Acts 20:10-22

¹⁰Paul i ḡaira, i matave-tepani ma i rapai ma rava i riwei i pa, “Eḡa ona vinuabola, tauna lawalawaina!”

¹¹Anina ma Paul i ḡae me au numa ma kerisiana maiteni Bada ana amgogona amna i ani ma awari i babani maratom. Ma Paul nai dobuna i netawanei.

¹²Taui laragana lawalawaina i naiei au numa ma rava orai i rauei.

¹³Paul aenei i nae au Assos ma tauai i riwelai da wagei ana nae au Assos da tauna kampa ana vigerui.

¹⁴Ma au Assos a vigerui ma a nae au Miletus

¹⁵Maratomna bonabona Kios au ḡereḡerena a nae. Ma marana i tom au Samos a ḡeta, ma maratom ḡela au Miletus a ḡota.

¹⁶Paul i ḡoei da jijimanina ina nae ma avena ita rui au Ephesus, eḡa ita ḡoei da au Eisia provins ina mae-guratana. Tauna i vipaparana ma mepa da tagotagogina au Jerusalem ina ḡeta muriai da Pentecost torelana.

¹⁷Au Miletus Paul riwa i paritawanei au Ephesus taon kerisiana babadai awari da ita nebelei.

¹⁸Maranai au Ephesus taon i ḡetai ma taui i riwei i pa: O aramanei au lawana menanare maranai vovounai weka au Eisia provins a ḡetai.

¹⁹Mai Jew i ḡoei da ita rau-iviapoapoeleu wate tau a vilamolamona ma ana toutou Bada awarina a vivitaunola.

²⁰O aramanei da maranai God Riwana Aiaina awarimi a raugugulei, riwa aiaina aniaguimi eḡa ata tajijini. Au deba a raraugugula rava maḡamaḡaui au naoi, ma ami au numa a viararamanimi

²¹Riwa bagibagina mai Jew ma Jentail a verei, A riwei da ita rupena ma ita mae-tavirei God awarina ma Iesu ita vitumaḡanei.

²²Ma marina Arua Vivivireina i riweu da ana nae au Jerusalem. Eḡa ata aramanei kampa aiwai awariu ina tupua.