Aposel 5:1-21

¹Ara musano a risano o Ananias, der nama nun a ino a risano o Sapaira der siuru ara du piso.

²Ra der mulaot sur der in pam sikot ara kukur mani ra di sa kul tar a du piso nami, ma ara kukur mani kut o Ananias i losi torom a kum aposel.

³Ra o Pita i watungi tano lena, “Ananias, pepetlai ra u mulaot pas o Satan sur in ruk unin balam ra u toro a Tokodos na Nion? Asau a kibino ra u munu pas ara kukur mani ra di sa kul tar a du piso nami?

⁴Ra a du piso i kis utmakai torom ui, anumi ut. Ma ra u siuru i, ui ut u warkurai sur a mani ra u siuru pasi taguni. Ilai ra u pam a sakino utna ri? Awu sur u toro a taro, u toro i ut o God.”

⁵O Ananias i longoro a wasiso ri, i puku pirso ra i mat. Ra det rop ra det longoro a wasiso uni det ngara doko.

⁶Numur a kum barman det wanpat, ma det pulus pas a minatino, det los pirso i, ma det por ru i.

⁷A tulu aua numur, anun a ino i ruk, ke tasman a utna ra i sa wanpat.

⁸Ra o Pita i tingi lena, “Un inanos iau, i kut ri a matan a du piso, ra mur siuru pasi?” Ra i balu i lena, “I kut ra.”

⁹O Pita i watungi tano lena, “Ilai ra mur nama num a musano mur epak pas sur mur in lar a Nion a Labino? Tama i, det ra det sa por tar anum a musano, kuri kut det una matansako. Uniutri det in los pirso ui bulung.”

¹⁰Uniutra i bulung i puku pirso taru numugu nisan o Pita, ra i mat. Ra a kum barman det ruk, det tama i lena i sa mat, det los pirso pas a minatino, ra det por tari milau nisan anun a musano.

¹¹Ra a taro na lotu rop det ngara doko, ma det rop kai ra det longoro a kum utna ri.

¹²A kum aposel det pam a susut na ukinalong ma a susut na utna na ukisin nisan a taro. Ma a kum tene nurnur rop det ser kis tomo una parada ina rumu na etabor, di watungi nama Parada anun o Solomon.

¹³A taro gisen det ngara sur det in kis tomo nam det, ikut ka det watung laulau det, det urur un det.

¹⁴Ikut a susut na taro melet, a wardain ma a kum musano, det nurnur maragom una Labino, ma di luk tomo det nama taro na nurnur.

¹⁵A taro det tama a pinapam anun a kum aposel, ra det los tar a kum misait ma di inep tar det una papor kisapi una kum kabulu na ininep ma una kum bat, sur o Pita in nan sakit det ra a niono in nan netes un lako taro tagun det, ra det in langolango.

¹⁶Ra a susut na taro tagitong una kum tamon milau o Jerusalem, det wanpat. Det los a kum misait, ma det ra a kum laulau na nion det ban laulau det, ma di ulangolango pas det rop.

¹⁷A mugumugu na tene etabor torom o God, ma a kum paspasano tagun a kum Sadusi, a nuknukin det i laulau nama kum aposel, uni det tama a taro det mur a kum aposel.

¹⁸Ra det pam ukai pas det, ma det uruk det una karabus.

¹⁹Ra una mirum, ara ensel anun a Labino i papos a kum matansako ina rumu na karabus, ra i ben pirso ru det

²⁰ma i watungi lena, “Mot in nan, ma mot in tur ubalan in noworo ina rumu na etabor, ma mot in inanos a taro nama kum wasiso rop una matok na nilaun ri.”

²¹Ra a kum aposel det mur a wasiso ra. Una kobot raut det ruk ubalan in noworo ina rumu na etabor ma det ususer a taro. A mugumugu na tene etabor torom o God i wanpat, tomo nama kum paspasano, ra det kabo tomo pas a taro na kiwung rop, a kum mugumugu anun a taro Israel. Ma det itula utong una karabus sur din ben pas a kum aposel.