Annabi Abadiyasi 1

1

¹Annabi Abadiyasi xa laamatunyi nan ya. Marigi Alatala xa masenyi Edon ɲama xa fe ra. Muxu bara xibaaru nde mɛ kelife Alatala ma. Mixi nde xɛɛxi ɲamanɛe ma yi yaamari ra: «Wo keli! Won xa siga Edon gerede!»

²«N i magoroma nɛ sie tagi, i fa lu yaagi kui.

³I xa yɛtɛ igboya bara i madaxu, i tan naxan sabatixi fɔnmɛe ra geyae kɔn na. I a falama, ‹Nde nɔma n nagorode lanbanyi?›

⁴Hali i te koore ma alɔ sɛgɛ, i sa i tɛɛ sa tunbuie ya ma, n tan i ragoroma nɛ han bɔxi.» Alatala xa masenyi nan na ki.

⁵«Xa muɲɛtie soma i xɔnyi kɔɛ ra, e mu e waxɔnse tongoma xɛ e hayi na naxan ma? Xa sansi xabɛe fama i xɔnyi, e mu tɔnsɔɛ ndee luma xɛ naa?

⁶Kɔnɔ Esayu bɔnsɔɛ tan, e harige birin bama nɛ e yi, e xa naafuli nɔxunxi tongoma nɛ.

⁷Wo saata tongo booree wo kerima nɛ wo xa bɔxi ma. Wo mali booree wo yanfama nɛ, wo nun naxee nu wo dɛgema lenge keren kui, nee gantanyi tema nɛ wo ya ra.»

⁸Alatala xa masenyi nan ya: «N lɔnnilae sɔntɔma nɛ Edon bɔxi ma na lɔxɔɛ, n xaxilimae faxama nɛ Edon benba Esayu xa geyae fari.

⁹E benba Teman xa sɔɔrie gaaxuma nɛ, e birin fa sɔntɔ Esayu xa geya longori.

¹⁰Wo na gbaloe sɔtɔma nɛ wo xa fe ɲaaxi ma wo naxan nabaxi wo ngaxakerenyi Yaxuba bɔnsɔɛ ra. Yaagi dusuma nɛ wo xun na, wo fa ɲɔn abadan.

¹¹Na lɔxɔɛ e yaxuie to e xa bannaya xanin, e na raba nɛ wo ya xɔri. E to so e xa taa kui, e xa Darisalamu findi e gbe ra, wo nu saxi e yaxuie dɛ ra.

¹²Wo mu lan wo xa ɲɛlɛxin wo ngaxakerenyie xa tɔɔrɛ ra. Wo mu lan wo xa sɛɛwa Yuda bɔnsɔɛ xa gbaloe ra. Wo mu lan wo xa wo yɛtɛ igbo e xa tɔɔrɛ kui.

¹³Wo mu lan wo xa so n ma ɲama xa taa kui a kasarɛ lɔxɔɛ. Wo mu lan wo xa yo e ma e kasarɛ lɔxɔɛ. Wo mu lan wo xa e harige ba e yi e kasarɛ lɔxɔɛ.

¹⁴Wo mu lan wo xa wo nɔxun kira dɛ ra e xa mixie faxafe ra naxee e gixi gere ma. Wo mu lan wo xa e sa e yaxuie sagoe e xa kasarɛ lɔxɔɛ.»

¹⁵«Alatala xa kiiti lɔxɔɛ na fafe si birin bɛ. I naxan naba, na nan nabama i fan na. I xa wali sare gbilenma nɛ i ma.

¹⁶Wo n ma xɔnɛ naxan sɔtɔxi n ma geya sɛniyɛnxi fari, sie fan fama nɛ na mɔɔli sɔtɔde han e bɔnsɔɛ ɲɔn.

¹⁷Kɔnɔ mixi fama kisi sɔtɔde Siyoni geya fari. Mɛnni findima yire sɛniyɛnxi nan na. Yaxuba bɔnsɔɛ fama nɛ a kɛ masɔtɔde.

¹⁸Yaxuba bɔnsɔɛ nun Yusufu bɔnsɔɛ luma nɛ alɔ tɛ, naxan Esayu bɔnsɔɛ ganma alɔ sɛxɛ. Mixi yo mu kisima Esayu bɔnsɔɛ ya ma.» Alatala xa masenyi nan na ki.

¹⁹«Negewikae Esayu xa geyae suxuma nɛ, Sefelakae Filisitakae xa bɔxi tongoma nɛ, a nun Efirami nun Samari bɔxie. Bunyamin bɔnsɔɛ fan Galadi bɔxi sɔtɔma nɛ.

²⁰Yi Isirayilaka naxee gbilen e fama nɛ nɔde Kanaan bɔxi ra han Sarepeta. Darisalamukae naxee gbilen Sefarada, nee fama nɛ Negewi taae suxude.

²¹Mixi naxee geenima nu fama nɛ tede Siyoni geya fari, e xa Esayu xa geyae yamari. Mangɛya luma Alatala nan bɛ.»