1. King 22:33-53

³³Lupwen ekewe meilapen ekewe woken ra küna pwe sap i ewe kingen Israel, ra liwin seni ar tapweri.

³⁴Iwe, eman sounfiun Siria a chök äsesser le likapichiela wokun esefich, nge ewe esefich a küw ewe king Ahap lefilen fichin üfan üfen maun. Iei mine ewe king a üreni ewe mi wisen uwei waan woken, “Kopwe kul o uweeila seni ei maun, pun ngang üa kinas.”

³⁵Lon ewe rän ewe maun a pöchökülela, nge ewe king a chök aünnala won waan woken kulu ngeni ekewe chon Siria. Iwe, ewe cha seni kinasan a putiu lefön ewe woken, nge lekuniol a mäla.

³⁶Nge lupwen akkar a tuputiu, eman me lein ekewe sounfiun Israel a kökö, “Eman me eman mwän epwe liwiniti en me an telinimw me en me fanüan.”

³⁷Iei usun ewe king Ahap a mäla. Nge ra uwala Samaria o peiaseni ie.

³⁸Iwe, ra talü waan woken aropen ewe nomun koluk lon Samaria, ewe ia ekewe fin lisowu ra tütü ie, nge ekewe kolak ra chönawei chan Ahap, usun ewe Samol mi Lapalap a fen apasa.

³⁹Iwe, lusun pworausen än Ahap föför meinisin, imwan a aüetä o foute ngeni ngiin äläfan me ekewe telinimw meinisin a aüetä, a mak lon puken uruwon ekewe kingen Israel.

⁴⁰Iwe, Ahap a mäla, nge Ahasia nöün we mwän a siwili lon wisan wisen king.

⁴¹Iwe, lon arüanün ierin mwün Ahap ewe kingen Israel, Jehosafat nöün Asa we mwän a tolong lon wisan wisen king o nemeni Juta,

⁴²lupwen a ierini ilik me limu. A nom lon Jerusalem o nemenem lon ükükün rüe me limu ier. Iten inan Asupa nöün Silhi we fefin.

⁴³Jehosafat a föri mine a pwüng me fän mesen ewe Samol mi Lapalap, usun Asa saman we a föri. Nge ekewe lenien fel won ekewe leni tekia resap katala. Iwe, ekewe aramas ra chök sopwela le asor o keni apach mi pwokus wor.

⁴⁴Jehosafat a pwal eäni kinamwe ngeni ewe kingen Israel.

⁴⁵Nge lusun pworausen än Jehosafat föför meinisin, an föförün pwora, pwal usun an kewe maun a mak lon puken uruwon ekewe kingen Juta.

⁴⁶Jehosafat a pwal arosala seni ewe fanü ekewe mwän meinisin mi chüen manau seni fansoun Asa saman we, chokewe mi fangala inisir fän iten lisowu lon ekewe lenien fel ngeni anümwäl.

⁴⁷Iwe, esap wor eman king lon Etom, ewe chök kisin mi fil me ren ewe kingen Israel a nemenem.

⁴⁸Jehosafat a falei ekoch sipen kamö me amömö pisek, repwe sai ngeni ewe fanü Ofair o uwato kolt. Nge resap fokun sai, pun ekewe sip ra mök me arun Esion-keper.

⁴⁹Mürin, Ahasia nöün Ahap we mwän a üreni Jehosafat, “Kopwe mwüt ngeni nei kewe chon angang, pwe repwe eti noum kewe chon angang le sai won ekewe sip.” Nge Jehosafat esap mochen.

⁵⁰Iwe, Jehosafat a mäla, nge ra peiaseni ren an kewe lewo lon ewe telinimwen Tafit. Jehoram nöün we mwän a siwili lon wisan wisen king.

⁵¹Iwe, lon engol me fisuen ierin mwün Jehosafat ewe kingen Juta, Ahasia nöün Ahap we mwän a tolong lon wisan wisen king o nemeni Israel. A nom lon Samaria o nemenem lon ükükün ruu ier.

⁵²Ahasia a föri mine a ngau me fän mesen ewe Samol mi Lapalap. A apirü föförün Ahap saman we me Isipel inan we, a pwal apirü föförün Jeropoam nöün Nepat we mwän mi emweni Israel ngeni tipis.

⁵³Iwe, a angang ngeni ewe anü Paal o fel ngeni, usun chök saman we a föri. Ren ei a asonga ewe Samol mi Lapalap ewe Koten Israel.