Pisalem 59:6-17

⁶Digaula e lloomoi labelaa ma ga hiahi, e heehee i lodo di waahale mo di nguunguu gadoo be nia paana.

⁷Hagalongo malaa gi nia haganneennee digaula, mo nia haga huaidu digaula. Nia holole digaula e hai be nia hulumanu dauwa i lodo nadau ngudu. Digaula e hagabaubau bolo ma tangada e hagalongo gi ginaadou ai.

⁸Gei Goe e gadagada gi digaula, meenei Dimaadua. Goe e dugu digau o di bouli bolo ma nia balumee.

⁹Au e hagadagadagagee gi oo mahi, meenei God, Goe go dagu gowaa e bala ginai au.

¹⁰Dogu God e aloho i di au, gei ga hanimoi gi di au. Mee gaa hai au gii mmada gi ogu hagadaumee ma ga magedaa.

¹¹Meenei God, hudee daaligidia digaula gi dee de langahia agu daangada. Gei Goe heia digaula gii hula gi lellele dagidahi gi oo mahi. Hagamagedaa ina digaula, meenei Dimaadua, go di madau abaaba.

¹²Di huaidu la i hongo nia malau ngudu digaula. Nia helekai huogodoo digaula le e huaidu huoloo. Heia nia helekai digaula gi hele ina digaula i lodo nadau hagapuu! Idimaa digaula e hai nadau haga halauwa ge e hai nadau kai tilikai,

¹³daaligidia digaula gi do hagawelewele. Daaligidia digaula gii odi. Gei digau huogodoo ga iloo bolo ma go God dela e dagi Israel, gaa hana loo gi nia mada o henuailala.

¹⁴Ogu hagadaumee e lloomoi labelaa ma ga hiahi, e heehee i lodo nia waahale mo di nguunguu gadoo be nia paana,

¹⁵e hai be nia paana ma ga halaangaa dolohi, e halahala nadau meegai mo di nguunguu maa ginaadou ma ga hagalee kida nadau mee.

¹⁶Gei au ga daahili i di hai oo mahi. Nia luada huogodoo gei au ga daahili gi nua i di hai o do aloho dee modu. Goe go dagu gowaa dela e bala iei au, gei di abaaba ni oogu i dogu madagoaa ma ga haingadaa.

¹⁷Au ga hagaamu Goe, go dogu Dangada Daa, dagu gowaa e bala ginai au la go God, di God dela e aloho i di au.