San Lucas 23:1-53

¹Chiy hóracqui güesú iratecdeb, güenédeb Jesús lo Pilat.

²Ruy guzulo rcuaquiadeb laany dixú, rniideb: —Dunnɨ bdxialnɨ bɨnquɨ cayunbɨ engany de bniety ladxnɨ. Rniib dec quɨt náti par idillynɨ xte impuest lo gobernador xte Roma, ne ziyza rniib dec laab náb Crist ne rey.

³Chiy gunabdiidx Pilat laany: —¿Ta liúy Rey xte de bniety Israel? Jesús cuaibny: —Guldícbiu narelay.

⁴Chiy Pilat raipbɨ de bxoz ni rnabee de bxoz cun irate de bɨny: —Xíteete xfalti bnietré quɨt rdxialtia.

⁵Per laadeb güelaaru guniideb mazru diip: —Laab cayunbɨ engany de bniety iduibte nez Judea cun de cos ni rseedbɨ de bniety. Guzulob nez Galilea anre ax cayunbɨ ziy nezré.

⁶Chi bindiag Pilat ziy, gunabdiidxbɨ laadeb la Galilea ná ladx Jesús.

⁷Ne chi guniideb dec laany nány bniety Galilea, ax bxiaaldbɨ laany lo Herodes ni rnabee Galilea, te pur láani de dxiqui zuguaaza Herodes Jerusalén.

⁸Chi guná Herodes Jesús quesentiand rzaclaazbɨ te pur agulal rcaazbɨ iniáb laany. Abindiagbɨ rzeet de bniety laany, ne canuub iniáb gúnny tuby milagrɨ.

⁹Zieny de cos gunabdiidxbɨ laany, per Jesús xíteete quɨt cuaibtiny.

¹⁰Néza de bxoz ni rnabee de bxoz zuguaa ruy, cun de maistrɨ ni nán ley, quesentiand purad rcuaquiadeb laany dixú.

¹¹Chiy Herodes cun de xsuldadbɨ quesentiand rnia baandeb trat laany, ne baandeb burlɨ laany. Bguacudeb laany de lady zaac saa ni racu de rey. Chiy Herodes bxiaaldbɨ laany stuby lo Pilat.

¹²Ne dxiqui guzulo rchaa Herodes Pilat, per anste gac ziy laadeb bdxichnesaadeb.

¹³Chiy Pilat bchasaab de bxoz ni rnabee de bxoz cun de gurtisy cun de bɨny,

¹⁴ax guniib: —Laat bednét bnietré. Guniit dec cayunbɨ engany de bniety. Per nez lot agunabdiidxab ne xíteete falt xtenbɨ quɨt nidxialtia zec ni rniit pur laab.

¹⁵Ziygacza rey Herodes, pur ningui bzieecquibɨ bnietquɨ luaa. Agunalot xíteete mal gady gúntib par gatybɨ.

¹⁶Anre gúna castigubɨ chiyru ildaab.

¹⁷Pilat lo de dxi laníqui rldáb tuby pres zec ni guc costumbrɨ.

¹⁸Per iratedeb guzulo rbɨxtiadeb: —¡Gudinxúbiu bɨnquɨ! ¡Bldábiu Barrabás!

¹⁹Ne Barrabás guluudebɨy láani lizguiib pur ni baaniy tuby didxguidx Jerusalén, ne pur gudinxúngui bɨny.

²⁰Pilat rcaazbɨ nildáb Jesús, ax guninéb laadeb stuby güelt,

²¹per laadeb güelaaru gurɨxtiadeb: —¡Bcuaabiub lo cruzy! ¡Bcuaabiub lo cruzy!

²²Ni rac chon güelt raipy Pilat laadeb: —Per, ¿xill mal abaany bnietquɨ? Nare xíteete quɨt xi xfaltib rdxiala par gatybɨ. Gúna castigubɨ chiyru ildaab.

²³Per laadeb güelaaru gurɨxtiadeb, raipdeb Pilat dec ícuaab Jesús lo cruzy. Ne tant ni rbɨxtia de bɨny cun de bxoz ni rnabee de bxoz, baandeb gan guc zec ni rcaazdeb.

²⁴Pilat guzigueldbɨ baanbɨ zec ni rcaazdeb.

²⁵Ziy xquel guc baanbɨ zec ni gunii de bɨny. Bldáb Barrabás ni guu láani lizguiib pur didxguidx ne pur gudinxúb bɨny, ax baanbɨ entriagu Jesús par bannédeb laany zec ni bcaazdeb.

²⁶Chi zénedeb Jesús par icany lo cruzy, gunaazdeb tuby bniety ni zá nez Cirene laab bdialáb Simóny. Zectisy ni záb nez lo guiix ax gunabeedeb laab par gucnéb biaab cruzy xte Jesús, guzanaldnébny.

