ሃዋሬታ ኦሱዋ 7:5-57

⁵ኢ ሃ ቢታፌ ሃሪ ኣቶሺን ቶሆይ ዬꬊያ ቤሲካ ኣብራሃሜስ ኢሚቤና። ሺን ናዒ ኢያው ባይና ዎዴ ፆሳይ ሃ ቢታ ኢያዉኔ ኢያ ሼሻስ ላታ ኦꬂዲ ኢማናይሳ ቃላ ጌሊስ።

⁶ፆሳይ ኣብራሃሜኮ፥ ‹ኔ ሼሻይ ሃራ ቢታን ኢማꬃቴꬃን ዳና፤ ያን ኦይዱ ፄቱ ላይꬂ ኤንቲ ኣይሌቴꬃን ሃሬታና።

⁷ሺን ታኒ ኔ ሼሻ ሃሪያ ዴሪያ ቦላ ፒርዳና። ሄሳፌ ጉዬ፥ ኤንቲ ሄ ቢታፌ ኬዪዲ ሃይሳን ታው ጎይናና› ያጊስ።

⁸ፆሳይ ኣብራሃሜ ሼሻይ ቃፃሬታና ሜላ ኢያራ ጫቂን፥ ዪሳቂ ዬሌቲዳ ሆስፑንꬃ ጋላሳን ቃፃሪስ። ዪሳቂ ያይቆባ ቃፃሪስ፤ ቃሲ ያይቆቢ ታማኔ ናምዑ ባ ናይታ፥ ኑ ኣዋታ ማይዛታ ቃፃሪስ።

⁹«ያይቆባ ናይቲ ዮሴፋ ቃናቲዲ ጊብፄ ቢታን ኣይሌቴꬃስ ባይዚዶሶና፥ ሺን ፆሳይ ኢያራ ዴዔስ።

¹⁰ኢያ፥ ኢያ ዋዬ ኡባፌ ኬሲስ። ጊብፄ ካዉዋ ሲንꬃን ሳባኔ ጪንጫቴꬂ ኢያው ኢሚስ። ጊብፄ ካዎይ ዮሴፋስ ጊብፄ ቢታኔ ባ ኬꬃ ኡባ ኣይሳናዳ ሃላቃቴꬂ ኢሚስ።

