Aposol nup meme 3:8-26

⁸Köhöigetka wahöta luhuba yetpuk jöwöwöl jikenöŋ öŋgöba miaŋgöreŋ anda kaba sereŋsereŋ unduba Anutu möpöseiyök.

⁹Mewö anda kaba Anutu möpöseim waŋgiiga ambazip kambu pakpak yeŋön mi eket.

¹⁰Mi eka kewö jiget, “Azi ki kalem waŋgimegöra jikegö kiripo Naŋgu Eksihimŋambukö kösutŋe tata uleta malöhi, mönö mia.” Mewö jiba möt waŋgiba “Sileŋe wani yuaia asuhuzapto?” jiba auruba nemböŋini teköi welipköget. Mewö.

¹¹Welipkögetka ulet azi miaŋön sundan Pitö Jon yetpuk mohotŋe anda kaiga ambazip kambu körek pakpak yeŋön ösumŋinan kösutŋine kaba jöwöwöl jikegö tohoŋ uruŋe öŋgöba kiŋ Solomongö sombem söranŋambuknöŋ tokoba kinda ehiget.

¹²Mewö ehigetka Pitönöŋ eŋgeka könahiba kewö jii mötket, “O Israel alaurupni, iŋini mönö wanigöra yuai ki eka auruze? Wanigöra niri uba netkehize? Azi kiaŋön ölöwaka köna anda kazawi, mi mönö netkö ösumnöŋ me Anutugö Buŋaŋe pitirik maljiraŋgöra aka qahö. Mewö kude mötmörime.

¹³Nanine ambösakonini Abraham, Aisak aka Jeikob yeŋgö bem Anutunöŋ mönö Nahönŋi Jisös asakmararaŋ waŋgiiga jitŋememeŋi öŋgöŋgöŋi ahiga ölŋi asuhuiga ekze. Iŋini Jisös mi memba galöm yeŋgö böröŋine algetka premiö Pailötnöŋ pösatmamgö keuŋi jöhöba jiyökmö, eŋön Jisös mi yaŋgö jeŋe qaŋ köla andö qem waŋgiget.

¹⁴“Iŋini azi diŋdiŋi aka sarakŋi mi andö qem waŋgiba azi qeqe azi kun pösatmapkö kapaŋ köla qeta qesiget.

¹⁵Mewö qeta qesiba mewö miaŋön malmalgö Toŋan kömumapkö keuŋi jigetka kömuyök. Kömuyökmö, Anutunöŋ i mem guliiga kömupnöhök wahörök. Netkön mi jeninan eka naŋgöba jiba yaŋgö dangunu ewö kinjin.

¹⁶Mewö kinda Jisösgö qetŋi möt narim waŋgiba maljit. Azi ki eka möt waŋgizei, mi mönö qet miaŋgö ösumŋan mem köhöiiga kinja. Jisösnöŋ sölölöhöm netkii mötnaripniran asuhui miaŋgö qakŋe kinda jim kutuziga köna gwakötŋan ölöwak teköiga iŋini körek mi ekze.

¹⁷“O alaurupni! Jisös kömumamgö kapaŋ kölgeri, eŋön mi mönö gukmaulem qakŋe aket, mi mötzal. Nanŋini aka galömurupŋinan mewöyök yuai ak waŋgigeri, miaŋgö könaŋi kude möt kutuba laŋ aket.

¹⁸Mewö aketmö, miaŋgö likepŋi Anutunöŋ kewö ahök: Anutunöŋ keuŋi mönöwök kezapqetok ambazipurupŋi pakpak yeŋgö jitŋine aliga qeljiŋe kewö jiba ohoget, ‘Anutugö Amötqeqe Toŋi Kraistnöŋ mönö sihimbölö mötma.’ Miaŋgöra iŋini mewö aketka Anutugö keu miaŋön mönö mewö ölŋambuk ahök.

¹⁹Miaŋgöra mönö uruŋini meleŋda Anutugöreŋ liliŋgöba kagetka siŋgisöndokŋini kutuba saŋgoŋma.

²⁰“Anutunöŋ oyaeŋkoyaeŋ Toŋi akza. Iŋini öne laŋ malbepuköra Anutunöŋ Jisös qeljiŋe möwölöhöyök. Miaŋgöra iŋini mönö uruŋini meleŋgetka Amötqeqe Toŋi Kraist melaiiga eŋgöreŋ kaiga yambuk qekötahögetka malmalŋinan guliiga oyaeŋkoyaeŋ nalöŋinan kam kuŋguma.

²¹Anutunöŋ möpŋaŋgö möpŋe könahiba keuŋi kezapqetok ambazipurupŋi tök-kutukutuŋi pakpak yeŋgö jitŋine aliga qeljiŋe kewö jiba malget, ‘Anutunöŋ Amötqeqe Toŋi aŋgön köl waŋgii Suep mire tata mali yuai pakpak kunbuk areŋgöba kölöŋaimawi, mönö nalö miaŋgöreŋök melaiiga Suep mosöta etma.’ Jisösnöŋ keu miaŋgö dop eta neŋgöreŋ kayök.

²²Mosesnöŋ kewö jii mötket, ‘Kembu Anutunöŋ Juda kambu eŋgö sutŋineyök kezapqetok azi kun mem guliiga wahöta Moses ni ewö akŋa. Yaŋön ipŋina kinda eŋgöra keu jimawi, mönö mi pakpak kezap ala möta tem köla malme!

²³Kunŋan kun kezapqetok azi miaŋgö keuŋi qahö tem kölmawi, Anutugö könagesö eŋön mönö yaŋgö keuŋi jim teköba ayuhum waŋgime.’

²⁴Kezapqetok ambazip Samuelgöreŋök könahiba kota keu jigeri, mieŋön mönö körekmakörek mewöyök kezapqetok keu nalö kewöŋe ölŋambuk akzawi, mia qeljiŋe jiba malget.

²⁵Anutunöŋ ambösakonurupnini yembuk jöhöjöhö areŋi aka Abrahamgöra kewö jii mörök, ‘Göhö gwölönarökurupki yeŋgöreŋök kunŋan ahuba wahötmawi, Anutu nöŋön mönö yaŋgöra aka gölmegö ambazip kambuŋi kambuŋi pakpak kötuetköm eŋgibi oyaeŋkoyaeŋ akŋe.’ Anutunöŋ jöhöjöhö keuŋi indeli kezapqetok ambazipnöŋ mi toroqeba jim köhöiba malgeri, mi mönö eŋgöra aka ali ahöza.

²⁶Anutunöŋ Nahönŋi mem gulii wahöri kötuetköm eŋgimapköra melaiiga mutuhök eŋgöreŋ erök. Miaŋgöra mönö dölki uruŋini meleŋda nanŋik nanŋik malmalŋinaŋgö köna bölöŋi andö qeme. Mewö aka oyaeŋkoyaeŋ akŋe.” Mewö jiyök.