Menge Ininang 22:15-26

¹⁵Ibeg din, meg-indan ka diyà te kedita te otaw te kinità no aw dinineg nikaw.

¹⁶Nayan, ayas ka. Enaw ka aw bonyagan ka. Pegtawal-tawal ka diyà te Pengolo amon mekelowà ka lekat te salà nikaw.’

¹⁷“Penga niyan, minolì a dini te Jerusalem. Pegtawal-tawal ko doton te dakel simbahan, doen migpekità diyà kanak.

¹⁸Minikagi se kinità ko, ‘Ayas ka kesayo lekat te Jerusalem, so eked penenalan se menge otaw dini te itoladà no tepad kanak.’

¹⁹Minikagi a diyà te Pengolo, ‘Meneng aneng-aneng ko menenalan dan, so netegahan dan te siaken se timeped te kedita te simbahan te Judiyo amon dekepen ko aw bedasen ko se kedita te otaw nemenal diyà kamno.

²⁰Netegahan dan heman te siaken se timanod te pegpengimatay dan te sogounun nikaw si Esteban, aw migsebad se pedowan ko diyà te menge otaw nengimatay kandin, so migtonggò a te saol linowas dan.’

²¹Meneng minikagi se Pengolo, ‘Kesayo ka, so isogò ta doton te mediyò ogpeanan amon megtoladà ka te kagi ko diyà te menge otaw kenà Judiyo.’”

²²Pegdineg dan te isogò sikandin doton te menge otaw kenà Judiyo, wedà dan ebey penenalan kandin. Migbelobansag dan, kagi dan, “Imetayan tadon den sikandin. Mèpiya pa aw matay sikandin.”

²³Migbelobansag dan, aw intayaw dan se saol, aw insabog dan heman se tanà doton diatas so ontò dan neopal.

²⁴Pegkità te kapitan te ontò dan neopal, impeibing din si Pablo doton didalem te kotà. Insogò din se menge sondalo memadas ki Pablo amon meg-indan te benal, so ibeg te kapitan metaga-taga aw eden se ingkeopal te otaw ki Pablo, so wedà pekelabet se kapitan te kagi te Hebreo.

²⁵Peggapos dan kandin, minikagi si Pablo diyà te serhinto timindeg kidoen, “Eked kepakay aw bedasen se otaw sakop te Roma singed aw onà insaen te howis.”

²⁶Pegdineg te serhinto te inikagi din, dimoton te kapitan aw minikagi, “Ikà egpebadas kandin, so sakop sikandin te Roma.”