A Umana Kakailai 59:6-17

⁶Dia lilikun na ravian, Dia loalor da ra pap, Ma dia vana vurvurbit ta ra pia na pal.

⁷Ea, a umana lup tinata diat; A umana pakat na vinarubu dia ki ta ra bul na ngie i diat; Tago (dia biti:) To ia na valongore?

⁸Ma u, Luluai, una ga nongone diat, Una ga kulume ra lavur Tematana par.

⁹U ra dekdekigu, ina ki pa u; Tago God kaugu dekdek na pal na bakbakit.

¹⁰Kaugu God na totongo upi iau ma kana varmari. God na tul tar iau ba ina gire ra magit iau mainge ta kaugu lavur ebar.

¹¹Koko una ubu doko diat, kan kaugu tarai diat a valubane; Boina diat a tenten vurvurbit ika ure ra dekdekim; una vaikilik pa diat, Luluai, kaveve ramravit.

¹²Ea, i tup ia ra kaina ta ra ngie i diat! Ea, i tup ia ra tinata na bul na ngie i diat! Boina ba da kinim pa diat ta kadia mangamangana kolakolo, Ma ure ra varvul ma ra vavaongo ba dia vatang ia.

¹³Una vapanie diat ta kaum kulot, una vapanie diat upi koko dia laun mulai. Ma una vaminana diat upi diat a nunure ba God i varkurai pire ra tarai Iakob, Ma i tuk tar ta ra mutuai ra rakarakan a gunagunan. Sela.

¹⁴Ma una tul tar diat ba diat a lilikun na ravian, Boina ba diat a loalor da ra pap, Ma diat a vana vurvurbit ta ra pia na pal.

¹⁵Diat a vana vurvurbit upi ta magit, Ma diat a ki ra marum bula ona pa dia maur.

¹⁶Ma iau, ina kakailai ure ra dekdekim; Maia, ina manga kakailai ure kaum varmari ta ra malana; Tago u ga da ra dekdek na pal na bakbakit piragu, Ma a rivarivan ta ra bung iau ki na malari tana.

¹⁷U ra dekdekigu, ina kakailai tadav u, Tago u, God, kaugu dekdek na pal na bakbakit, ra God ba i mari tuna iau.