Aposolo Jaŋere Binaŋ 26:4-16

⁴“No motec ɋie‐naneoa Jerusalem haeo ŋic âgofâc‐nane jaŋere ŋondeŋko juku sokapo.

⁵Irec Judaŋic mârâc honecnumbiŋzi juju‐nanere fuŋne manaeŋgopieŋ. No farisaio ŋic mitire neŋgocne embiŋ jaŋere guruo hâcne jupo. Eme fuŋne‐nane hone manac embiŋzi muzo murâ munʒapiŋ.

⁶No kâpâcwâru ficko foekopac i wiac mocte mâcne, Anutuzi mimiŋnefâc‐nâŋec biŋedâŋ jazawec,

⁷eme dâŋ i fârinehec eocte Israe ŋicguru 12 jaŋe ŋafe ʒoaŋ qâqâtiri Anutu tiwâ bâzi rikecnehuc mai ecneeŋgopieŋ, ŋicwofuŋ‐nane, biŋedâŋ irec hâcne Judaŋic jaŋe dâŋgie nareeŋgopieŋ.

⁸Anutu e hâmokicne bâɋârec‐jopaekac, i ŋoŋe wemocte manapie mi eene tinac eekac?

⁹Erâ no nahacnere mupe, no Jesu Nazarete haeonec ere ʒâŋe biŋe imackepe sifuckeocte gie‐nane ewec.

¹⁰Jerusalem haeo iŋuc hâcne epo, ehuc taha bapa micne jaŋerao mupe pasi narepie opâ ruac wemo afecne kâpâcwâru ficne ficne râec‐jopahuc jupo. Erâ ʒika kirâ hâmoniŋte mujarepie dâŋjeŋic dopecke jupac wâc.

¹¹Judaŋic jaŋere mitificne ficne opâ ruac jopahuc jaŋe Jesure ʒâŋe musoriŋkeniŋte wiac qacne gâpâcne ejare jupac. Erâ no momori wânʒâŋ erâ hae ʒoricko ra jopa jâpec ejare jupac wâc.

¹²“Ekupe taha bapa micne jaŋe papia narehuc munarepie Damasko haeo rapemurâ rapo.

¹³Rakuhape qâqâtâc bembeŋkeha sambâŋkonec ʒoc tatamac bâricnehuc waha no â ŋicfâc‐nane âke tamaec‐nâpowec. Opoŋ, ŋicwofuŋ‐nane, ʒoaŋ tatamacne i weweaŋne, â honepo tatamac izi hâhâwicne jâmbâŋ.

¹⁴Eme nâŋe mâreŋko rândiŋke qarâ fohuc dâŋ wiwira moc Judadâŋko ʒiŋuc manambeŋ: ‘Saulo, Saulo, go wemocte nu jâpec enarehuc juekic? Go ʒârâ hewâcnetec âkecgume ʒâic manacmu.’

¹⁵Eme no ʒiŋuc mupo: ‘Wofuŋ go mo?’ Mupe ʒiŋuc nazawec: ‘Nu jâpec enarehuc jukomec Jesu no hâcne.

¹⁶Go fahare domac, no ʒi kiŋaŋ qaqa‐nane bacgupemurâ fua‐garekopac, irec go ʒi wiac honekomec â juku gowatupe honecmu irec biŋe mumu‐nane erâ juzemec.