Bugagia Bidibo Kolesagade Po Asęai Buku 19:18-28

¹⁸Te naga ogwago hagoma ebaso da, nago aga dodolao, tama agai wiegi yai kolesaga wali paibao. Tiali goli, te nago agai te dwai kolesaga wali pomainu sula tagalu gogolobaso da, te nago aga isimainu usu da wabo tiwai ebao.

¹⁹Te wado po polo weyu ebo bidi da, teda aga dwai sę yali sęgę te aga tolomainao. Te nago aga tau selama, tama te sęgę silibo si da, teda nosali te nago aga ma tau somainu homu yaibao.

²⁰Te bidigo nage ola momainu eyu, tama nago te wiegi yai homu kolesaga momainogo eyu da, teda nosali nago te wiegi yai homu koneani kolesaga me elaluaibao.

²¹Da we bidi dabe dago te sę hauwa yabo homu ebo dao. Tiali digi, te Genuai Bidigo yabo homu yali sę te naga te pedelaibao.

²²Te bidi dabego te homugo mu kęą pai bidi te wei mu ebo dao. Awe, te bidi doado bage meni yai bidibaso, te wiegi yai me egobeo. Tiali goli, te magi nai doado bage meni yai bidi da, agai te tibo po wabo bidi aiyaba mu elalualio.

²³Te nage Genuai Bidide wi eyu, aga dologode bidibaso da, te kolesagago te nage bidibo ula mobao. Tama nage sesemane bugagia bidiyu, tama dwai nai nageba me pedalugobeo.

²⁴Te hagela bidigo te pou pletba nogo muyu, te nai sainogo yaibao. Tiali goli, agai nogo te ugwaba sagulama, tama te nai pedauwaliba me mugobeo.

²⁵Nago te hagoma bidi te keloago mobo po weyu te elibaso da, teda te homu kolesaga elalusiąbo bidigo sulama, tama koneaibao, aga digi te wiegi yai kolesaga wali pabo homu yaibao. Tiali goli, nago te wiegi yai homu elalubo bidi dodolobaso da, teda te augwaligo homu kolesaga te wiegi yai mu pedalubo dao.

²⁶Te ogwago aga ayago nai wi sabo sę ilama, tama aga ida te bede bidibo ela gudulubaso da, teda agai aga te we wai sibi te dwai hale ilibo sę mu ebo dao.

²⁷Ogwao, te nago wiegi yai homu kolesaga te skul weyu sabo homu ma isiąyu da, teda nago te sunumide geda muyu, te homu kolesaga elalusiąbo bidigo homu tiwai te wali paibao.

²⁸Te dwai kolesaga ebo bidi te po tų ebo witnes bidi pedalubaso da, teda agai te po tų tibo eyu, te dolabo homu pemene ebo dao. Te dwai kolesaga ebo te tobage bidigo te tubo nai tiwai ebo dao.