Aposel 3:8-26

⁸Ra i katutur lakit mut, ma i wanan maragom. Detul ruk ubalan in noworo ina rumu na etabor, ra i wan, ma i sirsirok ra i watung ulabo pas o God.

⁹A taro rop det tama i lena i wanan, ma i watung ulabo pas o God,

¹⁰ra det kisin doko una utna ri di pami uni, ra det tasmani lena i kut ra i kiskis, ma i ser saring utna nisan a Wakak na Matansako.

¹¹A musano ri i pam ukai pas o Pita ma o Jon, ra a taro rop det kisin doko ma det kalabor torom detul una parada ina rumu na etabor, ra di watungi nama Parada anun o Solomon.

¹²O Pita i tama det, ra i watungi tandet lena, “Mot a taro Israel, ilai ra mot kisin una utna ri, ra mot tama dekdek mir? Pepetlai, mot nuki lena mir ulangolango pas a musano ri nama dekdeki mir ut? Awu! Mot nuki lena mir ulangolango pasi uni mir tokodos umatan o God? Awu!

¹³O God ut i pami. A God anun o Abaram, a God anun o Aisak ma a God anun o Jekop, a God anun a kum tumtubun dat tagun numugu, i ulabo tar a risan o Iesu anun a tultul. Mot pitar tari sur din um doko i, ma mot ipul ru i kut umatan o Pailat, ra i nem na palos ru i.

¹⁴Mot ipul ru a Tasur na Musano ma a Tene Tokodos, ra mot sasaring sur din palos tar a tene umum doko a taro torom mot.

¹⁵Ra mot um doko ru o Iesu, i ra a kibin a nilaun, ikut o God i ukatutur melet pasi gusun a minat. Ma met, met tama i ma met wasiso talapor uni.

¹⁶Una nurnur una risan o Iesu, di ulangolango pas a musano ri, ra mot tama i ma mot tasmani. A nurnur una risan o Iesu i ulangolango pas a musano ri umatamot rop.

¹⁷“A kum tistising, a tasmani lena, mot tomo nam anumot a kum mugumugu kai mot pam orosi kut a utna ri un o Iesu, ka mot tasman asau ra mot pami.

¹⁸Ikut una kum utna ri mot pami, o God i pam sot pas a kum utna ra i sa watung mugu tari nama wasiso anun a kum poropet rop, lena anun a Karisito in mat.

¹⁹Mot in nukpukus, ma mot in nan torom o God, sur in unus ru anumot a kum sakino petutna,

²⁰sur mot in taramo a wakak na nilaun ra a Labino in pitari. Ma in tulu ru a Karisito torom mot, o Iesu i ra o God i sa pilok pasi.

²¹In kis sapat netes una langit, tuk una bung ra o God in umatok melet a kum utna rop, ra i sa watung tari numugu utmakai nama wasiso anun a kum tasur na poropet anunu.

²²O Moses i watungi lena, ‘A Labino anumot a God, in tulu ru tu poropet elar nam iau, tagun a kum tumtubu mot ut. Mot in longoro a kum utna rop ra in watungi tamot.

²³Ma osi det ra ka det longoro a poropet ra, din um doko ru det, ra awu mo sur det a taro anun o God.’

²⁴“A kum poropet rop, ra det wasiso puaso una wasiso anun o God, turpasi un o Samuel, ma det ra det wanpat numur tano, det wasiso mugu una kum bung ri.

²⁵A wasiso anun a kum poropet, anumot, ma a kunubus kai, ra o God i uliliman tari torom a kum tumtubu mot tagun numugu. I watungi torom o Abaram lena, ‘Un o tubum, an udan a kum kamkabo taro rop una rakrakon bual.’

²⁶O God i tulu ru anun a Tultul, i tulu mugu ru i torom mot a taro Juda, sur in ben pukus pas mot taktakai gusun anumot a kum sakino petutna, sur mot in dan.”