A Umana Kakailai 32:4-8

⁴Tago ra keake ma ra marum a limam i mamat i tagu; A polo na pakagu i ga panie da ta ra ngala na lapap ta ra e na keake. Sela.

⁵Iau ga vura tata kapa piram ure kaugu nirara, Ma pa iau ga ive kaugu varpiam mulai; Iau ga biti: Ina vaarike kaugu lavur varpiam tadav ra Luluai; Ma u, u ga nur vue kaugu varpiam ma kaugu bilak na mangamanana. Sela.

⁶Kari go, boina ba ra umana tena lotu tikatikai diat a araring piram ta ra e ba di tikan valar pa u; I dovot ba ra lovon ta i ngala mat pa na tadav diat.

⁷U kaugu rivarivan; una ga balaure bat iau kan ra purpuruan, Una ga tul tar ra umana kakailai na valavalaun upi diat a tur kikil iau. Sela.

⁸Ina vakabara u ma ina tovo u ure ra nga ba una mur ia; Ina vateten u, ma ra matagu na mataure u.