ሃዋሬታ ኦሱዋ 12:3-7

³ሄሲ ኣይሁዴታ ኡፋይሲዳይሳ ቤዒዲ፥ ጉጂዲ ጴፂሮሳካ ኦይꬂስ። ሄሲ ሃኒዳይ ፓሲካ ባሌ ቦንቺያ ጋላሳታና።

⁴ጴፂሮሳ ኦይኪዲ ቃቺስ። ፓሲካ ቦንቺያ ጋላሳታፔ ጉዬ ዴሪያ ሲንꬄ ኣꬃናው ቆፒዲ፥ ኦይዱ ኦይዱ ዎታዳሬቲ ኢያ ናጋና ሜላ ታማኔ ኡሱፑን ዎታዳሬታስ ኣꬂ ኢሚስ።

⁵ሄሳ ጊሾ፥ ጴፂሮሲ ቃሾ ኬꬃን ናጌቴስ። ሺን ዎሳ ኬꬃ ኣሳይ ኢያው ሚንꬂዲ ፆሳ ዎሶሶና።

⁶ሄሮዲሲ ጴፂሮሳ ኣሳ ሲንꬄ ሺሻናፔ ካሴ ቃማ ጴፂሮሲ ናምዑ ባጋራ ናምዑ ዎታዳሬታራ ሳንꬃላታን ቃሼቲዲ ኤንታ ጊዶን ꬊስኪስ። ናጌይሳቲ ቃሾ ኬꬃ ፔንጌታን ኤቂዲ ናጎሶና።

⁷ኣኬኮና ዴዒሺን ጎዳ ኪታንቾይ ቆንጪስ። ቃሾ ኬꬃን ፖዖይ ፖዒስ። ኪታንቾይ ጴፂሮሳ ሚያ ቦቺ ባርኪሲዲ፥ «ኤሌ ዴንዳ» ያጊስ። ኢራካ ሳንꬃላታይ ኢያ ኩሺያፔ ዎꬊ ኣጊስ።