ሉቃሳ 23:1-53

¹ሄዋን ሺቄዳ ኡባቱካ ኢቲፔ ዴንዲዴ፥ ዬሱሳ ጲላፆሳኮ ኣፌዲኖ።

²ኡንቱንቱካ፥ «ሃቢታኒ ኑ ኣሳ ባሌꬂዴ፥ ኣሳይ ሮሜ ቢታ ካዉዋ ቄሳራው ጊራ ኢሜና ማላ ዲጊዴ፥ ቃሲ፥ ‹ታኒ ካቲያ› ያጊሺን ዴሜዶ» ያጊዴ ሞቱዋ ዶሜዲኖ።

³ጲላፆሲካ ዬሱሳ፥ «ሃዎ፥ ኣዪሁዳቱዋ ካቲ ኔኔ?» ያጊዴ ኦቼዳ። ዬሱሲ ዛሪዴ ኣ፥ «ኔኒ ጋ ዴዓሳ» ያጌዳ።

⁴ጲላፆሲ ቄሳቱዋ ካፓቱዋሲኔ ኣሳሲ ኦዲዴ፥ «ታኒ ሃ ቢታኒያ ቦላን ኣይኔ ኢታ ኦሱዋ ዴማ ቤይኬ» ያጌዳ።

⁵ጊዶፔ ኣቲን ኡንቱንቱ፥ «ሃ ቢታኒ ጋሊላፔ ዶሚዴ፥ ሃራይ ኣቶ ሃዋ ጋካናዉካ፥ ዪሁዳ ጋዲያ ኡባ ባሬ ቲሚርቲያን ቃꬂዴ ዴዔ» ያጊዴ ሚኒሲ ኦዴዲኖ።

⁶ጲላፆሲካ ሃዋ ሲሲዴ፥ «ኢ ጋሊላ ኣሴ?» ያጊዴ ኤራናው ኦቼዳ።

⁷ጲላፆሲ ሄሮዲሴ ሞዲያ ጋዲያፔ ዬሱሲ ዬዳዋ ኤሬዳ ዎዴ፥ ሄሮዲሴካ ቃይ ሄዎዲያን ዬሩሳላሜን ዴዒያ ዲራው፥ ኣኮ ዬሱሳ ዬዴዳ።

⁸ሄሮዲሴ ዳሮ ዎዲያፔ ዶሚዴ ዬሱሳ ቤዓናው ኣሞቲ ዴዒያ ዲራው፥ ኣ ቤዔዳ ዎዴ ዳሮፔ ናሼቴዳ። ዬሱሳ ዋሪያ ሲሴዳዋ ዲራው፥ ኢ ኦራꬃባ ኦꬂሺን ቤዓናው ሂዶታን ጋሚዔዳ።

⁹ሄሮዲሴ ዬሱሳ ዳሮባ ኦቼዳ፤ ሺን ዬሱሲ ኣው ኣያኔ ዛሪቤና።

¹⁰ቄሳቱዋ ካፓቱኔ ሙሴ ሂጊያ ታማሪሲያዋንቱ ሄዋን ኤቂዴ፥ ዬሱሳ ሎይꬂ ሞቲዴ ዴዒኖ።

¹¹ሄሮዲሴኔ ኣ ዎታዳራቱ ዬሱሳ ካꬊዴ፥ ኣ ቦላ ቂሊጬዲኖ። ቦንቼቴዳ ማዩዋ ኣ ማዪዚዴ፥ ጲላፆሳኮ ዛሪዴ ዬዴዲኖ።

¹²ሄሮዲሴኔ ጲላፆሲ ሃዋፔ ካሴና ሞርኪያን ዴዒኖ፤ ሺን ሄ ጋላሲ ሲጌቴዲኖ።

¹³ጲላፆሲ ቄሳቱዋ ካፓቱዋ፥ ኣዪሲያዋንታኔ ሃራ ጮራ ኣሳ ኢቲፔ ፄሲዴ፥

¹⁴ሃዋዳን ያጌዳ፥ « ‹ሃ ቢታኒ ኣሳ ማካላቴꬃው ዴንꬄꬄ›፥ ያጊዴ ታኮ ኣሄዲታ፤ ታካ ሂንቴንቱ ሲንꬃን ቢዳ ፄላዴ፥ ሂንቴንቱ ሺሼዳ ሞቱዋን ኢቲ ባላኔ ኣ ቦላን ዴማ ቤይኬ።

¹⁵ቃሲ ሄሮዲሴካ ኣ ቦላን ኣይኔ ዴሚቤና ዲራው፥ ሃ ኑኮ ዛሪ ዬዴዳ፤ ሂንቴንቱ ቤዒያዋዳንካ፥ ሃቢታኒ ኣ ሃይቆ ጋꬂያባ ኣይኔ ኡዲቤና።

