Aposol 8:13-22

¹³Ma bade Saimon ivi tumaghana ma ibabataito. Ma Piripo iwagiyei ma ikitai da bera ma matakira ghamaghamasi iberaberai na inota kavakavai.

¹⁴Aposol Jerusalem kamonai ivi yanei da Sameriya damsi God vonana ivi tumaghanei na Pita da Jon ivonatawesi kurisi.

¹⁵Ivi ruwa inekiibau ku Sameriya na inipowana vitumaghana damsi vusi kubiisi da Kanuma Vovokaravina ita towatepanisi,

¹⁶iyamna Bada Yesu avanai kava ibabataito ma Kanuma Vovokaravina ke ita viiya.

¹⁷Ma Pita da Jon imasi ku tepasi iterei na Kanuma Vovokaravina itowatepanisi.

¹⁸Ma Saimon ikitai ikikava aposol imasi wawaya ku tepasi iterei da Kanuma Vovokaravina itowatepanisi na mane ivororona kurisi da nani rewapanina ita gimari.

¹⁹Ma ivonesi bo, “Taku bade rewapana kovereku da iyavo kava imaku ku tepasi ana tereterei na Kanuma Vovokaravina ina viiya.”

²⁰Ma Pita ivonapotei bo, “Tam ma am mane yavata ku keyama karata makamakii nonowina kona nae! Ikikava kunotai da God ina puyo kuta gimari?

²¹Nuwanuwam didibarina God ku matana, tuna kubiine weni bigana kamonai ke kuna biga!

²²Am bera berona kevi nuwapoyei ma kemiirikupukuputei. Ma Bada kurina kenipowana da mikeda am nota berona ina notatawei.