1 KING TAUDIA 2:9-21

⁹To oi diba ia be mai ena kerere, badina be oi be mai aonega danu. Unai dainai iena kerere davana do oi henia, do oi alaia mase.”

¹⁰Davida be ia mase, bona Davida ena Hanua dekenai idia guria.

¹¹Davida ese Israela ia gunalaia lagani be 40, Heberona dekenai lagani 7, bona Ierusalema dekenai lagani 33.

¹²Unai dainai Solomona ese iena tamana Davida ena terona dekenai ia helai, bona iena basileia ia gini goada momokani.

¹³Dina ta Adonaisa, iena sinana be Hagiti, be Bataseba, Solomona ena sinana dekenai ia lao. Bataseba ese Adonaisa ia nanadaia, ia gwau, “Mai maino danu oi mai, o lasi?” Adonaisa ia haere, ia gwau, “Io.”

¹⁴Bona ia ese Bataseba ia hereva henia, ia gwau, “Lau ura gau ta oi dekenai lau nanadaia.” Bataseba ia gwau, “Oi ura dahaka?”

¹⁵Adonaisa ia gwau, “Oi diba lau ese king dagi lau abia be maoro, bona Israela taudia ibounai unai bamona idia laloa. To king dagi be lauegu tadina ese ia abia, Lohiabada ena ura dainai.

¹⁶To lau ura gau ta oi dekenai lau noia, mani emu kara inai noinoi do oi abia dae.”

¹⁷Bataseba ia gwau, “Oiemu noinoi be dahaka?” Adonaisa ia haere, “Mani emu kara king Solomona do oi noia, ia ese Abisaga, Suneme hahine, lau dekenai do ia henia, do lau adavaia. Lau diba Solomona ese oiemu noinoi do ia abia dae.”

¹⁸Bataseba ia gwau, “Namo, king be oi dainai do lau noia.”

¹⁹Unai dainai Bataseba be king Solomona dekenai ia lao, Adonaisa dainai do ia hereva henia totona. Vadaeni king ia toreisi, iena sinana Bataseba ena vairana dekenai ia tui diho.

²⁰Bataseba ia gwau, “Lau be mai egu noinoi maragina ta oi dekenai, mani emu kara do oi abia dae.” King Solomona ese ia haere, ia gwau, “Egu sinana e, do oi noinoi, bona oiemu noinoi gauna do lau negea lasi.”

²¹Bataseba ia gwau, “Abisaga, Suneme hahine, be oiemu kakana Adonaisa dekenai do oi henia, ia ese do ia adavaia.”