Tinavete 5:1-21

¹Ba koa nana tugo si keke tie, pozana e Ananaeasi, meke sa nana barikaleqe si e Sapaera. Holuholu nia tugo rini si keke dia vasi pepeso.

²Paleke la nia Ananaeasi sa kukuruna sa poata koari na apositolo, ba kopu pule nia sa si keke kukuruna. Sa nana barikaleqe ba va egoa sapu gua asa.

³Meke zama la ia Pita si asa, “Ananaeasi! Na vegua ke va malumia tu goi se Setani pude lalae nia sa mua tinoa, ke kokoha ia goi sa Maqomaqo Hope, meke kopu pule nia goi sa kukuruna sa poata koa sa pepeso pu holuholu nia goi?

⁴Sa pepeso si tamugoi totoso lopu ele holuholu nia goi. Meke sipu beto holuholu nia goi, si leana pude tavetavete nia sa poatana vasina pu hiva nia goi. Na vegua ke kokoha nia goi sapu sa doduruna sa poata si vala goi, gua; ba tuqe veko tomea goi sa kukuruna? Lopu kokoha pa tie si goi, ba koe Tamasa tu!” gua se Pita.

⁵Meke totoso avosia tugo Ananaeasi sa zinama te Pita, si hoqa mate nia mo si asa. Ke matagutu hola sari doduru, totoso avoso nia rini sa ginugua asa.

⁶Meke mae hade palekia rina tie vaqura sa tomatena, meke la pomunu nia rini si asa.

⁷Meke sipu hola padana ṉeta aoa, si la kamo sa nana barikaleqe. Lopu gilania sa sapu gua ele ta evaṉa koasa loana.

⁸Meke nanasa la ia Pita si asa, “Sapaera! Vegua, hiera hinokara tugo doduruna sa poata sapu vagi nia gamu kara Ananaeasi koasa pepeso?” gua si asa. “Uve, asa tugo,” gua se Sapaera.

⁹Meke zama la ia Pita si asa, “Na vegua ke variva ego nia gamu kara tamaloana pude podekia sa Maqomaqo Hope te Tamasa? Dotu, sari na tie vaqura pu ele la pomunu nia sa loamu, si tiqe kamo pule mo pa sasada sara, meke kote mae paleke vura nia pule rini sa tomatemu goi!” gua si asa.

¹⁰Meke pa totoso asa si hoqa mate mo se Sapaera pa kenuna e Pita. Nuquru pule sari kasa tie vaqura, meke sipu dogoria rini sapu ele mate si asa, si paleke vagia ri sa tomatena, meke la pomunu nia rini pa kapana sa loana.

¹¹Meke matagutu hola sari doduru tie te Karisito, meke sari doduru tie pu avoso nia sapu gua ta evaṉa.

¹²Soku tinavete variva magasadi si evaṉi rina apositolo koari na tinoni. Hoke la varigara sari na tie te Zisu koasa vasina pu ta pozae Zokozokoroana d te Solomone pa Zelepade.

¹³Meke va lavati rina tinoni sari na tie te Karisito, ba kadaka la somana si arini pa Zelepade.

¹⁴Ba soku lala dia sari na tie na barikaleqe si va hinokaria sa Baṉara meke somana la koa rina tie te Karisito.

¹⁵Hoke ta salaṉa sari na tie koari na apositolo, gua asa ke paleke lani rina tinoni sari dia tie mohodi, meke ivara ni rini pa sisiraṉa sari na teqe, meke va ekoi rini, pude pana ene hola se Pita si kote va aqori sa maqomaqona sa meke ta salaṉa.

¹⁶Soku puku tinoni saripu maedi gua koari na vasivasileana pa vari likohaena Zerusalema, si paleke mae ni sari dia tie mohodi, meke saripu ta higorae tomate kaleadi, meke ta salaṉa beto sari doduru.

¹⁷Meke sa ṉati hiama kenukenue meke rina Sadusi pu koa turaṉia, si konokono sisigiti ni sari na apositolo.

¹⁸Ke tuqe vagi i rini sarini, meke vekoi rini pa vetu varipusi.

¹⁹Ba pana boṉi asa, si la si keke mateana te Tamasa, meke tukelia sa sa sasadana sa vetu varipusi, meke turaṉa vura ni sa sari na apositolo, meke zama,

²⁰“Mi la koasa Zelepade, mi la va tumatumae nia koari na tie sa doduru guguana sa tinoa vaqura hie,” gua si asa.

²¹Ke pana vaqavaqasa, si nuquru la pa varivarigarana pa Zelepade sarini, meke podalae la variva tumatumae koari na tinoni. Sipu kamo sa ṉati hiama kenukenue, meke sari na tie pu koa turaṉia, si tioko varigara ni rini sari na koimata tadi na tie Ziu, meke sari doduru koasa Sanihiderini, sa puku tie varipitui tadi na tie Ziu pude vivinei, gua. Ke garunu lani rini pa vetu varipusi sari kaiqa dia tie kopu pa Zelepade, pude la turaṉa mae ni sari kasa apositolo, gua.