Bugagia Bidibo Kolesagade Po Asęai Buku 12:4-25

⁴Te bidi me deligo wego te wiegi yai kolesaga ebaso da, teda te tebogo te aga bidiba te genuai nogi mobao. Tiali goli, wego te dwai kolesaga haniani eyu, tama aga bidi hale ilibo we yai baso da, teda te wego te dwai gasigo te aga bidigo dili te dolobo sę tiwai ebao.

⁵Te doloba pai bidi dabego sę yabo homu kolesaga te dolo naga dao. Tiali digi, te dwai sę ebo bidi dabego da, te sesemane sogo te we bidi tibo po ola maiabo haniani kolesaga yabo homu ebo dao.

⁶Te dwai sę ebo bidi dabego po te bidi geme dualuagaselama, tama te bidi ela muainu sisi elalubo tiwai gilama ebao. Tiali goli, te doloba pai bidi dabego pogo te we bidi dabe te sęgę elalubo sogo tau siyu, tama te we bidi dabe augwa bugagia bidimainu ebo dao.

⁷Te dwai kolesaga ebo bidi da, te aga dolama tama silaibao. Tiali goli, te doloba pai bidigo hani da, te bugagia ma dolalubao.

⁸Te wiegi yai homu elalubo bidi yai baso da, teda te we bidi dabego aga nogi ugwaba saibao. Tiali goli, te homu kolesaga gagea pai bidi da, augwaligo te aga nogi aiyaba elalubo dao.

⁹Tama te olo bidi me deligo te aga sę bidi me deli te aga bede bidibaso da, te wiegi yai da, tama te bidigo aga genuai bidi da homu ebo bidi te aiyaba elaluali, tiali goli te aga nai sǫą pali.

¹⁰Te doloba pai bidi dabego te augwa kibu hani sibide te augwalide olo tau sabo kolesaga eyu, tama augwali bugagia tonalu negebo dao. Tiali goli, te dwai bidi dabego da, te augwa kibu dabe dali dene mabo sę eyu, mu dolobo dao.

¹¹Bidigo te aga gi bugagia tonalubaso da, teda agai nai hauwa saibao. Tiali goli, te wiegi yai homu kolesaga meni yani bidi da, aga te sę dene odolali eyu, te haniani sęgo aga me tau sainu ebaso, usu me egobeo.

¹²Te dwai sę ebo bidi dabego te bidi mebago te dwai sę elama, tama te nai hauwa sabo sulama, tama augwali te nai dabede te pesą mu ebo dao. Tiali goli, te doloba pai bidi dabego te nai hauwa te augwa wiegi yai kolesaga ebode sabo dao.

¹³Te dwai bidi dabego te dwai pogo te augwa digi te kalabus ebo dao. Tiali goli, te dwai sęgo te doloba pai bidi dabe gegebaso da, augwaligo te ela soaibao.

¹⁴Te nago po wabo me, nago sę ebo me, te wiegi yai eyu da, teda tego nage nai sobaso, te nage bugagia bidaibao.

¹⁵Te wiegi yai homu meni yai bidi dabego, te augwa koneani te augwa kolesaga naga te wiegi yai naga da homu ebo dao. Tiali goli, te wiegi yai homu kolesaga elalubo bidi dabego da, te gasa bidi dabego augwaliba te wiegi yai homu kolesaga momainu ebo dao.

¹⁶Te wiegi yai homu kolesaga elalusiąbo bidi dabego te bidi mego magi sę me deli augwaliba ebo si, te augwali haliga sębę polo eyu yaibao. Tiali goli, te wiegi yai homu elalubo bidiba te dwai po obaso da, teda agai te pode homu elama, sula tagalobo dao.

¹⁷Te sę ebo suali bidi, te witnes bidi, te mu po wabo bidi yai baso da, teda agai doloba pai po naga te po tų ebode pusaibao. Tiali goli, aga te tibo po wabo bidi tiwai eyu da, agai te po tų ebo te tibo dali waibao.

¹⁸Te bidi mego aga po homu kone palama, bugagia me wasiąbaso da, teda agai te subigila wabo pogo te gasa bidigo haligade te bainat hwągo enebo tiwai ebao. Tiali goli, te wiegi yai homu elalubo bidigo pogo te bidi tau sabo, te wiegi yai marasingo tau sabo tiwai gilama ebo dao.

¹⁹Te ili po wabo po te pęwadage sogo mu elaluama, tama bidi dabego te po homugo gegeda palaibao. Tiali goli, te mu po da, te sesemane sogo mu elaluaibao.

²⁰Te dwai kolesaga yabo homu ebo bidi dabego, augwa digi augwa tibo po ola mabo dao. Tiali goli, te we bidi dabe tau siyu bugagia bidimainu homu ebo bidigo da, teda aga digi te pemene ebo dao.

²¹Te doloba pai bidi dabe augwaliba te dobo sę pedalugobeo. Tiali goli, te dwai sę ebo kolesaga ebo bidi dabe da, augwaligo te dwai sęgę hauwa elalubo dao.

²²Genuai Bidi te haliga sębę mu eyu, tama te tibo po wabo bidi tigidali dali te boi bidi homu ebo dao. Tiali goli, agai te mu po naga wabo bidi dabe dali te agai pemene ebo dao.

²³Te wiegi yai sę yabo kolesaga koneai bidigo, agai te aga wiegi yai homu elalubo te polo tama me pusugobeo. Tiali goli, te wiegi yai homu meni yai bidigo da, agai po te ąį bole tulalubo tiwai umabo yaibao. Tiali goli, te agai po odobo we bidi dabe da, te augwaligo koneama, te aga kolesaga umuna sai bidi tiwai da wabo dao.

²⁴Te sę dene ebo bidi da, te tonalubo bidi pedelaibao. Tiali goli, te hagela bidi dabe te olo sę naga ebo bidi pedelaibao.

²⁵Te bidigo homu gone te sesemane kone tua pabo bidi da, teda aga te haliga sęgę mu elama, tama aga homu dolaibao. Tiali goli, aga abagigo te bidi dali te wiegi yai po obaso da, teda aga te bugai haliga ma ebo dao.