ᤖᤥᤔᤡ 15:4-33

⁴ᤐᤣ ᤕᤧᤶᤔᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧ ᤀᤠᤏᤡ᤹ ᤏᤡᤛᤠᤶ ᤀᤠᤜᤢ᤹ᤖ ᤑᤠ᤹ᤀᤠᤱ ᤛᤠᤵᤋᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤏᤠᤛᤡ ᤀᤠᤎ᤺ᤳᤋᤢᤶᤔᤡᤸᤗᤧ ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤗᤠᤶ ᤀᤠᤏᤡ᤹ ᤜᤠᤱᤜᤠᤱ ᤀᤠᤗ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤖᤧᤒᤠ ᤔᤠᤱᤜᤧᤰᤜᤠ᤹ ᤁᤧᤳ ᤑᤠ᤹ᤀᤠᤱ ᤏᤡᤛ᤻ᤛᤣᤀᤣ ᤏᤡᤱᤛᤠᤱ ᤀᤠᤈᤥᤃᤢᤶᤗᤥ॥

⁵ᤀᤠᤸᤗ ᤏᤠᤛᤡ ᤌ᤺ᤵᤔᤠ ᤁᤧᤒᤠᤱᤒᤠ ᤏᤢ ᤜᤠᤱᤜᤠᤱ ᤕᤠᤵᤔᤡ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴ ᤘᤕᤧᤒᤠ ᤁᤢᤒᤡ ᤁᤢᤀᤡᤛᤡ᤺ᤰ ᤁᤧᤒᤥ᤺ᤰᤂᤡᤸᤗᤧ ᤂᤡᤏᤡ᤹ ᤗᤢᤶᤔᤥ ᤌᤡᤰᤜᤢᤵ ᤐᤥ᤺ᤱᤔᤠᤀᤠᤱ ᤘᤠ᤹ᤔᤠ ᤁᤧᤒᤠᤱᤄᤡᤖᤖᤥ॥

⁶ᤜᤧᤰᤁᤣᤗ᤹ᤖᤡᤰ ᤌᤡᤰ ᤏᤡᤱᤘᤠ᤹ ᤏᤢ ᤌᤡᤰ ᤔᤢᤖᤠ᤺ᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤁᤧᤛᤢᤰᤋᤢᤶᤗᤖᤥ॥

⁷ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧ ᤂᤪᤡᤛ᤻ᤋᤖᤧ ᤂᤡᤏᤡ᤹ ᤁᤧᤍᤠ᤺ᤰᤋᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤗᤢᤶᤔᤥᤀᤠᤱ ᤋᤠ᤺ᤰᤁᤠᤛᤡᤶᤔᤧ᤹ᤀᤥ॥

⁸ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤠᤰᤌᤧᤒᤠᤜᤠ᤹ ᤐᤡᤖᤢᤛᤡᤒᤠ ᤔᤠᤱᤜᤧᤰᤜᤠ᤹ ᤛᤧᤰᤂᤠᤀᤣ ᤆᤥ᤺ᤰ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤧ ᤂᤪᤡᤛ᤻ᤋᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥

⁹ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤋᤩᤧᤒᤠᤖᤥ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᤁᤧᤛᤠᤵᤐᤠᤸᤗᤧ ᤛᤠᤵᤋᤢᤀᤠᤱ ᤐᤳ. “ᤂᤧᤸᤗᤧ ᤆᤥᤃᤢᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤡᤱᤃᤠ᤹ ᤏᤧᤶᤓᤥᤃᤧᤴ ᤁᤧᤏᤠᤖᤠ ᤑᤥ᤺ᤛᤢᤱᤗᤥ. ᤜᤧᤰᤁᤩᤠᤱ ᤁᤧᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤈᤥ᤺ᤰᤐᤠ ᤛᤣᤘᤠ ᤛᤠᤶᤗᤥ᤺ᤴ ᤛᤠᤶᤔᤧᤳᤋᤢᤱᤗᤥ॥”

¹⁰ᤕᤠᤶᤔᤥ ᤀᤰᤂᤣᤀᤠᤱ ᤛᤠᤵᤋᤧᤀᤠᤱ ᤐᤳ. “ᤌᤡᤶᤔᤧᤴᤍᤱ ᤛᤢᤘᤠᤱᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤀᤥᤔᤢ ᤗ᤹ᤖᤧᤶᤔᤧ᤹ᤀᤥ॥”

