1 HANUA PAVAPAVADIA 7:1-33

¹Laḡani gwauta-toi lalodiai Solomon ese ena noho rumana e haginia, unu laḡani lalodiai idoinai e ha-orea.

²Ruma ladana Lebanon Udana Rumana e haginia. Ena lata na kiubit sinahu-ta, lababana na kiubit imahui, bona harana latana na kiubit toi-ahui. Sida au-tubuadia ere toi e haginidia, bona sida lavadia na au-tubua latadiai e atodia.

³Atai ai, sida audia amo e koua, unu au-tubua hari-ahui ima, ere ta ta ai gwauta-ima gwauta-ima e haginidia ḡaudia, latadiai e karadia daiutudia daediai.

⁴Gaba-mauru na ere toi, ruma kahana kahana ai ere ta ta ai e hevaira heheni.

⁵Iduara bona gaba-mauru na kaha haniosi heḡereḡeredia ḡaudia; bona gaba-mauru na e hevaira heheni ere toiosi ai.

⁶Ruma ladana Au-tubua Rumana danu e haginia; ena lata na kiubit imahui, lababana na kiubit toi-ahui. Ia vairanai na dehe toi-lasi rumana, mai au-tubuadia bona mai guhina.

⁷Ruma ladana Terono Rumana danu e haginia, taunimanima baine hahemaoro henidia gabuna, Hahemaoro Rumana ai bainela. Sida audia amo e karaia, reirei amo ela bona toidae.

⁸Ia sibona baine noholaia rumana, maḡu ta ai, una ruma murina kahana ai, na una dala heḡereḡerena ai e karaia. Solomon ese danu ruma auta ma e haginia, una ruma heḡereḡerena, Farao natuna, vada e adavaia hahinena, ena.

⁹Ini ruma iboudiai na dava-bada nadidia amo e haginidia; nadi iboudiai na e hahetohodia, bona iri amo e iridia ḡoevagoeva, kahana kahana, badidia ela bona doridia, bona Iehova ena dubu maḡuna ela bona maḡu badana.

¹⁰Ruma badidia na dava-bada nadidia bada-hereadia: haida edia bada na kiubit taurahani, ma haida gwauta.

¹¹Idia latadiai danu dava-bada nadidia, e hahetoho bona e utu ḡoevaḡoeva ḡaudia, e heato, bona sida audia danu.

¹²Maḡu badana na e utu nadidia ere toi ese e ḡeḡea ahu, bona sida audia ere ta idia latadiai; ma ia lalonai Iehova ena dubu maḡuna danu unuheto, bona dehe toi-lasi rumana danu.

¹³Bena King Solomon e hesiai, Hirama na Turo amo e hakaua mai.

¹⁴Hari Hirama na vabu ta natuna, Napatali iduhuna amo, a tamana na tau Turo, auri labora-labora igaukaralaina tauna. Ia na mai aonegana bona mai ena lalo-parara; ia na ima idibaka tauna danu, auri labora-labora iḡaukaralaina ai. Ia na King Solomon dekena ema, ena ḡaukara idoinai e karaia.

¹⁵Ia ese au-tubua rua auri labora-labora e havevea bona e hahetaria ḡauna amo e karadia. Au-tubua ta ena lata na kiubit gwauta-taurahani, bona ena kuboro na kiubit gwauta-rua. Ia na auri kuborona lalona kohua; kopina udunana na ima kwakikwaki hani e haheboudia udunana heḡereḡerena. Au-tubua iharuana danu unu e karaia toma.

¹⁶Auri labora-labora e havevea ḡauna amo au-tubua kwaradia ikorodia rua e karadia, au-tubua doridia ai e atodia kau. Kwara ikorona ta ena lata na kiubit ima, iharuana danu ena lata na kiubit ima.

¹⁷Bena ḡau haida auri amo e karadia reke-dae, bona herahera ḡaudia e moḡedia kuboro, au-tubua kwaradia ikorodia ḡaudia ihaheralaidia, ta au-tubua ta ena, ma ta au-tubua ta ena.

