Bugagia Bidibo Kolesagade Po Asęai Buku 31:8-24

⁸“Te bidi dabego augwa sęgę po pusisąbo bidi dabe te nago augwali tonaluyu, tama nago te augwali tau sabo po weyu yao. Tama nago te magi nai meni ebo bidi dabede te po tų ebo tau sabo po weyu, te doloba pai kolesaga ebo sę bomo yao.

⁹Tama naga digi te po tų odobo sogo, nago te doloba pai kolesaga eyu yao. Tama nago te magi nai meni yai te hobedagia bidibo bidi dabe tau sao,” te po wali.

¹⁰Te bidigo te wiegi yai kolesaga mu ebo we sabo homu ebo da, agawe? Teda aga gegebo sę dene mu yaibao. Te tobage tiwai wego te tobage te gasa sawi yai masigi dabe te aiyaba elalubo tiwai ebo dao.

¹¹Te tobage we aga bidigo te wego wiegi yai kolesaga sesemane sogo wali pabo te bugagia koneaibao, agai tede homu si ebo menio. Tama wego aga tau siyu, te aga doado bage hauwa elalubo dao.

¹²Te wego te wiegi yai kolesaga naga aga bidiba sesemane sogo ebo dao.

¹³Te agai te sipsip nisi dali, gasagi yai nisi dali siyu, tego haniani hobi nigilama, tama agai te tobage haniani ugwa hobolobo sę eyu, te aga wiegi yai homu pemene ebo da.

¹⁴Te aga wai dali, aga bidi dali, augwa te tobage nai hauwa elalubao, magi baso meni, aga te nai sigi peyu, te digibulu mu peyu ebo dao, te genuai sip dabego ebo tiwai gilama tama tibo dao.

¹⁵Te wiegi yai wego da, te be posisąbadi digi hodaluama, tama aga wai me bidi te nai ulama, tama aga tau sę ebo we dabe sęba dobabo dao.

¹⁶Te bomai wego da, te agai abelainu ebo tǫ te hasia bolo bugagia osola sulama da, tama nosali aga bisnis yali sęde te mone selama, tama te gesi ni wain wai abelama bulaibao.

¹⁷Te deli sogo aga hagela me ebeo. Aga te bomai we me ebaso, tama aga bomo deliba sisina siyu, tama te sę yaibao.

¹⁸Te aga lam sole habude te wel ąį pągąnaluyu, te ula edubao, tama aga sę ela pidubadi te be huli tomoba mu igi peyu, te aga dobu si ebo bisnis sę ebo te bugagia ebo subo sogo tiaibao.

¹⁹Te tobage tiwai wego te aga digi te hobi dabe nigilama, tama te ugwa dabe hobolobo dao.

²⁰Te agai suali, te bidi dabe te doado bage menia siyu ebo sogo, agai augwaliba te doado bage mabo dao. Awe, agai te nai sǫą pai bage tau sabo dao.

²¹Te talua ge tulubage tulubadi digi, agai te aga wai puluba me bidide te homu si me isiąma te sę yaibao, magi baso meni, agai te augwaligo ugwa dabe te wiegi yai name ugwago nigibo dao.

²²Tama aga digi te aga bede selama piabo blanket dabe me nigaibao. Tama agai te wiegi yai tedela yai name ugwa, me te mama yai name ugwa wiegi yai me selama, tama aga gudubo ugwa dabe nigaibao.

²³Te bulude bidalubo polalubo bidi dabego te genuai nogi agai bidiba mawai. Tama aga bidi te polalubo bidi dabe bidalubo digi te aga me te polalubo bidi bidibo dao.

²⁴Hauwa sogo te wego te wiegi yai ugwa dabe me, te kukulu dabe me nigiyu ebo dao, tama te bisnis bidi dabe aselama, abelagasu ebo dao.