Opataia 1

1

¹Iei osunien Opataia ren met Kot ewe Samol mi Lapalap a apasa usun Etom. Sa rong ekewe pworaus seni ewe Samol mi Lapalap. Eman chon künö a fen titila lemenen ekewe mwü o apasa, “Oupwe amolakemiitä. Ousipwe maun ngeni Etom.”

²Ewe Samol mi Lapalap a üreni Etom, “Üpwe akisuketiu me lein ekewe mwü. Kopwe fokun küna koput.

³Lamalamtekian lelukom a atupuketä, en ewe mi nom lon ekewe föimw, ka nom won ekewe leni mi tekia o ekieki lon lelukom, ‘Iö epwe tongeni aturueitiu lepwül?’

⁴Ika mwo ka föri imwom wilitekia usun eman ikel a fas won leni tekia, pwe ka usun chök nge ka nom lein ekewe fü, nge üpwe chök aturuketiu me ikenan. Ngang ewe Samol mi Lapalap üa kapas.

⁵Iwe, are chon solä me chon angei pisek fän pöchökül repwe tori imwom lepwin, repwe chök angei ükükün mine ra mochen. Pwal ika chon ionifengeni föün irän wain repwe toruk, repwe pwal likiti ekoch föün. Nge chon oputom ra fokun apöpökowu.

⁶Ra silini än mwirimwirin Esau lenien iseis o soläni ar pisek mi aüchea.

⁷Iwe, peliom meinisin ra atupuketä o asuukela seni fanüom. Ekewe chon pwipwi ngonuk ra maun ngonuk, nge chienom kewe ka lükuur ra anomu eu sär fomw. Ra apasa usum, ‘Ifa chök an tipachem?’

⁸Lon ewe ränin, lupwen üpwe apwüngü chon Etom, üpwe arosala nöür kewe soutipachem o awesi ar mirit.

⁹Iwe, ekewe sounfiu mi pwora seni Teman repwe rükö, nge aramas meinisin lon Etom repwe kärila.

¹⁰Pokiten ewe angangen mwänewüs ka föri ngeni pwiüm kewe mwirimwirin Jakop, kopwe kärila o itengau tori feilfeilachök.

¹¹Lon ewe ränin, lupwen chon ekis ra tolong lon asamalapen Jerusalem, en ka chök ütä. Lupwen ra uwala wöün pwe repwe üttüt won o ineti lefiler, en ka chök usun eman leir.

¹²Nge en, esap öch om tuneämängau won pwiüm kewe chon Juta lon ränin ar weires, esap öch om meseik wor lon ränin ar feiengau, esap pwal öch om tunesikesik lon ränin ar riaföü.

¹³Esap öch om tolong lon än nei kewe aramas we telinimw, pwe kopwe tuneämängau won ar riaföü o soläni pisekir lon ränin ar feiengau.

¹⁴Esap öch om ütä lepukopuken ekewe al, pwe kopwe turufi ekewe chon Juta mi süla, esap pwal öch om afangamäi ekewe mi chüen manau lon ränin ar riaföü.

¹⁵Iwe, ewe ränin kapwüng a arapoto, lupwen ngang ewe Samol mi Lapalap üpwe apwüngü chon ekewe mwü meinisin. Usun mine en Etom ka föri, iei usun epwe pwal fis ngonuk. Kopwe chök angei chappen om föför.

¹⁶Iwe, usun nei aramas ra ün seni ewe kapen feiengau me won chuki mi pin, iei usun chon ekewe mwü meinisin mi nom ünüküür repwe ün. Repwe ükün o tokorikirik, repwe pwal mochola.”

¹⁷“Nge chokewe mi chüen manau me lein chon Israel repwe nom won ewe chuk Sion. Iwe, ewe chuk epwe eu leni mi pin, nge ekewe mwirimwirin Jakop repwe fanüeni püsin fanüer.

¹⁸Iwe, ekewe mwirimwirin Jakop repwe wewe ngeni eu ekkei, ekewe mwirimwirin Josef repwe wewe ngeni pulopulen ekkei, nge ekewe mwirimwirin Esau repwe wewe ngeni fetilipwas. Repwe arosala ekewe mwirimwirin Esau, pwe esap chüen wor eman epwe manau. Ngang ewe Samol mi Lapalap üa kapas.

¹⁹Iwe, ekewe aramas seni ewe fanü Nekep mi nom ör repwe fanüeni ewe fanü Etom, nge chokewe seni ewe fanü Sefela mi nom lotou repwe fanüeni fanüen chon Filistia. Chon Israel repwe fanüeni ewe fanü Efraim me Samaria, nge aramasen Peniamin repwe fanüeni Kiliat.

²⁰Ekewe sounfiu seni Israel mi oola repwe liwinto o fanüeni Kanaan tori Sarefat, nge ekewe chon oola seni Jerusalem mi nom Sefarat repwe telinimweni ekewe telinimw lon ewe fanü Nekep.

²¹Iwe, ekewe chon pwora seni Jerusalem repwe maun ngeni Etom o nemeni. Nge püsin ewe Samol mi Lapalap epwe king.”