Aposolo Jaŋere Binaŋ 17:3-17

³“Kristo e hâmorâ fahareocte mitio mukicne hâcne. Eme Jesure ʒâŋe biŋe ŋazaekopac e Kristo jâmbâŋ hâcne.”

⁴Eme tucne jaŋe dâŋ i mana ʒakierâ Paulo â Sila jaherao qohotambiŋ. Erâ Grikŋic Anutu araŋ bacnehuc jumbiŋzi bocjaha jaŋerao wâc ʒuhuckembiŋ, erâ ŋokac fekicne afecne mâcne.

⁵Eme ŋic bocjahazi miti manapie Judaŋic jaŋe mana sâqorerâ ŋic otec ɋeticne â râŋgeŋne henusuc‐joparâ mu ojowa sâko erâ Jasoŋte ficko Paulo â Sila ŋepicko tumaŋne‐fârembiŋ. Tumaŋne‐fârerâ ŋicjahec hâcne rocjofarâ ŋichofao râec‐jofazo mumbiŋ.

⁶Erâ basac‐jofarâ Jasoŋ â miti mamana gâcne rocjoparâ hae soŋaŋ jaŋerao fârec‐jopa rambiŋ. Ehuc ʒiŋuc muhuc owac owacke rambiŋ: “Mâreŋne mâreŋne maŋbâiŋ ejareeŋgopieŋ ŋic izi hâcne nâŋerao wâc fisipie

⁷Jasoŋzi hezu hewâneŋ ejarekac. Jaŋe Roma ŋicwofuŋte dâŋ qâsuahuc ŋicwofuŋ furune moc Jesu ere biŋe mupie haŋ baekac.”

⁸Dâŋ iŋuc muhuc haeŋic â soŋaŋ mu qafeŋ ejarembiŋ.

⁹Eme soŋaŋ jaŋe Jasoŋ â âgofâcne ejarepie sahac taha‐jeŋic qikiŋne‐jarepie râec‐jopapie rambiŋ.

¹⁰Eme miti mamana jaŋe Paulo â Sila ŋafeoa ejactepie Berea haeo rapic. Ira fisirâ Judaŋic jaŋere mitificko ferâ miti mupic.

¹¹Eme hae irec Judaŋic jaŋe urucne, Tesalonike haeonec jaŋe iŋucne mâcne, irec miti maŋafec jaha manambiŋ. Erâ dâŋjekic jâmbomac me burec muhuc ʒoaŋne ʒoaŋne gufu koparic ehuc miti papia wose manac embiŋ.

¹²Eme jaŋeraonec bocjahazi Jesure kikefuŋ embiŋ, erâ Grikŋic â ŋokac fekicne gâcne sâkozi jaŋerao ʒuhuckembiŋ wâc.

¹³Paulozi Anuture dâŋ Berea haeo muromackeme biŋe Tesalonike haeo rame irec Judaŋiczi manambiŋ. Manarâ Berea haeo warerâ hae rune mu heinʒaŋ ejarehuc maŋjeŋic bâiŋnembiŋ.

¹⁴Iŋuc epie miti mamana jaŋe Paulo ecnepie hae i beherâ raku hâwecko fisiwec. Sila â Timoteo jahe ine ijaha jupic.

¹⁵Eme ŋic jaŋe Paulo jowa raku Ateŋ haeo râepie ʒiŋuc jazawec: “Ŋoŋe risierâ mupie Sila â Timoteo jahe biac warezepirec.” Eme ŋic jaŋe risiembiŋ.

¹⁶Eme Paulo e Ateŋ haeo jahere woŋec juhuc ɋâŋ qâqâtâc mâretec ŋerame honerâ maŋne ʒoc ʒawec.

¹⁷Erâ Judaŋic jaŋere mitificko ferâ Judaŋic jaŋacne â Grikŋic gâcne Judaŋic jaŋere qâjâpecne jumbiŋ jaŋehec mâmâc mitire muc manac embiŋ. Erâ wâc ʒoaŋne ʒoaŋne hae ʒoŋao ŋic bâfuac‐joparâ iŋuc jaha miti jazawec.