1 KING TAUDIA 8:46-62

⁴⁶“Sedira oi dekenai oiemu bese taudia do idia kara dika, badina be dika ia karaia lasi tauna ta be lasi, vadaeni oi ese edia dika dainai do oi badu. Bona unai dainai idia dekenai tuari taudia oi koua lasi, vadaeni oiemu bese be tuari do idia lusi. Unai neganai kwalimu taudia ese oiemu bese taudia do idia guia, tano ta, kahirakahira o daudau dekenai do idia hakaua lao.

⁴⁷To unuseni, bema oiemu bese taudia ese mai edia lalona giroa danu oi dekenai do idia noinoi neganai, Lohiabada e, edia guriguri mani do oi kamonai.

⁴⁸Oibe, sedira oiemu bese taudia ese edia lalona do idia giroa momokani, bona aiemai sene taudia oi henia tano dekenai, bona inai hanua, bona inai, lau haginia Dubu Helaga dekenai edia vairana do idia henia, oi dekenai do idia guriguri.

⁴⁹Unai neganai edia noinoi do oi kamonai. Oiemu noho gabuna, guba lalonai, edia guriguri do oi kamonai, bona do oi bogahisihisi henidia.

⁵⁰Edia kara dika bona edia kerere do oi gwauatao, bona idia do oi bogahisihisi henia, idia guia taudia edia vairana dekenai. Vadaeni idia guidia taudia ese danu do idia bogahisihisi henia.

⁵¹Badina idia be oiemu bese korikori, oi ese Aigupito tano dekena amo, unai amu mai hururuhururu danu dekena amo idia oi hakaua mai.

⁵²“Lohiabada Dirava e, oiemu bese taudia Israela bona edia king dekenai nega ibounai do oi laloa namo, bona edia guriguri bona edia taitai do oi kamonai henia.

⁵³Badina be, oi ese tanobada bese ibounai dekena amo idia oi abia hidi, oiemu bese korikori do idia lao totona. Inai be oi ese oiemu hesiai tauna Mose oi hamaoroa, aiemai sene taudia Aigupito dekena amo oi hakaudia neganai.”

⁵⁴Solomona be inai guriguri ia gwauraia noho neganai ia be ia tui diho, bona iena imana ia abia isi noho. Iena guriguri ia haorea neganai, boubou patana ena vairana dekena amo ia toreisi.

⁵⁵Unuseni ia gini, bona ia ese unuseni idia gini Israela taudia ibounai ia hanamoa, mai boiboi bada danu.

⁵⁶Ia gwau, “Lohiabada do ita hanamoa, badina be ia ese iena bese Israela dekenai maino ia henia, iena gwauhamata ibounai hegeregere. Iena gwauhamata namodia ibounai, iena hesiai tauna Mose ena uduna dekenai ia gwauraia gaudia, be Lohiabada ese ia badinaia vadaeni.

⁵⁷Lohiabada, iseda Dirava, be ita danu ia noho, iseda sene taudia danu ia noho hegeregerena, ia ese ita do ia rakatania lasi, ita do ia negea lasi.

⁵⁸Ia ese ita do ia hamanadaia ia dekenai, iena dala ibounai do ita raka, bona iena Taravatu bona oda ibounai, iseda sene taudia dekenai ia henia gaudia, be do ita badinaia.

⁵⁹Bona inai, lauegu guriguri bona noinoi, Lohiabada ena vairana dekenai lau gwauraia gaudia, lau ura Lohiabada iseda Dirava ese do ia laloatao nega ibounai. Lauegu noinoi danu be, Lohiabada ese nega ibounai Israela taudia bona edia king do ia bogahisihisi henia, bona dina ta ta ibounai edia mauri totona gaudia do ia henia.

⁶⁰Unai dekena amo tanobada besedia ibounai do idia diba, Lohiabada be Dirava, dirava idauna ta be lasi.

⁶¹To umui, iena bese taudia ese mai emui lalona ibounai Lohiabada iseda Dirava do umui badinaia namonamo. Iena Taravatu bona oda ibounai do umui kamonai henia, hari dina umui karaia noho hegeregere.”

⁶²Vadaeni king Solomona, bona Israela taudia ia danu idia noho ese, boubou gaudia Lohiabada dekenai idia henia.