1Obadia e maŋʒâŋe‐ticne raruŋkeme wiac hone manac ewec. Wofuŋ Anutuzi Edomŋic jaŋere dâŋ kecʒiŋuc mukac: Wofuŋ e kiŋaŋŋic‐ticne ŋicne ŋicne jaŋerao soreme rarâ Wofuŋte dâŋ ʒiŋuc jazame manambeŋ: “Ajoc, faharepie Edomŋic jaŋehec qaqac enaŋte fenʒepeneŋ!”
2Wofuŋzi Edom guru âzâcnekac: Manakic, no ŋicne ŋicne jaŋere ŋondeŋko bawahacgupe qaisocgu‐fârenʒepieŋ.
3Maŋfefegezi eatucguwec, qânâ hawecko me tiki botâŋko ŋec juc eekic go maŋgezi ʒiŋuc manasuekic: “Mozi sâcne mâreŋko tuŋnume hupemu?”
4Go tucwipe iŋucne faic jâmbâŋ ferâ jutec muzac, me ficgezi bâpiŋ jaŋere ŋondeŋko ŋeme muzac no sifu irecnec tuŋgupe wahanʒaŋ, Wofuŋ nore dâŋ iŋuc.
5Fiuc roro jaŋe ŋafeo ficgao fisirâ wiac aŋac‐jopaekac sâc roeŋgopieŋ, me waiŋ gie bapa jaŋe waiŋ giegao ferâ hândâŋne ro nusec ehuc gâcne bâtiripie foekac; jei, ʒi ine furu jaha imacgukicne.
6O Esau, jaŋe boreŋ ʒeŋaŋge soŋkekicne i karaŋ bahuc rofârembiŋ.
7Gohec ʒâʒâfic embiŋzi eatucguhuc mâreŋgaonec jâpecgumbiŋ, gohec wama faio jumbiŋ jaŋe sanaŋkerâ qâhucgumbiŋ, â âgofâcge gohec nânâ wirec nâmbiŋzi bitiŋ râe‐garehuc ʒiŋuc mumbiŋ: Mamana tara focnewec i weni?
8Wofuŋzi ʒiŋuc mukac: Jâmbomac, no dameŋ ira Edom mâreŋte ŋic imac‐jopapemu, â maŋɋârâŋhec juju i Esau tiki mâreŋko mupe omaeocmu.
9Temaŋ haeonec ŋic qac momorihec jaŋe bipic tatara ejareocmu, â Esau tiki mâreŋko ʒika qaqa ŋic qâhâmoc‐jopa‐fârepemu.
10Go Jakobore ɋâricfâc, qomâfâcge hâcne, jaŋerao sindaŋ wiac fuŋne fuŋne bâfuameŋte ima bacgupie ʒâŋe biŋege omae‐jâmbâŋkezejec.
11Râsi jaŋe fisirâ mafa wiac‐jeŋic jowac rorâ barambiŋ, â haemaŋko ferâ Jerusalem haere qaŋgec qambiŋ, go dameŋ ira mâc hone qâoma ejaremeŋ, ehuc râsi jaŋere âgo emeŋ.
12Go qomâfâcge jaŋere ʒâic busâqoc dameŋko aŋac ʒeri mi enʒaŋ, â Juda kikefuŋ sisipiric dameŋ‐jeŋicko bubiaŋ mi mananʒaŋ, erâ ʒârâ ʒâpâ faio juhapie mi gâwie‐jarenʒaŋ.
13Go ŋicfâc‐nane jaŋere ʒâic busâqoc dameŋko hae‐jeŋicko ferâ aŋac ʒeri ehuc moneŋ mafa wiac‐jeŋic mi jowac rotec muzac sâckezac.
14Go hata sosohocko domahuc wisezo embiŋ jaŋe aka mi hejaretec muzac sâckezac, â ʒikare nâfocne jaŋe ʒârâ hâriŋ dameŋ‐jeŋicko râsire meo mi râec‐jopatec muzac sâckezac jaha.
15Wofuŋte dameŋzi ŋicne ŋicne maic‐jopakac. Irec go ŋic wiac ejaremeŋ sâc ijaha go egarezo. Go wiac emeŋ izi hâcne ŋerisierâ gahacne faio feocmu.
16Ŋicfâc‐nane ŋoŋe tiri tiki‐naneo weaŋ sicne nâmbiŋ, iŋuc jaha ŋicne ŋicne jaŋe nârâ nâ ehuc maŋjeŋic bibiriwame omae‐fârenʒepieŋ.
17Ŋic tucne jaŋe sisipiriczi riric‐jopaha Zioŋ tikio junʒepieŋ, ehame tikizi tirine erâ ŋezejec. Eme Jakobore kikefuŋ jaŋe mâreŋ‐jeŋic mocwâc rauckenʒepieŋ.
18Jakobo â Josefere kikefuŋ jahe ʒoc iŋucne erâ, ʒoczi jawa ʒâseŋkeekac irec sâc Esaure kikefuŋ ʒâseŋke‐fârepire Esaure ŋic nâfocne moc mi junʒepieŋ. Wofuŋ e iŋuc hâcne muwec.
19Negebe mâreŋko juŋgopieŋ jaŋe Esaure tiki mâreŋ rauckenʒepieŋ, â mâreŋ uruŋnao juŋgopieŋzi Filisa mâreŋ ro rauc enʒepieŋ. Eme Eferaim â Samaria hae mâreŋ i wâc iŋuc jaha jaŋere biŋe eha Benjamiŋte ɋâricfâc jaŋe Gileade mâreŋ ro sakac enʒepieŋ.
20Israe ŋic jaŋere momori guru kâpâcwâruonec waharâ Foinike mâreŋ ro rauc erakupie Zarefati haeo tarazejec, â Jerusalem haeonec kâpâcwâru bacjopa rakicnezi Sefarada mâreŋko juŋgopieŋ jaŋe ine Negebe mâreŋko hae ŋerakac i raucke‐fârenʒepieŋ.
21Israe ŋic ŋezic‐jopakicne jaŋe Zioŋ tikio ferâ Esau tiki mâreŋte guriŋ bapa gie bahuc junʒepieŋ. Ŋicwofuŋte gie izi ine Wofuŋte biŋe ezejec.