¹¹ᤜᤧᤰᤁᤩᤠᤱ ᤕᤠᤶᤔᤥᤀᤠᤱ. “ᤁᤠᤰ ᤌᤡᤶᤔᤧᤴᤍᤱ ᤛᤢᤘᤠᤱᤛᤣ. ᤍᤠᤱᤒᤠᤸᤗᤧ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤑᤥ᤺ᤛᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤧ᤹ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤔᤧᤓᤥ᤺ᤛᤢᤖ॥”

¹²ᤜᤧᤰᤁᤩᤠᤱ ᤕᤠᤶᤔᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤀᤠᤱ ᤛᤠᤵᤋᤢᤀᤠᤱ ᤐᤳ. “ᤕᤡᤛᤤᤖᤧ ᤁᤢᤎᤠ᤺ᤰᤗᤠᤶ ᤔᤏᤠᤎᤡᤰ ᤋᤠ᤺. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤌᤡᤶᤔᤧᤴᤍᤱ ᤛᤢᤘᤠᤱ ᤛᤶᤍᤠᤱ ᤜᤠᤱᤕᤢᤰ ᤆᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤶᤍᤠᤱ ᤏᤡᤱᤛᤠᤱ ᤔᤧᤕᤢᤰᤂᤢ᤹ᤖᤥ॥”

¹³ᤂᤡᤏᤡ᤹ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤏᤡᤱᤛᤠᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤧᤛ᤺ᤵᤐᤠ ᤁᤧᤈᤥᤃᤡᤖ ᤜᤧᤰᤁᤩᤠᤱ ᤛᤏᤠᤖᤢᤱ ᤁᤧᤒᤡᤖᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠ. ᤜᤧᤰᤁᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤕᤖᤡᤰ ᤏᤡᤱᤛᤠᤱ ᤁᤧᤃᤵᤐᤠ ᤁᤧᤈᤥᤃᤡᤖᤖᤥ॥

¹⁴ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤘᤣ᤹ᤜᤠ᤹ ᤏᤢ᤺ᤖᤡᤰ ᤁᤧᤔᤧᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤕᤖᤡᤰ ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤘᤣ᤹ᤜᤠ᤹ ᤜᤢ᤹ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤀᤡᤱᤃᤠ᤹ ᤏᤡᤛ᤻ᤛᤣ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥

¹⁵ᤜᤧᤰᤁᤣᤛᤠᤱ ᤁᤢᤓᤠ ᤔᤧᤶᤒᤠ᤺ᤳᤋᤣ ᤔᤧᤶᤒᤥ᤺ᤱᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤢᤶ ᤗ᤹ᤖ ᤑᤠ᤹ᤀᤠᤱ ᤀᤠ᤺ᤴᤇᤡᤱᤅᤠᤖ ᤛᤠᤵᤋᤢᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤗᤢᤱᤃᤢᤶᤗᤠᤶᤒᤠ

¹⁶ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣᤘᤠᤖᤥᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤛᤣᤛᤣᤔᤠᤱᤗᤠᤶ ᤛᤣᤛᤣ ᤔᤧᤒᤥ᤺ᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤧᤴᤍᤡᤱ ᤆᤥᤃᤢᤛᤡᤒᤠ ᤆᤥᤓᤠ᤹ ᤁᤢᤀᤡᤛᤡ᤺ᤰ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤜᤧᤰᤁᤣ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤂᤧᤱᤜᤠ᤹ ᤀᤡᤱᤓᤥ᤺ᤛᤢᤱᤛᤡᤱᤗᤥ॥

¹⁷ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤌᤡᤰᤜᤢᤵ ᤐᤥ᤺ᤰᤂᤠᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤥᤃᤢᤱᤒᤠ ᤀᤠᤔᤠᤱᤛᤣᤘᤠᤀᤥ ᤀᤡᤱᤃᤠ᤹ᤃ ᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴ ᤁᤳᤋᤢᤱᤗᤥ॥

¹⁸ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤏᤢ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤆᤥ᤺ᤰᤛᤧ ᤂᤪᤡᤛ᤻ᤋᤖᤧ ᤀᤡᤱᤃᤠ᤹ᤗᤠᤶ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤖᤰ ᤀᤠᤱᤍᤡᤱ ᤗ᤹ᤀᤠᤖᤥ॥ ᤘᤣ᤹ ᤐᤠ᤺ᤴᤜᤠ᤹ᤀᤥ ᤀᤠᤱᤍᤡᤱ ᤔᤧᤗ᤹ᤀᤠᤴᤗᤥ॥