¹⁸Unuhetomana, rimono huahuadia laulaudia danu e kara, ere rua ai e karadia, hari reke hetomana e ḡeḡelaia, au-tubua kwarana ikorona ḡauna iḡovalaina. Ma iharuana danu unu e karaia toma.

¹⁹Dehe au-tubuadia kwaradia ikorodia ḡaudia ita-itadia na sosana heraheradia na heheto; edia lata na kiubit hani.

²⁰Hari kwara ikorodia gaudia na au-tubua doridia ilahasi kuborodia latadiai e ato kau, hari reke-hetomana badinai. Rimono huahuadia iboudiai na sinahu rua, e ato heḡeḡe ere rua ai. Kwara ikorona ḡauna iharuana danu unuheto.

²¹Hari au-tubua na dubu dehena vairanai e haginidia; ta diho kahana ai e haginia, ladana e hatoa lakin; ma ta mirigini kahana ai e haginia, ladana e hatoa Boa.

²²Au-tubua doridia ai na sosana heraheradia laulaudia. Autubua ikaradia na unu e ha-orea toma.

²³Bena ranu nauna bada-hereana ta auri labora-laborana, e havevea ḡauna, amo e karaia. Ia na kuboro-kuboro; ena lababa na kiubit gwauta, harana latana na kiubit ima, bona e hahetohoa heḡeḡe na kiubit toi-ahui.

²⁴Isena henunai na popou laulaudia, kiubit toi-ahuiosi ai e kara, nau e haheḡegea dae; hari popou na ere rua ai e kara, nau ai e karaia kau tamona, e hahetaria negana ai e hahetaridia hebou.

²⁵Hari nau na boromakau mamaruanedia laulaudia gwauta-rua latadiai e helai kau: toi mirigini kahana e vaira henia, ma toi lahara kahana, ma toi diho kahana, ma toi laurabada kahana. Hari nau na idia latadiai e heato kau, bona iboudiai e hekunu heheni.

²⁶Nau udunana na ima palapala lababana heḡereḡerena; isena na kehere isena heḡereḡerena, sosana heraherana na heto. Ia anina na ranu bata daha-rua.

²⁷Ia ese danu rerue gwauta auri labora-labora amo e karadia. Rerue ta ena lata na kiubit hani, lababana na kiubit hani, bona harana latana na kiubit toi.

²⁸Hari rerue na ini e karadia toma: idia na mai habahabadia, tua ta ta auridia ai e kapa vareai;

²⁹bona unu tua ta ta auridia ai e kapa vareai habahabadia ai na leona bona boromakau mamaruanedia bona kerubi laulaudia. Hari tua ta ta ohe auridia ai, leona bona boromakau mamaruanedia laulaudia daediai bona henudiai, isedia ihaheinidia na e haheradia heḡeḡe.

³⁰Rerue ta ta na mai ava-keikeidia hani, auri labora-labora ḡaudia; itoilaidia auridia danu na auri labora-labora. Daiguni haniosi ai na tohe iabi-isina auridia; unu auri na e hahetaria ḡauna amo e karadia, ta ta mai heraheradia ohedia ai.

³¹Kwarana harana latana na kiubit ta, bona lalona na kohua mauru heḡeḡe, au-tubua lalona na heto; ena dobu na kiubit ta mai kahana. Hari lalo-heḡeḡe isena na mai heraherana; habahabana na mai daigunina hani, dia kuboro.

³²Ava-keikeidia haniosi na habahaba henudiai; itoilaidia auridia bona rerue na auri tamona amo e hekara. Ava-keikei ta harana na kiubit ta mai kahana.

³³Hari ava-keikeidia na e karadia kariota ava-keikeina na heto; itoilaidia auridia bona ava-keikei auridia bona ito'o-tao auridia bona bogaragi idogo-taolaina auridia iboudiai na e hahetaria aurina amo e karadia.