¹⁶ሃዋ ዲራው ታኒ ኣ ሙራዴ ቢላና» ያጌዳ።

¹⁸ኣሳይ ኡባይ ኢቲፔ ጊዲዴ፥ «ሃ ቢታኒያ ያ ዲጋ! ባርባና ጊያ ዬሱሳ ኑሲ ቢላ!» ያጊዴ ጫቦቴዲኖ።

¹⁹ባርባን ካታማን ዋላሳ ዴንꬂዴ፥ ኣሳ ዎꬌዳ ዲራው፥ ቃሼቴዳዋ።

²⁰ጲላፆሲ ዬሱሳ ቢላናው ኮዪዴ፥ ኣሳው ላዔꬁዋ ጉጂዴ ሃሳዬዳ።

²¹ሺን ኡንቱንቱ፥ «ማስቃሊያ ቦላ ሚሲማሪያን ꬊሻዴ ካቃ! ካቃ!» ያጊ ዋሴዲኖ።

²²ጲላፆሲካ ሄዜንꬁዋ ኡንቱንታ፥ «ኣያው? ሃቢታኒ ኦꬄዳ ኢታ ኦሱ ኣዬ? ታኒ ኣ ሃይቆ ጋꬂያ ናቁዋ ኣይኔ ኣፔ ዴማቤይኬ፤ ሃዋ ዲራው፥ ኣ ሙራዴ ቢላ ዬዳና» ያጌዳ።

²³ሺን ኡንቱንቱ ባሬንቱ ኮሻ ꬎቁ ኦꬂዴ፥ ካቄታናዳን ዳሪ ዋሴዲኖ። ኡንቱንቱ ዋሱካ ጲላፆሳ ቆፋ ላሜዳ።

²⁴ሃዋ ዲራው፥ ጲላፆሲካ ኡንቱንቱ ኦሻይ ሲማናዳን ዬሱሳ ቦላን ፒርዴዳ።

²⁵ኣሳ ማካላው ዴንꬄꬂዴኔ ሼምፑዋ ዎꬊዴ፥ ቃሼቴዳ ቢታኒያ ቢሌታናዳን ኡንቱንቱ ዎሶ ዲራው፥ ሄ ቢታኒያ ቢሌዳ። ሺን ዬሱሳ ባሬንቱ ሼኒያዳን ኮዮዋ ኦꬃና ማላ፥ ኣꬂ ኢሜዳ።

²⁶ዬሱሳ ኦይቂ ኣፊዴ ዴዒሺን፥ ሲሞና ጌቴቲያ ቄሬና ቢታኒ ሄራፔ ዪዴ ዴዒሺን ዴሚዴ፥ ማስቃሊያ ቶሲዴ ዬሱሳና ባና ማላ ኡዴዲኖ።

²⁷ዳሮ ጮራ ኣሳይኔ ዬኪያ ማጫዋንቱ ጉዬና ካሊኖ።

²⁸ዬሱሲ ጉዬ ሲሚዴ ኡንቱንቶ፥ «ሂንቴኖ፥ ዬሩሳላሜ ማጫዋንቶ፥ ሂንቴንቱ ሁጴዉኔ ሂንቴንቱ ናናው ዬኪቴፔ ኣቲን፥ ታው ዬኮፒቴ፤

²⁹‹ማንꬃ ጊዴዳዋንቱኔ ዬሊቤና ኡሉ፥ ꬋንꬂቤና ꬋንꬃይ፥ ኣንጄቴዳዋንታ› ጌቴቲያ ዎዲ ያናዋ።

³⁰ሄ ዎዲያን፥ ‹ዞዛቶ፥ ኑ ቦላ ዎዲቴ፤ ዙኩላቱዋካ፥ ኑና ቆሲቴ› ያጋኒታ።

³¹ሲሚ ቃዬ ሚꬃን ሃዋዳን ሃኖፔ፥ ሜላ ሚꬃን ዋናናዌ?» ያጌዳ።

³²ዬሱሳና ኢቲፔ ካቄታና ማላ፥ ኢታ ኦሱዋ ኦꬄዳ ሃራ ላዑ ኣሳቱዋካ ኣፌዲኖ።

³³ቄራኔው ጌቴቲያሳ ጋኬዳ ዎዲያን፥ ዬሱሳ ካቄዲኖ። ኢታ ኦꬆዋንታካ፥ ኢቱዋ ኡሼቻና፥ ዮኩዋ ሃዲርሳና ካቄዲኖ።

³⁴ዬሱሲ፥ «ታ ኣቦ፥ ኡንቱንቱ ባሬንቱ ኦꬂያዋ ኤሬና ዲራው፥ ኡንቱንቱ ናጋራ ኣቶ ጋ» ያጌዳ። ኡንቱንቱካ ኣ ማዩዋ ሳማ ዬጌቲዴ ጊሼቲ ኣኬዲኖ።

