Aposolo Jaŋere Binaŋ 3:8-26

⁸erâ jahehec mâmâc taha ufuŋko fembiŋ, erâ hata juju‐ticnere kiwac qawac ehuc Anutu muteŋkewec.

⁹Eme ŋic sasawa jaŋe hata jume â Anutu muteŋkeme honembiŋ.

¹⁰Ehuc ʒâŋitarâ mumbiŋ, “Taha ufuŋte Motâcbiaŋko bâmec wiacte numu‐nârehuc ŋeekac ine hâcne.” Erâ biaŋkewec irec hone fâfârerâ mâretec seckembiŋ.

¹¹Eme Petoro â Johane jaherao qohotame ŋic mâmâc sasawa taha ufuŋ maŋne moc ʒâŋene Salomo ira jaherao tumaŋne‐fârehuc me kirâ domambiŋ.

¹²Iŋuc epie Petorozi honec‐joparâ ŋic dâŋ ʒiŋuc jazawec: “Israe ŋicbureŋ, ŋoŋe wemocte ŋic ʒirec hone warec boc enâctehuc domaŋgopieŋ? Wiac nâhe nâhâcne mitire me tâpirire e hata juju‐ticne bâfuacnekoperec me?

¹³Aricne, Abraham â Isaka â Jakobo jaŋere Anutu, mimiŋnefâc‐nâŋec jaŋere Anutu, eki hâcne kiŋaŋŋic‐ticne Jesu ere Wofuŋ qâreŋ ŋic kecʒirec faio bâfuame honeŋgopieŋ. Ŋoŋe ine e qaisockerâ qâpuc jaŋerao râembiŋ. Ehame Pilatozi firuezo mume ŋoŋe qikiŋnembiŋ.

¹⁴Ine hâcne Maŋɋaɋac â Tiŋne rune e qikiŋnehuc ʒika qaqaŋic akicke‐ŋareocte mu bâuruec ecnembiŋ.

¹⁵Ehuc jujure Micne bapa qambiŋ. Qapie Anutuzi bâɋâreme hâmockonec fahareme ʒâŋe fâri‐nâŋeczi qame honembeŋ.

¹⁶Eme hone manac ecneeŋgopieŋ ŋic kecʒi e Jesu ʒâŋe‐ticne manasiŋkepene ʒâŋe‐ticnere tâpirizi bâpiaŋkeme sahac ɋiɋic eme hone‐fâreŋgopieŋ.

¹⁷Erâ qomâfâc‐nane, no manakopac, ŋoŋe â micne bapafâc‐ŋeŋic ŋoŋe kâuc bahuc iŋuc embiŋ.

¹⁸Iŋuc epie Anutu e Kristo ʒâic manaku hâmoocte irec dâŋ porofete sasawa jaŋere micko râeme mu qâreŋ embiŋ i hâcne sanaŋkewec.

¹⁹Irec ŋoŋe maŋŋeŋic bârisierâ juju raŋɋa‐ŋeŋic râpeckepie kiŋŋeŋic tâmirezejec. Eme Wofuŋte maio nanaŋ ʒurec ʒurec juju irec dameŋ maicke‐ŋarezejec.

²⁰Erâ wâc Kristo‐ŋeŋic baʒawie‐ŋarewec, Jesu hâcne, sore‐ŋarezejec.

²¹Ʒi ine Jesu e sambâŋzi foŋkeme jukuhame wiac sasawa Anutuzi mârâc jaha jâmbâŋ porofetefâc‐ticne micjeŋicko râeme mumbiŋ i fâri fideteŋ eocte dameŋne maickeocmu.

²²Mose e dâŋ kecʒiŋuc muwec: ‘Wofuŋ Anutu e qomâfâc‐ŋeŋic jaŋere ŋondeŋkonec porofete moc no iŋucne bâfua‐ŋareme dâŋ ŋazame sâc mananʒepieŋ.

²³Eme moc e dâŋticne qikiŋneme e qarâ qârârâŋnenʒepieŋ.’

²⁴Erâ porofete gâcne Samue jume juwarembiŋ jaŋe iŋuc jaha dameŋ ʒirec dâŋ mu qâreŋ efârembiŋ.

²⁵Porofete jumbiŋ jaŋere ɋâricfâc ŋoŋe, erâ Anutuzi mimiŋnefâc‐ŋeŋic jaŋehec ʒâʒâfic ewec, ʒâʒâfic irec rune ŋoŋe jaha wâc. Ʒâʒâfic i Abraham ʒiŋuc âzâcnehuc bâfuawec: No ɋâricfâcge jambuŋ‐jopape jambuŋ izi mâreŋne mâreŋne ŋic sâcjopa‐fârezejec.’

²⁶Ŋoŋere hâcne Anutuzi qanaŋ manasurâ Ŋokâ‐ticne soreme waha fuawec, i ŋoŋe sasawa sindaŋ hata‐ŋeŋickonec bârisiec‐ŋopahuc jambuŋ‐ŋopaocte iŋuc hâcne ewec.”