Aposolo Jaŋere Binaŋ 15:30-40

³⁰Eme kikefuŋ jaŋe ŋic i hâcne jaza mâzoc ejarepie rambiŋ. Raku Antiokia haeo fisirâ opâ ruac guru hetumaŋ‐joparâ papia jarembiŋ.

³¹Jarepie wose manac erâ âgodâŋ qâreŋke‐jarembiŋ irec bujeŋic biaŋkewec.

³²Eme Juda â Sila jahe porofete jupiczi dâŋ bocjaha muhuc mu âkeriŋ ejarerâ mitio dopec‐jopapic.

³³Eme jaŋehec juju dameŋ i tarame neŋgocfâc‐jekic jaŋerao risienicte bubiaŋko râe mâzoc ejactembiŋ.

³⁴Sila e ine jaŋerao juocte muwec.

³⁵Paulo â Banaba jahe Antiokia haeo ʒuhuckerâ jupic. Ehuc mitiŋic gâcne jaŋehec babafic erâ Wofuŋte dâŋ ŋic jaza qazuc embiŋ.

³⁶Juku Paulozi Banaba ʒiŋuc âzâcnewec: “Nâhâc miti kiŋaŋ rahuc Wofuŋte dâŋ mupere hae sâc âgofâc‐nâhec fuambiŋ jaŋe weniŋuc juŋgopieŋ i ra hone manac ejarezeperec.”

³⁷Iŋuc mume Banaba e Johane Mareko mâmâc raniŋte muwec.

³⁸Eme Mareko e mârâcko jahehec raku Pamfilia mâreŋko gie furunao fisirâ behec‐jofarâ risiewecte Paulozi ehec raniŋte maname mi sâckewec.

³⁹Ehuc Banabahec mu qaqatarac sanaŋne eku râwiŋnepic. Râwiŋnehuc Banabazi Mareko jowame ra wokeo ferâ Kipiro nucko rapic.

⁴⁰Paulo e ine Sila rowosâeme opâ ruac jaŋe Wofuŋte jauŋko râec‐jofahuc mâzoc‐jofapie rapic.