Aposotolo Adi Hewau 22:15-26

¹⁵Ia tauribahemasarahana ede oa, saha eo saha u itadi, eo saha eo saha u ataiedi, abo u ribaedi tatao gamagamagari aridi eai.

¹⁶Na, ede saha u bagibagini? U toro, abo se hebapatisoim, em baaea se deurigabaedi, Guiau esana u ataatai.’

¹⁷“Eau abo ea uioma Ierusalema eai, dubu eai ma uuragu ea enosuai;

¹⁸ia ea iita, i heribagu, i ene, ‘Ierusalema u laugabaeheuheulai, eau ribagu u ribaei taba nige se ataiei.’

¹⁹Ea ene, ‘Guiau e, se nuatuiyao, tauataataiena tataodi sunago gamagamagari alodi eai ea lobaidi, ea tutuguduidi, eo ea pidiridi hinage.

²⁰Oa tauawaabiem Setepano, osinana se heboriri wa, eau maedi ai totoro, eau hinage ena mate ea talamsagu ia tauunuina hinage adi lulu ea abiabi gogo.’

²¹Ia i ribalaoma arigu eai, i ene, ‘U lau, abo ea hetamarim eda lohaloha eai Murimuri‐tataodi aridi eai.’”

²²Ena riba tatao se ataiei i lau e wau riba wa i ribaei, abo se ribagogo, si ene, “Temeta tau me au woeahesuarayawa, tabu i mia tanoubu potana eai! I mauri i mia nige i lolo.”

²³Isi se eogayoga, adi lulu se lauhaidi, geregere hinage se gagarohai, se tusaei.

²⁴Iala tanuagana i hetaladuidi, Paulo se woeai, numa lailai alona eai, pidipidiri eai bena se eooi adi matapaana abo se italobai.

²⁵Isi ia sarai opina mainana eai se auaui, Paulo i ribalau senturion wa arinai, gegesina eai ede i totoro, i ene, “Roma tauna au pidiri gaibui, edi riba hinage sora nige se hemamohoiei, laugagaeo abiabina ede meta wa?”

²⁶Teina riba ta senturion wa i ataiei, ie lau iala tanuagana arinai, ia heriba, i ene, “U komani, tau me ia Roma tauna.”