Apostolo 5:1-21

¹Vaze ꞌahoga niḡa Anania. Inugaꞌe Safira. Ze habaze boꞌaḡa tahiḡa seroniro.

²Ebu Anania ani inugeta ḡoere idanadu, eꞌe moniḡa nuꞌe obone tiro. Ebu ḡahaꞌa daꞌo apostolo azaḡa vaḡe odohe onamadu, zamazeo tiro.

³ꞌOugadu Peteroꞌa ninaꞌa, “Anania, nougadu zamaḡoꞌe Sataniꞌa irivaꞌonadu, Vine Zaḡoḡa mazao ḡurireha? Ḡaꞌe seroniroteꞌe moniḡa ruga ḡae veize obone teha.

⁴Haba aꞌaꞌe, mene seroniroteꞌe madaḡanoꞌe ḡae haba. Seroniroteꞌe enogano zuni eꞌe moniḡaꞌe ḡae moni. Eꞌe hina ḡae ura ḡauḡa haḡaoga idaḡa. Rehano ḡa nougadu ꞌuguḡa haḡaiḡa haḡaiꞌuma rae zamareha? Deꞌuge mene zamarifo. Ḡaꞌe vaze mazao mene ḡurira rehano, Badiꞌa mazao ḡurireha.”

⁵Ananiaꞌe ḡoere eꞌe igirotene, higau bauradu rudaro. Ebu eꞌe hariḡa igiroteꞌe azaḡaꞌe niduꞌa rihau rudaro.

⁶Ebu Tahiꞌa iziga nuꞌa onaadu, dabua hina ahiꞌa ꞌumiro, ebu herate bunadu, ḡuriro.

⁷Mada uḡidu (3 hours) enogano, inuganiꞌa diuḡiꞌ onairo. Ani aḡuꞌa naginiꞌa fureranataꞌaꞌe.

⁸Ebu Peteroꞌa ḡadiniro, raenaꞌa, “Ehoꞌi! Iꞌuꞌa odohe onaateꞌe moniḡaꞌe zae haba seroniroteꞌe moniḡa hehe?” Aniꞌa naenaeninaꞌa, “Oꞌe, naeḡaꞌe deiꞌeꞌe.”

⁹Peteroꞌa niro, raenaꞌa, “Nougaduni ḡanine ḡoere idanadu Zuhiꞌa Boro Vineḡa soꞌoneha! Ḡianoꞌi! Iꞌu gurateꞌe azaḡaniꞌe ibihetao eꞌe diuḡiꞌ onaeꞌeteꞌe. Ḡae zuni zeḡeꞌa herate buḡadiꞌuma.”

¹⁰ꞌOuge raꞌeteꞌe zamaḡano aniꞌe Petero oda babaḡano higau bauradu rudaro. Ebu iꞌa guriroteꞌe tahiꞌaḡa iziga iziganiꞌa diuḡiꞌ onaadu Safiraꞌa rudanoga horoniro. Eꞌanoꞌo herate bunadu iꞌa uhiḡano ḡuriro.

¹¹Ekalesia azaḡa niduꞌa zu eꞌe hariḡa igiroteꞌe azaḡa niduꞌaꞌe rihau rudaro.

¹²Apostolo azaḡaniꞌa Badiꞌa tahi gigiꞌa haḡaiḡa zu zaguzagaꞌuma haḡaiḡa ḡehaḡa vazevaze boꞌaḡano haḡaido, ebu Iesu mazao fieꞌeteꞌe azaḡa niduꞌa Solomona touraḡio nuꞌoraudo.

¹³Iesu mazao mene fieꞌeteꞌe azaḡaꞌe zeḡe teite ꞌauḡoga mene idaḡa ꞌahine, tibani zuni mene ꞌauḡiro, rehano vazevazeꞌa Iesu mazao fieꞌeteꞌe azaḡa horozadu, “Zeꞌe vaze manoḡa.” reiro.

¹⁴Rehano ohoze zu roḡae ḡehaḡaniꞌa Iesu mazao fiadu, ragate ragate meꞌode tibuzido.

¹⁵ꞌOugadu ibi genaḡano zuni, ugi azaḡa tutuze onaadu, geda rana bazuze tido, Peteroꞌa ibio onaadu zeḡe uhiḡano vitatiteꞌea, ane ahiri zauhaḡaniꞌa zauhaziteꞌeba, ugizeꞌa manoroga.

¹⁶Ebu Ierusalema uhiḡa neḡa neḡanonoꞌo zuni vaze ḡuḡuvaḡaniꞌa ugi azaḡa zu vine sauꞌaniꞌa rana reiroteꞌe azaḡa tutuze onaido, ebu zeḡe niduꞌaꞌe manorido.

¹⁷Ebu dibuꞌo hauꞌeteꞌe ḡihiꞌaḡa zu ane teite rauꞌeteꞌe azaḡa niduꞌa ahiahize ruziro. Ane teite rauꞌeteꞌe azaḡaꞌe Sadukea azaḡa.

¹⁸Eꞌanoꞌo zeꞌe apostolo azaḡa oboze teadu, ḡuꞌano ohoziro.

¹⁹Rehano Zuhiꞌa Boro tuḡure vigaꞌa eꞌe oheꞌano ḡuꞌa neḡa ibihetaḡa vavaꞌadu mae buziro.

²⁰Ebu tuḡure vigaꞌa zinaꞌa, “Onamoꞌi, ebu Dibuꞌo Neḡa zamaḡano edanadu, ḡabone iziga ꞌadi hariḡa niduꞌa vazevaze meꞌodo zenoꞌi!”

²¹Eꞌe egadu irarirotene, Dibuꞌo Neḡa diuḡadu, vazevaze ihoziro. U dibuꞌo hauꞌeteꞌe ḡihiꞌaḡa zu ane teite rauꞌeteꞌe azaḡaniꞌa nuꞌoranadu, kanisoro azaḡa zu Isaraela vaze boroboro niduꞌa huze nuꞌoziro, ebu apostolo azaḡa ḡuꞌa neḡanonoꞌo tutuze onaoga veize vaze tuḡuziro.