²⁷Zienguilliú bniety guzanald laany, ne zieny de bniety gunaa ruun ne rbɨxtiadeb pur rgádeb laany.

²⁸Per Jesús bguiaany lodeb ax raipny laadeb: —De gunaa Jerusalén, quɨt ruuntɨ pur nare, gulguun pur lagac laat ne pur de lliintɨ.

²⁹Te pur teru idzɨny dxi ni iniit: “Xíclabaa de gunaa ni quɨt nialeeti nicáa bdoo, de ni quɨt níiuti llíinni, de ni quɨt nitiioti bdoo.”

³⁰Chiy sulo gaipy de bniety de dany: “Gulxaat quian”, ax gaipdeb de lóm: “Gulcuaats dunnɨ.”

³¹Ne anre narecla cayunnédeb zeec, ¿latixcu laat tuguan xa teedtɨ?

³²Ne néza tiop gubaan zénedeb par ica lo cruzy cun Jesús.

³³Chi bdzɨndeb rut lá Calver, bcuaadeb Jesús lo cruzy, cun iropte de gubaanqui: tubybɨ cua lad naldí stubybɨ cua lad rbez.

³⁴Ne chi cacuaadeb Jesús lo cruzy, ax guniiny: —Xtada, baanbiu perdón de bɨnquɨ, te pur quɨt gántideb xing rundeb. Chiy de suldadqui gudzɨtdeb dád quia xab Jesús par bgaaizni lodeb.

³⁵Chiy de bɨny rdxalodeb zuguaadeb ruy, ne axt de gurtisy run burlɨ laany, raipdeb laany: —Gucnéb stuby de bniety. Anre su gacnéb lagac laab, belati guldípacbɨ laabɨy náb Crist ni bcuabee Dios.

³⁶Néza de suldadqui run burlɨ laany, rbigaxdeb ax rdeeddeb laany vinagrɨ

³⁷raipdeb laany: —Belati liú noo Rey xte Israel, bldá lagac liú.

³⁸Ne cua tuby letrer nez quiany cun diidx griego, diidx latín ne cun diidx hebreo. Letrerqui rnii: BNIETRÉ NÁ REY XTE DE BNIETY ISRAEL.

³⁹Chiy tuby de gubaan ni cuaza lo cruzy cun laany raipbɨ laany de mal diidxré: —Belati liú noo Crist, bldá liú, ne bldáza dunnɨ.

⁴⁰Per stubybɨ gudildnéb xcumpnierbɨqui, raipbɨ laab: —¿Ta quɨtrul rdxibiu Dios masquɨ saagac castiguquɨ cadeedu?

⁴¹Dunnɨ riáldquɨpacnɨ guelziic, te pur zeec riáld idillynɨ pur de cos ni abdxannɨ. Per bnietquɨ xíteete mal gady gúntibɨ.

⁴²Chiy raipbɨ laany: —Jesús, güenelaazbiu nare chi acanabeebiu.

⁴³Ax raipy Jesús laab: —Nare rniia liú dec andxiacré suguaníu nare llayabaa.

⁴⁴Chi guc laidxi, chiy iduibte lo guɨchliu bcay, axtquɨ rca chon gudxi.

⁴⁵Bcay gubidx, ne cortin ni guzaaiby laniudoroo xte Jerusalén gullaani, iruldti gucni.

⁴⁶Chiy Jesús gurɨxtiany: —Xtada, laznaabiu rsáana spírit xtena. Ne chi guniiny ziy, ax gutyny.

⁴⁷Chi guná capitán xte de suldad romanqui irate zec ni guc, ax guniib de diidx zaac par Dios. Laab guniib: —Didxldícazaquɨy dec xíteete malti quɨt baanti bnietquɨ.

⁴⁸Irate de bniety ni zuguaa ruy chi gunádeb irate zec ni guc, zégacdeb rgapdeb rulazdoodeb pur guelnalas ni bziiendeb.

⁴⁹Per irate de bniety ni rumbee Jesús, cun de bniety gunaa ni guzanald laany desde Galilea, zit güesuguaadeb par bguiaadeb irate de cosré.

⁵⁰Guu tuby bniety nguiu ni guc güen ne baanbɨ zec ni riáld. Laab bdialáb Gusé. Ladxbɨ guc guɨdx ni lá Arimatea, tuby guɨdx xte Judea. Laab gucbɨ tuby gurtisy xte de bniety Israel.

⁵¹Guséqui canuub guelrnabee xte Dios, ningui quɨt néti laab níiub xlad de ni gudinxú Jesús.

⁵²Chiyru güeninéb Pilat par güenaabbɨ xcuerpɨ Jesús.

⁵³Chi gulull bldiatbɨ xcuerpɨny lo cruzy, ax btuuibɨny tuby sábnɨ zaac. Chiy güecuaatsdebny láani tuby baa ni gudaanydeb láani tuby guia, rut ruteete gady tu igaatsti.