³⁵ኣሳይ ኤቂ ፄሊሺን፥ ጋዲያ ሞዲያዋንቱ፥ «ሃራንታ ኣሼ፤ ፆሳን ዶሬቴዳ ኪሪስቶሲ ኣ ጊዶፔ፥ ኣኔ ባሬ ሁጲያ ኣሼኔ?» ያጊዴ ቂሊጬዲኖ።

³⁶ቃሲ ዎታዳራቱካ ሺቂዴ ቂሊጬዲኖ፤ ጫሜዳ ዎዪኒያ ኤሳ ኣው ኣሂ ኢሚዴ፥

³⁷«ሃዎ፥ ኔኒ ኣዪሁዳ ካቲያ ጊዶፔ፥ ኔ ሁጲያ ኣሻ!» ያጌዲኖ።

³⁸ሁጲሳናካ፥ «ሃዌ ኣዪሁዳ ካቲያ» ያጊያ ፃፉዋ ፃፌዲኖ።

³⁹ኢታ ኦꬂዴ ካቄቴዳዋንቱፔ ኢቱ፥ ቦሪዲኔ ቶቺዴ፥ «ሃዎ ኔኒ ኪሪስቶሳ ጊዲኪ? ኣኔ ኣ ጊዶፔ፥ ኔ ሁጲያኔ ኑና ኣሻ» ያጌዳ።

⁴⁰ዮኩ ቃይ ኣ፥ «ኔኒ ሃዋ ማላቲያ ፒርዳ ቦላ ዴዓዴካ ፆሳው ያዪኪ?

⁴¹ኑኒ ኪቴቴዳ ባላን ሙራ ኣኪዴ ዴዔቶ፤ ኑሲ ቤሲያ ሙራ ቦላን ዴዔቶ፤ ሺን ሃ ቢታኒ ኢቲ ኢታባኔ ኦꬂቤና» ያጊ ዛሬዳ።

⁴²ኢ ዬሱሳ፥ «ኔኒ ኔ ካዉቴꬃ ዎልቃን ዪያ ዎዴ፥ ታና ቆፓ» ያጌዳ።

⁴³ዬሱሲካ፥ «ታኒ ኔው ቱሙዋ ኦዳይ፥ ሃቼ ታናና ኢቲፔ ጋናቲያን ዴዓናሳ» ያጌዳ።

⁴⁴ሄ ዎዴ ኡሱፑን ሳቴ ጊዲያ ኬና፤ ሄዋፔ ኡዱፑ ሳቲያ ጋካናው፥ ቢታ ኡባ ቦላን ꬉማ ጊዴዳ።

⁴⁵ኣዋይካ ባሬ ፖዑዋ ዲጌዳ፤ ጌሻ ጎሊያ ጋሪዱካ ፔꬌቲዴ ላዑዋ ኬሴዳ።

⁴⁶ዬሱሲካ ዳሮ ꬎቁ ጌዳ ቃላን ዋሲዴ፥ «ታ ኣቦ፥ ታኒ ታ ሼምፑዋ ኔ ኩሺያን ኣꬃ ኢማይ!» ያጊ ሲሞዋፔ ጉዪያን ኢ ሃይቄዳ።

⁴⁷ፄቱዋ ካፑ ሃኔዳ ዬዉዋ ቤዔዳ ዎዴ፥ «ሃ ቢታኒ ቱማካ ፂሎ ኣሳ» ያጊዴ ፆሳ ጋላቴዳ።

⁴⁸ሃዋ ቤዓናው ኢቲሳ ሺቄዳ ኣሳይ ኡባይ ሃኔዳ ዬዉዋ ቤዒዴ፥ ባሬንቱ ቲራ ባቂዴ ሲሜዲኖ።

⁴⁹ዬሱሳ ኤሪያ ኣሳይ ኡባይኔ ጋሊላፔ ዶሚዴ ኣ ካሌዳ ማጫዋንቱ ሃዋ ፄሊዴ፥ ሃኩዋን ኤቄዲኖ።

⁵⁰ኣዪሁዳ ሻንጋቱዋ ጊዴዳዋንቱፔ ኢቱ፥ ዮሴፋ ጌቴቲያ ሎዓኔ ፂሎ ቢታኒ ዴዔ።

⁵¹ሃ ቢታኒ ሻንጋቱዋ ማቁዋኔ ኡንቱንቱ ኦሱዋን ኢቲፔቴꬃ ኦꬂቤና። ፆሳ ካዉቴꬃ ዩሳ ሂዶታን ናጊዴ ዴዔ።

⁵²ዮሴፎካ ጲላፆሳኮ ቢዴ፥ ዬሱሳ ኣኃ ኣካናው ዎሴዳ።

⁵³ኣካናዳን ጌቴቶዋፔ ጉዬ፥ ኣኃ ቦላፔ ዎꬂዴ፥ ሎዖ ሞጉዋ ማዩዋን ፃፂዴ፥ ሹቻፔ ዎጬቲዴ ሜꬌቴዳ፥ ኦኒኔ ካሴ ሞጌቲ ቤና ኦላ ጊዶን ዎꬄዳ።