Apostel 10:13-24

¹³Ja ngaiala kulno nunkangu pantjina wonti: “Petrujai, terkala tarau, nandrau ja tajiau!”

¹⁴Petrus jatana wonti: “A-ai, Kaparajai! ngangau ngato wata pota kulno jampa ja murumuru tajina warai.”

¹⁵Ja nakaldra ngaiala nunkangu pantjina wonti, pota mandrulani: “Mina Godali kulirkana warai, ninapara jundru wata murumuru patau!”

¹⁶Jenia pota parkulu pantjina wonti; ja nakaldra naupini koko pariwilpani taralkana tikana wonti.

¹⁷Petrus munta ko nganana wonti, mina nulupini mudlamalkali, nulu matja najina, wondrai kara; mai, tana materi, Korneliusulu matja jinpana, ja Simonani punga matja jakalkingana, manani terkana wonti,

¹⁸Karkana wonti ja jakalkana wonti, Simon, nina tanali dikai Petrus, nunkangupini pungani tidnapalara ngamai kara

¹⁹Petrulu nunkangupini mudlamalkandru ngundranani, Jaolo nunkangu jatana wonti: “Mai, materi parkululali jidna wontiai;

²⁰Terkala tarau ja ngariau, ja tanangunto palkau, ja wata mangangankau, ngangau ngato tanana jinpana warai.”

²¹Petrus materaia matja ngarina, tanana Korneliusulu nunkangu jinpala wiri, nau jatana wonti: “Mai, ngani nauja nganai, ninaia jura wontila wapaia; minandru jura ninkida wokarana warai?”

²²Tana jatana wonti: “Kornelius, juljaia kaparali, kana talku ja Godangundru japali, nina Juda kana wolarali pirna ngundrai, jirijiribani jaura angela kulikirindru manila wiri, jidna nunkani pungaia karkananto, jinkangundru jaura ngarala.”

²³Nulu tanana karkana wonti wirinanto, ja nulu tanaim ngamalkana wonti. Ditji kulnuni Petrus jiritjina wonti, ja tanangu jela palkana wonti, ja ngatata palpa Joppendru nunkangu jela wapana wonti.

²⁴Ja ditji kulnuni tana Cäsareani wokarana wonti. Korneliusulu ja nunkani nguralali ja kamaneli ngura kulnulali, tanana nulu mapana wonti, tanangu kalkana wonti.