1 HANUA PAVAPAVADIA 6:20-32

²⁰Hari helaḡa daiutuna ena lata na kiubit ruahui, lababana danu kiubit ruahui, bona harana latana danu kiubit ruahui; gold ḡoevaḡoevana amo e ḡovaia. Ihaboulaina patana danu sida audia amo e karaia.

²¹Solomon ese dubu laloma kahana na gold ḡoevaḡoevana amo e ḡovaia, bona gold varodia amo helaḡa daiutuna e seroa ahu; ma gold amo e ḡovaia.

²²Dubu idoinai na gold amo e ḡovaia ela bona idoinai vada e ore. Ihaboulaina patana, helaḡa daiutuna lalonai, danu idoinai gold amo e ḡovaia.

²³Helaḡa daiutuna lalonai ia ese kerubi rua olive audia amo e korodia; edia lata na kiubit gwauta.

²⁴Kerubi ta hanina kahana kahana edia lata na kiubit ima irna amo: hani ta matana amo ela bona ma hani ta matana padadia na kiubit gwauta.

²⁵Kerubi iharuana danu ihahetohona na kiubit gwauta; kerubi ruaosi ihahetohodia na heḡereḡere bona oromadia na heḡereḡere.

²⁶Kerubi ta ena lata na kiubit gwauta: iharuana danu unuheto.

²⁷Kerubi ruaosi na helaḡa daiutuna ai e atodia; hanidia na e hetoi roro, bena kerubi ta hanina ta na haba ta ai e hetomu kau, ma kerubi ta hanina ta na haba kahana ai ma e hetomu kau; a hanidia iharuadia na dubu bogaraginai e hetomu heheni.

²⁸Hari kerubi na gold amo e ḡovadia.

²⁹Dubu habadia danu iboudiai e korodia heḡeḡe, ita-itadia na kerubi bona pamu ḡaudia bona au buredia, laloma daiutuna ai bona murimuri daiutuna ai.

³⁰Dubu reireina danu gold amo e ḡovaia, laloma bona murimuri daiutudia ai.

³¹Helaḡa daiutuna raka-vareai iduaradia na olive audia amo e kara; iduara bagubagu audia bona iduara ihua-ihuadia kahadia kahadia audia iboudiai na siri ima.

³²Hari olive audia iduaradia ruaosi na ikoro amo e ha-ahudia, kerubi bona pamu audia bona au buredia laulaudia e koro; bena gold amo e govadia.