Aposolo Jaŋere Binaŋ 17:13-29

¹³Paulozi Anuture dâŋ Berea haeo muromackeme biŋe Tesalonike haeo rame irec Judaŋiczi manambiŋ. Manarâ Berea haeo warerâ hae rune mu heinʒaŋ ejarehuc maŋjeŋic bâiŋnembiŋ.

¹⁴Iŋuc epie miti mamana jaŋe Paulo ecnepie hae i beherâ raku hâwecko fisiwec. Sila â Timoteo jahe ine ijaha jupic.

¹⁵Eme ŋic jaŋe Paulo jowa raku Ateŋ haeo râepie ʒiŋuc jazawec: “Ŋoŋe risierâ mupie Sila â Timoteo jahe biac warezepirec.” Eme ŋic jaŋe risiembiŋ.

¹⁶Eme Paulo e Ateŋ haeo jahere woŋec juhuc ɋâŋ qâqâtâc mâretec ŋerame honerâ maŋne ʒoc ʒawec.

¹⁷Erâ Judaŋic jaŋere mitificko ferâ Judaŋic jaŋacne â Grikŋic gâcne Judaŋic jaŋere qâjâpecne jumbiŋ jaŋehec mâmâc mitire muc manac embiŋ. Erâ wâc ʒoaŋne ʒoaŋne hae ʒoŋao ŋic bâfuac‐joparâ iŋuc jaha miti jazawec.

¹⁸Eme hae ira mamana ŋic jumbiŋ, ʒâŋe‐jeŋic Epikue ŋic â Stoike ŋic. Eme ŋic jaŋe hâcne Paulohec dâŋ mu bâtikic eec embiŋ. Ehuc gâcnezi Paulore ʒiŋuc mumbiŋ: “Ŋic keci mâc pacgoroŋ enârekac.” Â tucnezi ʒiŋuc mumbiŋ: “E nemu furunere biŋe mukac tinac i.” Paulo e Jesure biŋe â hâmockonec fafahare irec dâŋ mume jaŋe iŋuc mumbiŋ.

¹⁹Iŋuc murâ mâreŋ facne moc ʒâŋene Areo ira jowa ferâ mumbiŋ: “Go dâŋ furune mukomec i weniŋucte mukic,

²⁰dâŋ i hazec furu‐nâŋec, irec fuŋnehec mutec mananaŋ.”

²¹Ateŋ haeonec ŋic, mafa â hae fâri, jaŋe dâŋ biŋe furune manarâ dâŋ ijaha qame qoŋgiŋ ehuc mu binaŋ mâretec ejumbieŋ.

²²Eme Paulo e Areo dâŋtomao ra domahuc ŋic ʒiŋuc jazawec: “Ateŋ haeonec ŋicbureŋ, no fuŋne‐ŋeŋic ʒiŋuc honekopac, ŋoŋe nemu bocjaha jaŋere araŋ baeŋgopieŋ.

²³No hae‐ŋeŋicko rac warec ehuc nemuɋâŋfâc‐ŋeŋic honec‐jopaku alata mocko qâreŋ ʒiŋuc fome wosepac: ‘Kecʒi nemu furune mocte biŋe.’ Eme nemu furune, mi manahuc kiŋaŋ qacneeŋgopieŋ, Anutu hâcne, ere fuŋne ŋazape mananiŋ.

²⁴Anutu e mâreŋ bâfuarâ fainao wiac sasawa râe‐fârewec, eki hâcne sambâŋ â mâreŋ irec rune.

²⁵E ufuŋ ŋicmezi bakicne ira ŋeŋe juju mi eekac, erâ wâc wiac moc basame ŋiczi gie bacnehuc wiac bâbâfuacne mi fokac. I aricne, ekizia ŋic nâŋâc juju â mâro â wiac sasawa nâre‐fâreekac.

²⁶Erâ ŋic ukicne mocjaha bâfuarâ mume eraonec mâreŋ sâc ŋic gurune gurune fua rambeŋ. Erâ fuarâ juranaŋte dameŋ â gaŋ rukec i ekizia munârewec.

²⁷Erâ i maŋnâŋeczi basac qasac eraku Anutu e jahacne bâfuanaŋte manasuhuc iŋuc ewec. E ʒoricko mâcne, ŋondeŋ‐nâŋecko ŋic sâcnâporâ juekac.

²⁸‘Nâŋâc ere jujumaŋko juhuc wiac ebac eeŋgopeneŋ.’ Ŋoŋere mamana ŋic gâcnezi wâc ʒiŋuc mumbiŋ: ‘Nâŋâc Anuturaonec fuakicne.’

²⁹Eme ŋic jaŋe maŋjeŋicte erâ gol me siliwa me qânâzi ɋâŋ qâqâtâc ba eric eeŋgopieŋ, ine Anuturaonec fuakicne nâŋâc Anuture manapene irec sâc mi ezejec.