ZĨRINƆ 3:8-26

⁸À vĩ̀ à zɛ̀, ben à nà táa'onaa. À gɛ̃̀ńyo Luda ua, èe táa oo èe vĩvĩi èe Luda sáabu kpaa.

⁹Baade píngi à è èe táa oo èe Luda sáabu kpaa,

¹⁰ben aↄ̃ à dↄ̃̀ baakɛri kɛ̀ ègↄ̃ vɛ̃ɛ Luda ua Gãnu Maaan ũ, ben yã kɛ̀ à à lè ń kũ gbãa à bↄ̀ ń saɛ.

¹¹Lán à na Pita kↄ̃n Yohanaoa nà guu kɛ̀ wè be Sulemanu gbàdaan, ben baade píngi e gɛ̃ɛ ń kiia, zaakɛ yã pì bↄ̀ ń saɛmɛ.

¹²Kɛ̀ Pita gbɛ̃nↄ è, à bèńnɛ: Isarailinↄ, bↄ́yãnzin yã pì bↄ̀ a saɛzi? Bↄ́yãnzin a wɛ́ɛ fĩ̀fĩwa lɛzi? Ée daa wa zĩnda gbãaa kesↄ̃ wa ludayãdana bé à tò gbɛ̃ kɛ̀ táa ò gwɛɛ?

¹³Wa dezi káakunↄ Ibraĩ kↄ̃n Isaakuo kↄ̃n Yakubuo Luda gwena kpà a zĩkɛri Yesua. Apinↄ sↄ̃ a à kpà gbãadeenↄa a bↄ à kpɛɛ Pilati kɛ̀ zɛ̀ kↄ̃n à gbarɛnao aɛ.

¹⁴A bↄ Luda gbɛ̃ maaa kɛ̀ à kú adona pì kpɛɛ, ben a wɛ́ɛ kɛ̀ Pilatia à gbɛ̃dɛri gbarɛare.

¹⁵A Wɛ̃̀ndikpammari dɛ̀, ben Luda à fɛ̀ɛ bↄna gaan. À sèedadeenↄn wa ũ.

¹⁶Yesunaanɛkɛna bé à tò gↄ̃gbɛ̃ kɛ̀ á à dↄ̃ ée à gwaa kɛ̀ kɛ̃̀kↄ̃a Yesu tↄ́ gbãa yãnzi. Yesunaanɛkɛna bé à à gbà aafia a píngi wáa.

¹⁷Tia ma gbɛ̃nↄ, má dↄ̃ kɛ̀ apinↄ kↄ̃n a gbãadeenↄ yã kɛ̀ á kɛ̀ nɛ́ wɛ́ɛsia yãmɛ.

¹⁸Luda dↄ̀ annabinↄnɛ aɛ, ben aↄ̃ gĩakɛ wà ò ń píngi kɛ̀ Mɛsaya é wɛ́ɛtãmma e, bensↄ̃ à kɛ̀ lɛ.

¹⁹Bee yãnzi à nↄ̀sɛ liɛ à aɛ dↄ Ludaa, a durunnↄ é kɛ̃awa, lɛ à mↄ́are nↄ̀sɛkpaɛnao

²⁰à Yesu kɛ̀ à gĩakɛ à à dìɛare Mɛsaya ũu pì zĩawa.

²¹Séde àgↄ̃ kú musu gĩa ai gurↄↄ kɛ̀ Luda é pↄ́ píngi kɛkɛ à kɛ dufu, lán à dà a annabinↄnɛ nà aↄ̃ↄ ò zaa káaku.

²²Musa bè, Dii a Luda é a gbɛ̃ke sɛ́ annabi ũ lán a bà. À yã kɛ̀ eé oaree ma píngi.

²³Gbɛ̃ kɛ̀ èe annabi pì yã ma sↄ̃ro, Luda é adee bↄ a tɛ́ à à dɛ.

²⁴Annabi kɛ̀ aↄ̃ Luda yã ònↄ píngi naana Samuɛlia gurↄↄ kɛ̀ki baaru kpà.

²⁵Yã kɛ̀ annabi pìnↄↄ ò kↄ̃n Luda bà kɛ̀ kú kↄ̃n a dezi káakunↄo gↄ̃̀ a pↄ́ ũ, lán à ò Ibraĩnɛ nà à bè é aubarika da anduna bori píngin à borii gãzĩ.

²⁶Kɛ̀ Luda a zĩkɛri pì dìɛ, à à zĩ̀awa káaku, lɛ à aubarika daagu, à a baade kpɛɛ li a yãzaakɛnanↄnɛ.