoba pelama saibao.

¹¹Te gasigo nage selama, tama nage te nomona saibao. Tama te nage isainu ebo sogo, te nage betde pila mudu te dwai gela mu udaibao.

¹²Tama nago te tama po waibao, “Eno te augwaligo enabolo mobo mabo po wabode hagela homu yali. Magi baso eno te hagoma eyu, tama ena te bidi dabego dodolomainu ebedawe?