Bugagia Bidibo Kolesagade Po Asęai Buku 26:3-27

³Te bidi dabego te hos dabe dila pai bįgo eliyu, tama te donki dabego pedauwalide te ain munama, te augwali pabo dolasa pomainu ebo dao, tama augwaligo te dobo kolesaga ebo bidi dabe augwali te keloago elaibao.

⁴Te wiegi yai homu elalusiąbo bidigo, agai te geda mubo po nage dali obaso da, teda nago agai po wei me ponogio. Tiyu, nage aga tiwai pedelabuo.

⁵Te wiegi yai homu elalusiąbo bidigo, agai te geda mubo po nageba obaso da, teda nago agaba dodolabo po wei ponao. Tiyu, agai homugo, te aga koneani kolesaga te genuai mu da homu yabuo

⁶Te nago te wiegi yai homu elalusiąbo bidibolo te gasa bidiba po selasa pomainu tagala palobaso da, teda naga digi naga te dolobao, te naga sągą naga digi togolama sela sąbo tiwai ebao.

⁷Te wiegi yai homu elalusiąbo bidigo te wiegi yai po me deli wainogo ebaso da, teda aga usu me egobeo, te sągą dwai bidi te bilabo usu isąbo tiwai ebo dao.

⁸Te bidigo te wiegi yai homu elalusiąbo bidiba te genuai nogi mawainu ebaso da, teda te agai te gumi katapelde te dwasianu masigi munama enainu tama te dąų ola sabo tiwai ebao.

⁹Te wiegi yai homu kolesaga elalusiąbo bidigo te wiegi yai po me deli pusainogo eyu da, teda aga te bomai ąį tulama, te gęǫ eyu, te wabo pabo bidigo te sesane yai bonoba te nogogo tola sigi pabo tiwai ebao, tama te sesanego aga nogode dolobo dao.

¹⁰Te sę tonalubo bosman bidigo te homu kolesaga elalusiąbo bidi dabeba, me te subigila bidi dabeba te sę mobaso da, teda te bidigo enesigi balibi dolama, tama te ene dabe subigila enebo tiwai eyu, tama te bidi hauwa dolobo tiwai ebo dao.

¹¹Te wiegi yai homu kolesaga meni yai bidigo te aga polasa yali esela pabo bidigo ebo kolesaga tobage me iduaibao, te yowigo bogulai bogu te ma begasa pelama, tugi pabo tiwai gilama ebao.

¹²Te bidi me deli aga wiegi yai homu elalusiąbaso da, teda dago aga te konemainu tau sobaso, te usu yaibao. Tiali goli, te bidigo homugo te aga tigidali nai koneani homu ebaso da, teda te dago aga tau sabo sę te dene mu yaibao.

¹³Hagela bidi te be tomode olo dugulalu bidaibao. Agai te tama po waibao, “Te laion me deli te sunumide bidibao,” wabo. “Tama tibaso, ena te buluba me teda soagobeo,” wabo dao.

¹⁴Te hagela bidi aga betde pila mudu te tigi bebegeludaibao. Aga te hinsis muai be sunumi me deli ugwa peyu, eda asiyu ebo tiwai ebo dao.

¹⁵Hagela bidigo nogo te pou pletba muyu, te nai sainu yai. Tiali goli, aga te nogo ugwaba selama, te pedauwaliba nai muabo te bomo meni yaibao.

¹⁶Hagela bidigo te homu yai, te agai koneani kolesagago te nogo a naga olama, me badu nogo si wali bidigo te augwa bugagia konea pai te hania mu pusubo wiegi yai homu kolesaga te agai aiyaba elaluali homu ebo dao.

¹⁷Te bidi si wado po wabo sę ebadi, tiali goli te gasa bidi me pelama, te augwali sigo po wabo tau sabo po obaso da, teda te bidigo te yowi pabo sulama, tama aga pelama, te yowigo olo tola sigi pabo tiwai gilama ebao.

¹⁸Te bidigo aga abagi te tibo po ola mayu, tama nosali agai te po wali, “Eno te gagali po naga wali da,” po obaso da, teda te homu kolesaga meni yai bidi me deligo te ene dabe te subigila enebo tiwai eyu, tama te sia dabo sia dage dabe elalubadi, te subigila sąsąbo tiwai ebao.

²⁰Te augwaligo siaba te sia munama nogosiąbaso da, teda te sia disąma, sula saibao. Tama te tiwai me te bidi dabego te posobo po wasiąbaso da, teda te tigidali wado po wabo te sia saibao.

²¹Te sia nogobaso, te sia bugagia domainu ebao, tama te tiwai me te konila po wabo bidigo te hwįbo kolesaga genuai pedalumainu ilibo dao.

²²Te bidigo gasa bidiba posobo po wabo odobo te dago godolo mu yaibao. Te tobage po te pusu ebo nai tiwai ebaso, tama polo mu tama dago tubo dao.

²³Te bidigo wiegi yai kolesaga yaibao wabo po bomo elama wali, tiali goli aga homude elalubo page, te dwai kolesaga naga yainu ebaso da, teda te tǫgo nigali sospen sene me deli augwaligo te silvago haluama, tama te tonobo sawi yai mu tiwai ebo dao.

²⁴Te gasa bidi dabe wei homu isąbo bidigo, agai te augwali homu bega sabo po weyu, te augwaligo homugo te agai augwali wei homu eba homu emainu tiaibao. Tiali goli, agai te augwali tibo po naga ola maiabo homu ebo dao.

²⁵Te tobage bidigo po dabe te nago olode pusu yaibao, tiali goli nago agai po nago homuba dąų me ola sigio. Magi baso meni, te gasa tobage dwai homu dabe te agai haligade pągąnalubao.

²⁶Agai aga te homu geme dualubaso, usu yaibao wali, tiali goli te we bidi dabego agai te dwai kolesaga konea pabo dao.

²⁷Te bidigo dwai kolesaga yabo homu ebaso da, teda aga digi dolaibao. Awe, te bidigo tǫ dedage dogolama, te gasa bidi teba tulalumainu yali, tiali goli te bidi aga digi aga teba ma tulaluali. Tama te bidigo te masigi te bulu du bageba ugwaba hogogobele pabo tiwai ebadi, tama te masigi edaba ma hogobeasa dulu, tama aga mesega sigulaibao.