Aposolo Jaŋere Binaŋ 13:21-42

²¹Eme ŋicwofuŋte mupie Anutuzi Benjamiŋte qâricfâc jaŋeraonec Kisi ŋokâ‐ticne Saulo âkendâŋne‐jareme jara 40 micne bajarehuc juwec.

²²Eme e bârârierâ Dawidi ŋicwofuŋ‐jeŋic âkendâŋnewec. Erâ ere dâŋ ʒiŋuc muwec: ‘No Isaire ŋokâ Dawidi ere maŋnane sâckeme hone wosâepo, eki hâcne mupe rereŋ‐nane juocmu.’

²³Eme Dawidi qâricfâc‐ticne jaŋeraonec Israe ŋic nâŋâcne bâbâpiaŋ moc fuaocte biŋedâŋ mukicne i fârinehec eocte Anutuzi mume Jesu hâcne fuawec.

²⁴Erâ ŋicŋondeŋko fua tâcneocte qanaŋ Johanezi Israe ŋic sasawa maŋjeŋic bârisierâ Miti Opâ ruaniŋte jazawec.

²⁵Erâ Johane e hata mucnekicne i âte tarahuc ŋic ʒiŋuc jazawec: ‘E muhuc munareeŋgopieŋ ŋic e no aricne. E jahacne ʒâhec warehuc jukac; e sâko no iŋucnezi mafahe‐ticne decnepe mi sâckeocmu.’

²⁶“Qomâfâc‐nane Abrahamte qâricfâc ŋoŋe, erâ gâcne Anutu araŋ bacneeŋgopieŋ, mupe mananiŋ: Bâbâpiaŋ irec dâŋ i nâŋâcnao râekicne.

²⁷Jerusalem ŋic fekicne wahakicne jaŋe Jesu mi ʒâŋitahuc ʒikao feocte mutaracnembiŋ. Jaŋe iŋuc epie porofete jaŋere findaŋdâŋ sabata hombaŋ sâc wose manac eeŋgopeneŋ i deŋkewec.

²⁸Jaŋe Jesure kiŋ basa‐bipiehuc sifu Pilato qizec qacnepie qâhâmowec.

²⁹Eme mitio mukicne sâc i etaracnerâ maripoŋkonec batararâ ʒâŋeruŋ hawecko râembiŋ.

³⁰Eme Anutuzi hâmockonec bâqâreme faharewec.

³¹Erâ ehec Galilaia mâreŋkonec Jerusalem haeo mâmâc rambiŋ jaŋe ʒoaŋ gie bapa bocjaha fua‐jarewec. Fua‐jareme honembiŋ jaŋe ine biŋe mumufâc‐ticne embiŋ juŋgopieŋ.

³²Eme mimiŋnefâc‐nâŋec wiac biŋe qajarekicne

³³i Anutuzi Jesu bâqâreme qâricfâc‐jeŋic nâŋâcnao fârinehec ewec, eme irec bubiaŋ dâŋ ŋazaeŋgopeneŋ. Irec hâcne Miti Mânec namba 2 ira dâŋ ʒiŋuc qâreŋkekicne fokac: ‘Go hâcne Ŋokâ‐nane, no miŋecgac bâfuacgukopac.’

³⁴Jesu bâqâreme faharewec e ʒâhec hâhâmo i mocwâc mi bâfuaocmu, irec Anutuzi dâŋ kecʒiŋuc muwec: ‘No Dawidi biŋe qacnepo irec fârine fofo sanaŋ i hâcne tahacke‐ŋarepemu.’

³⁵Erâ Miti Mânec mocko dâŋ ʒiŋuc fokac: ‘Go Tiriŋicge mi behetec gârecke ʒaŋ eocmu.’

³⁶Dawidire manaeŋgopeneŋ, e Anutuzi gie mucnewec i ŋicfâc‐ticne jaŋerao batararâ hâmowec. Hâmome mimi apafâc‐ticne jaŋerao râepie gârecke ʒaŋ ewec.

³⁷Â Anutuzi bâqârewec e ine gârecke ʒaŋticne tâmiric.

³⁸“Qomâfâc‐nane, ŋazape mananiŋ. Sâqocne bâbâtâmire i ŋic eki hâcne bâfuawecte irec dâŋzi maic‐ŋopakac.

³⁹Mosere sâcmutâc dâŋzi kiŋŋeŋic guriŋkeocte eipiewec, Jesurao siŋkepie ine sâcne bârârie‐ŋareocmu.

⁴⁰Porofete jaŋerao dâŋ ʒiŋuc fokac i ŋoŋerao sanaŋkezacte uŋ ŋazakopac:

⁴¹‘Oi, miti qiqikiŋ, ŋoŋe wareckerâ omaenʒepieŋ; no ŋoŋerao gie fuŋmoc bapemu; biŋene manarâ manapie mi bapane eocmu.’”

⁴²Eme Paulo â Banaba jahe mitifickonec wahapire ŋic jaŋe sabata hombaŋ mocko dâŋ irecteaŋ jazanicte mumbiŋ.