¹⁹ᤁᤴ ᤕᤠ᤺ᤶᤒᤰᤁᤡᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤕᤖᤢᤛᤗᤧᤔᤗᤠᤶ ᤀᤡᤸᤗᤡᤖᤡᤁᤢᤔ ᤋᤧᤱᤃᤵ ᤌᤠᤖᤡᤰ ᤂᤪᤡᤛ᤻ᤋᤖᤧ ᤁᤠᤰ ᤁᤢᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥

²⁰ᤘᤣ᤹ ᤔᤏᤠᤜᤠ᤹ᤖᤧ ᤔᤧᤏᤧᤛ᤻ᤛᤢᤒᤠ ᤐᤠᤱᤕᤰᤁᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤁᤢᤀᤡᤛᤡ᤺ᤰ ᤘᤣ᤹ ᤔᤏᤠᤜᤠ᤹ᤖᤧ ᤂᤪᤡᤛ᤻ᤋᤧᤴ ᤀᤡᤱᤔᤧᤓᤥ᤺ᤛᤢᤒᤠ ᤋᤧᤴᤏᤥ ᤀᤡᤱᤃᤠ᤹ ᤂᤪᤡᤛ᤻ᤋᤧᤴ ᤀᤡᤱᤔᤧᤓᤥ᤺ᤀᤠᤴᤗᤥ. ᤁᤖ ᤂᤪᤡᤛ᤻ᤋᤧᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤠ᤹ᤒᤠ ᤋᤧᤴᤏᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤛᤍᤠᤍᤡᤱ ᤏᤡᤱᤘᤠ᤹ ᤁᤳᤋᤢᤱᤗᤥ॥

²¹ᤛᤠᤶᤕᤥᤛᤠᤵᤗᤠᤀᤥᤃ ᤀᤰᤂᤣᤗ᤹ᤖᤡᤰᤏᤧ ᤛᤠᤵᤋᤧᤀᤠᤱ ᤐᤳᤗᤥ. “ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤧᤶᤔᤧᤳᤇᤡᤱᤅᤣ ᤁᤧᤘᤠ᤹ᤒᤠᤜᤠ᤹ᤖᤧ ᤔᤧᤏᤡ᤺ᤛᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤧᤱᤄᤧᤶᤔᤣ ᤁᤧᤘᤠ᤹ᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥”

²²ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤘᤣ᤹ ᤋᤧᤴᤏᤥ ᤂᤪᤡᤛ᤻ᤋᤧᤴ ᤀᤡᤱᤓᤥ᤺ᤛᤢᤱᤒᤠᤸᤗᤧ ᤂᤡᤏᤡ᤹ᤀᤥ ᤋᤠ᤺ᤔᤠ ᤔᤧᤴᤇᤢᤰᤁᤣ ᤘᤠ᤹ᤀᤠᤖᤥ॥

²³ᤁᤖ ᤁᤴ ᤌᤢᤶᤔᤥ ᤁᤠᤰ ᤐᤡᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤸᤗ ᤕᤖᤡᤰ ᤋᤱᤒᤣᤀᤠᤱᤎᤥ ᤂᤡᤏᤡ᤹ᤀᤥ ᤋᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ.

²⁴ᤀᤡᤱᤃᤠ᤹ ᤀᤡᤛ᤻ᤐᤧᤏ ᤗᤠᤈᤣ᤹ ᤐᤣ᤺ᤰᤁᤠᤸᤗᤧ ᤂᤡᤏᤡ᤹ ᤋᤢᤶᤛᤧ ᤖᤥᤔ ᤕᤧᤰᤕᤰᤁᤥ ᤗ᤺ᤶᤔᤠ ᤋᤠ᤺ᤔᤠ ᤀᤠᤏᤡᤱᤘᤠ᤹ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤁᤢᤓᤠ ᤕᤧᤴ ᤛ᤺ᤳᤋᤠᤖ ᤘᤠ᤹ᤀᤠᤀᤠᤱ ᤐᤣ᤺ᤰᤁᤠᤀᤡᤸᤗᤧ ᤕᤠᤶᤔᤥ ᤀᤠᤗᤠᤶᤍᤡ᤺ᤰᤁᤥ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥

²⁵ᤁᤖ ᤀᤠᤸᤗ ᤕᤖᤢᤛᤗᤧᤶᤔᤥᤒᤠ ᤕᤠᤱᤃᤧᤛᤠ᤹ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤀᤰᤂᤤᤕᤠ ᤏᤢ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤛᤢᤵᤛᤢᤒᤠ ᤑᤠ᤹ᤕᤠᤱᤅᤡᤴ ᤛᤠ᤺ᤛᤧ ᤀᤡᤱᤃᤠ᤹ ᤕᤖᤢᤛᤗᤧᤔ ᤐᤣ᤺ᤰᤁᤠᤖ ᤐᤳᤋᤠᤖᤥ॥

²⁷ᤂᤧᤱᤜᤠ᤹ᤖᤧᤃ ᤀᤰᤂᤣ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧᤖᤥ॥ ᤛᤧᤰᤂᤠ᤺ᤸᤗᤧ ᤂᤧᤱᤜᤠ᤹ᤖᤧ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤜᤡᤱᤔᤴᤏᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤁᤧᤒᤥ᤺ᤱᤒᤠᤀᤣ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤗᤠᤶ ᤁᤧᤍᤠ᤺ᤒᤠ ᤛᤢᤏᤠᤀᤡᤱᤅᤡᤸᤗᤧᤴ ᤕᤠᤶᤛᤠᤶᤃᤧᤴ ᤔᤢ᤹ᤀᤡᤛᤠᤶᤔᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤖᤥ॥

²⁸ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤧᤴ ᤑᤠ᤹ᤕᤠᤱᤅᤡᤴ ᤕᤖᤢᤛᤗᤧᤶᤔᤥ ᤋᤣ᤹ᤖᤢᤱᤅᤠᤱ ᤂᤧᤴ ᤔᤧᤄᤥ᤺ᤛᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤱ ᤜᤧᤰᤁᤩᤠᤱ ᤀᤡᤛ᤻ᤐᤧᤏ ᤐᤣ᤺ᤰᤁᤠᤸᤗᤧ ᤂᤡᤏᤡ᤹ᤀᤥ ᤗ᤺ᤴᤏᤠ᤹ ᤋᤠᤀᤠᤖᤥ॥

²⁹ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤂᤪᤡᤛ᤻ᤋᤖᤧ ᤔᤢᤸᤗᤢᤰ ᤁᤢᤔᤢ᤹ᤀᤡᤛᤠᤶᤔᤡᤴᤏᤢ ᤋᤠ᤺ᤀᤠ ᤁᤧᤗ᤹ᤒᤠᤴ ᤏᤡ᤺ᤛᤢᤱᤗᤥ॥

³⁰ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤏᤠ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤀᤠᤈᤥᤃᤧᤶ ᤀᤠᤒᤡᤖᤧᤶᤔᤧ᤹ᤖ ᤀᤡᤱᤃᤠ᤹ ᤀᤡᤏᤥᤃᤧᤴ ᤀᤠᤍᤢᤰᤂᤣᤀᤥ ᤆᤢᤶ ᤀᤠᤔᤧᤳᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥

³¹ᤕᤜᤢᤍᤡᤕᤠ ᤌᤢᤶᤔᤥᤒᤠ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤋᤠᤱᤛᤧ᤺ᤵᤐᤠᤖ ᤜᤧᤰᤁᤩᤠᤱ ᤕᤖᤢᤛᤗᤧᤔᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤋᤣ᤹ᤖᤢᤱᤒᤠ ᤁᤢᤓᤠ᤹ ᤕᤠᤱᤅᤡᤴ ᤂᤧᤱᤜᤠ᤹ᤖᤧ ᤔᤧᤍᤠ᤺ᤰᤋᤢᤖ ᤑᤠ᤹ᤀᤠᤱᤅᤠᤱ ᤋᤢᤘᤠ ᤆᤥᤃᤧᤶ ᤀᤠᤒᤡᤖᤧᤶᤔᤧ᤹ᤀᤥ॥

³²ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤥ ᤛ᤺ᤳᤋᤠᤖ ᤋᤠᤀᤠᤀᤠᤱ ᤛᤥᤛᤥᤖᤡᤰ ᤜᤠᤱᤜᤠᤱ ᤀᤠᤔᤧᤳᤇᤡᤱᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥

³³ᤛᤏᤠᤖᤢᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