Mbouŋ To Yes Israela 59:6-17

⁶Ravrav ta naol ne, koiagŋa tilamlam, ve tilaghlaagh ila nugh loolo. Tiŋaaŋ maripazi ve lolozi ŋurŋuria imin ŋgavuun tau ighe ighan tamtamon.

⁷Ughita. Saveeŋ sasaghati mon ta ivotvot ila avozi. Yamazi, ene imin mbuzaagh maata. Ve tisavsaav tighe: “Sei pale ilooŋ ghei?”

⁸Eemon Yoova, yo ughit zi, ve uŋiŋ pazi. Yes nugh nugh tau tiwatagh ghom mako na, yo uvelegh zi ve ughe tirau saa?

⁹Maaron, yau naghamgham tapirig ilat tsio. Tauvene naghurghur matag payo, ve nasasaŋan mon. Koiagŋa irau tigham gabua eta payau mako. Pasaa, yo uponpoon ghau pazi imin maetaaz tau izala kat.

¹⁰Maaron tsiau, yo lolom isaghav tamtamon tsio ve uluul zi. Yo aat ulam tomani ghau, ve utatan koiagŋa, ve naghita pa taug matag.

¹¹Eemon urav zi timaat rekia sov. Upul zi tileep toman pataŋani. Leso tamtamon tsiau matazi kisin ŋgar tsio tau ughurghur atuya pa zeran sasaghatizi. Maaron, yo umin sigheu payei. Utatan zi pa tapirim le tivaghamgham, ve ureu zi le timbiriis tilalez lez.

¹²Pa saveeŋ tau ivotvot ila avozi na, poia mako. Monmon avozi isosor. Yes tighamgham karom pa tamtamon, ve tisiksik saveeŋ sasaghati naol pazi. Eemon ŋgar toozi tau tipapait tauzi ve tivelegh ghom, ene pale imin liis pazi.

¹³Tauvene utotoi aatyavyav tsio pazi, ve uvaghamun zi. Maaron, upasov zi le tisov kat. Leso tamtamon irau taan ziige ta naol ne, tighilaal ghom tighe yo ughamgham pooz pa yei tau Yakop paaghu tooni ne.

¹⁴Ravrav ta naol ne, koiagŋa tilamlam, ve tilaghlaagh ila nugh loolo. Tiŋaaŋ maripazi, ve lolozi ŋurŋuria imin ŋgavuun tau ighe ighan tamtamon.

¹⁵Yes timin ŋgavuun tau tilaghlaagh ve tiliil aniiŋ. Ve isaav ighe tighan irao mako, ene aat tinoknok taŋiiz.

¹⁶Eemon yau aat nambou, ve napait ezam pa tapirim tiina. Mboŋoozo ta naol ne, yau aat nambou ve napait ghom pa ŋgar tsio tau lolom isaghav tamtamon tsio ve uluul zi. Pasaa, yo uponpoon ghau imin maetaaz tau izala kat. Isaav ighe pataŋani ivot payau, yo pale umin didiiŋ ariaaŋa payau, leso nayooŋ ila.

¹⁷Maaron, yau naghamgham tapirig ilat tsio. Tauvene nambou ve napait ezam. Maaron tsiau, yo uponpoon ghau imin maetaaz tau izala kat. Ve yo lolom isaghav ghau, ve uluul ghau irau saawe.