ᤛᤣ᤺ᤰᤕᤢᤰᤔᤡᤒᤠᤜᤠ᤹ 12:3-7

³ᤜᤧᤰᤁᤩᤠᤱ ᤂᤧᤸᤗᤧ ᤜᤧᤰᤁᤣ ᤆᤥᤃᤢᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤔᤧᤛ᤺ᤳᤋᤧᤒᤠ ᤏᤡ᤺ᤛᤢᤛᤡ. ᤂᤧᤸᤗᤧ ᤆᤥᤃᤢᤸᤗᤧ ᤐᤋᤪᤢᤛᤧᤴᤏᤠᤱ ᤋᤧᤶᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥ ᤁᤴ ᤜᤡᤴᤍᤥ᤺ᤰᤁᤡᤴ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤥ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥

⁴ᤜᤧᤖᤥᤍᤖᤧ ᤐᤋᤪᤢᤛᤧᤴ ᤋᤧᤶᤔᤠ ᤐᤠᤱᤄᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤋᤢ॥ ᤜᤧᤰᤁᤩᤠᤱ ᤂᤧᤵᤔᤥ ᤌᤡᤰ ᤌᤡᤰ ᤗᤰᤁᤥ ᤗᤡᤛᤡ ᤗᤡᤛᤡ ᤌᤰᤛᤢᤒᤠᤜᤠ᤹ᤖᤧ ᤐᤋᤪᤢᤛᤧᤴ ᤛᤧᤴᤍᤡᤰ ᤗᤧᤴᤍᤡᤰ ᤁᤥᤔᤠ ᤐᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤂᤧᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤆᤢ᤺ᤳᤋᤠᤱ ᤐᤋᤪᤢᤛᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤠᤛᤧᤴ ᤗᤥ᤺ᤶᤔᤠᤀᤠᤱ ᤂᤢᤶᤍᤡᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤖᤥ॥

⁵ᤜᤧᤰᤁᤣᤗ᤹ᤖᤡᤰ ᤐᤋᤪᤢᤛᤧᤴ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤀᤠᤱ ᤘᤕᤧᤸᤗᤧ ᤛᤣᤛᤣᤜᤢᤵᤗᤰᤁᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤗᤠᤃᤡ ᤆᤰᤔᤧᤸᤗ᤹ᤀᤣ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤁᤡ ᤔᤧᤕᤠᤃᤧᤖᤥ॥

⁶ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤐᤋᤪᤢᤛᤧᤴ ᤋᤠ᤺ᤵᤔᤠᤏᤢ᤺ᤸᤗᤧ ᤋᤃᤡᤛ᤻ᤔᤠ ᤛᤧᤴᤍᤡᤰᤁᤥ ᤏᤧᤳᤇᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤧᤳᤇᤡ ᤑᤧᤴᤈᤣ᤹ ᤜᤢᤰᤐᤠ᤺ᤱᤃᤡᤸᤗᤧ ᤀᤡᤔᤧᤄᤣ᤺ᤰᤂᤢᤀᤠᤱ ᤂᤧᤴ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤖᤥ॥ ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥᤒᤠ ᤗᤠᤶᤔᤥᤀᤠᤱ ᤌᤰᤛᤢᤒᤠᤜᤠ᤹ ᤗᤠᤶᤃᤥᤀᤡ ᤔᤧᤕᤧᤒᤧᤖᤥ॥

⁷ᤂᤡᤔᤥ ᤂᤧᤴ ᤐᤢᤱᤗᤠᤜᤡᤶᤔᤥᤒᤠ ᤕᤠᤰᤑᤠᤱᤅᤡᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤸᤗᤧ ᤌᤥ᤹ᤖᤢᤖ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤴᤏᤠᤱ ᤂᤧᤵᤔᤥ ᤌᤠ᤺ᤴᤇᤡᤱ॥ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤐᤋᤪᤢᤛᤖᤧ ᤁᤢᤓᤰᤋᤠᤱᤅᤥ ᤑᤧᤰᤑᤧᤰ ᤜᤡᤵᤋᤢᤖ ᤑᤥ᤺ᤰᤂᤢᤀᤠᤱ ᤀᤰᤂᤣ ᤔᤧᤳᤋᤢ. “ᤜᤠᤖᤠ ᤐᤥᤃᤧ᤹॥” ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤢᤜᤢᤰᤁᤥ ᤁᤧᤒᤵᤐᤠ ᤑᤧᤴᤈᤣ᤹ ᤜᤢᤰᤐᤠ᤺ᤱᤃᤡᤜᤠ᤹ ᤐᤠ᤺ᤰᤂᤧᤀᤠᤱ ᤔᤰᤌᤩᤧᤖᤥ॥