¹¹«ጊብፄ ቢታኒኔ ካናኔ ቢታ ኡባን ኮሺ ጌሊዲ ዳሮ ኣሳ ኡንዔꬂስ። ሄ ዎዴ ኑ ማይዛቲ ካꬂ ዴማናው ዳንዳዒቦኮና።

¹²ያይቆቢ ጊብፄ ቢታን ካꬂ ዴዔይሳ ሲዒዲ ኑ ኣዋታ ኮይሮ ያ ዬዲስ።

¹³ናምዓንꬆ ቡሳን ዮሴፊ ባ ኢሻታስ ባናቴꬃ ኤሪሲስ። ጊብፄ ካዎይካ ዮሴፋ ሼሻ ኤሪስ።

¹⁴ዮሴፊ ባ ኣዋ ያይቆባኔ ባ ዳቦ ኡባ፥ ላፑን ታማኔ ኢቻሹ ኣሳ ባኮ ያና ሜላ ኪቲዲ ኤሂሲስ።

¹⁵ያይቆቢ ጊብፄ ቢታ ዎꬊስ፤ ኢኔ ኢያ ናይቲ ያን ሃይቂዶሶና።

¹⁶ኤንታ ኣሃይ ሄ ቤሳፌ ሴኬሜ ቢታ ቶኬቲዲ ቢዲ፥ ያን ኣብራሃሜይ ሃሞሬ ናይታፔ ዳሮ ቢራን ሻሚዳ ዱፎን ሞጌቲስ።

¹⁷«ሺን ፆሳይ ኣብራሃሜስ ኢማና ጊዳይሳ ፖሊያ ዎዴይ ጋካናው ማቲዳ ዎዴ ጊብፄ ቢታን ዴዒያ ኑ ኣሳይ ዳሪ ዳሪ ቢስ።

¹⁸ሄሳፌ ጉዬ፥ ዮሴፋ ኤሮና ሃራ ካዎይ ጊብፄ ቢታን ካዎቲስ።

¹⁹ሄ ካዎይ ኑ ዜሬꬃ ጌኒዲ ጉꬃ ናይቲ ሃይቃና ሜላ ኤንታ ካሬ ኬሲ ዬጋና ሜላ ኑ ኣዋታ ኡንዔꬂስ።

²⁰«ሄ ዎዴ ሙሴይ ዬሌቲስ፤ ኢ ፆሳ ሲንꬃን ዳሮ ሎዖ ናዓ። ባ ኣዋ ኬꬃን ሄꬑ ኣጌና ጋካናው ዲጪስ።

²¹ሙሴይ ዎራ ሆሌቲዳ ዎዴ ጊብፄ ካዉዋ ናዒያ ዴማ ኤካዳ ባ ናዓ ኦꬃዳ ኢያ ዲቻሱ።

²²ሙሴይ ጊብፄታ ጪንጫቴꬃ ኡባ ታማሪዲ ኦዳኒኔ ኦሶን ሚኖ ኣሲ ጊዲስ።

²³«ሙሴስ ላይꬃይ ኦይታማ ኩሚዳ ዎዴ ባ ኢሻታ፥ ኢስራዔሌታ ቤዓናው ባ ዎዛናን ቆፒስ።

²⁴ኢስራዔላታፔ ኢሱዋ ጊብፄ ኢሶይ ቆሂሺን ቤዒዲ ሄ ኢስራዔሌ ኡራ ማዲዲ፥ ሄ ቆሂዳ ጊብፄ ኡራ ዎꬊዲ ኩሼ ዛሪስ።

²⁵ሙሴይ ባ ኢሻታ ባ ባጋራ ፆሳይ ኣሻናው ሃኔይሳ ኤንቲ ኣኬካና ጊዲ ቆፒስ፥ ሺን ኤንቲ ኣኬኪቦኮና።

²⁶«ዎንቴꬃ ጋላስ ናምዑ ኢስራዔሌ ኣሳቲ ኢሶይ ኢሱዋራ ዋꬌቲሺን ዴሚዲ ኤንታ ሲጌꬃናው ኮዪዲ፥ ‹ኣሳቶ፥ ሂንቴ ኢሻንታ፤ ኣይስ ኢሶይ ኢሱዋ ቆሄቲ?› ያጊስ።

²⁷«ሺን ባ ላጊያ ቆሄይሲ ሙሴኮ፥ ‹ኔና ኑ ቦላ ሃሬይሳኔ ዳይና ኦꬂዳይ ኦኔ?

²⁸ኔኒ ዚኔ ጊብፄ ኡራ ዎꬊዳይሳዳ ታና ዎꬋናው ኮያይ?› ያጊዲ ሙሴ ሱጊ ዬዲስ።

²⁹ሙሴይ ሄሳ ሲዒዳ ዎዴ ጊብፄፌ ቤቲዲ ሚዲያሜ ቢታን ቤቴ ኣሲ ጊዲዲ ዴዒሼ ናምዑ ኣዴ ናይታ ዬሊስ።

³⁰«ጎዳ ኪታንቾይ ኦይታሙ ላይꬃፌ ጉዬ ሲና ዴሪያ ማታን ዴዒያ ባዞ ቱሺያ ጊዶን ኤፂያ ታማ ላጮ ጊዶን ሙሴስ ቤንቲስ።

³¹ሙሴይ ባ ቤዒዳይሳን ማላሌቲዲ፥ ሎይꬂ ቤዓናው ቱሺያ ማቲ ሺቂዲ ዴዒሺን፥ ጎዳ ቃላይ፥

³²‹ታኒ ኔ ኣዋታ፥ ኣብራሃሜ ፆሳ፥ ዪሳቃ ፆሳ፥ ያይቆባ ፆሳ› ያጊሼ ሙሴኮ ዪስ። ሙሴይ ያሻን ኮኮሪዲ ፄላናው ዳንዳዒቤና።

³³«ጎዳይ ሙሴኮ፥ ‹ኔኒ ኤቂዳ ቢታይ ጌሺ ጊዲያ ጊሾ ኔ ቶሁዋን ዴዒያ ጫማ ኬሳ።

³⁴ታኒ ጊብፄን ዴዒያ ታ ኣሳ ኡንዔቴꬃ ቤዓስ። ኤንታ ዋሱዋ ሲዓዳ ኤንታ ኣሻናው ዎꬋስ። ሃዒ ሃያ! ታኒ ኔና ጊብፄ ኪታና› ያጊስ።

³⁵«ኢስራዔሌቲ ሙሴ፥ ‹ኔና ኑና ሃሬይሳኔ ዳይና ኦꬂዳይ ኦኔ?› ያጊዲ ኢፂዳይሳ ቱሺያ ጊዶን ኢያው ቤንቲዳ ኪታንቹዋ ባጋራ ሃሬይሳኔ ኣሼይሳ ኦꬂዲ ፆሳይ ኪቲስ።

³⁶ሙሴይ ኢስራዔሌታ ጊብፄፌ ኬሲዲ ማላሊሲያባታኔ ኦራꬃባታ ጊብፄ ቢታኒኔ ዞዖ ኣባን ኦꬂዲ ኤንታ ኦይታሙ ላይꬂ ባዞ ቢታን ካሌꬂስ።

³⁷«ኢስራዔሌ ኣሳኮ፥ ‹ፆሳይ ታና ዴንꬂዳይሳዳ ሂንቴ ሼሻ ጊዶፌ ታ ሜላ ናቤ ሂንቴው ዴንꬃና› ያጊዳይ ሄ ሙሴ።

³⁸ባዞ ቢታን ሺቂዳ ኢስራዔሌ ኣሳራ ዴዒዳይሲ፥ ኑ ኣዋታራኔ ሲና ዴሪያ ቦላ ኢያው ኦዲዳ ኪታንቹዋራ ዴዒዳ ሙሴይ ኢያ። ያቲዲ፥ ፆሳ ዴዖ ቃላ ኑስ ኢማናው ኤኪስ።

³⁹«ሺን ኑ ማይዛቲ ሙሴስ ኪቴታናው ዶሲቦኮና፤ ኢያ ኢፂዲ ጉዬ ጊብፄ ሲማናው ኣሞቲዶሶና።

⁴⁰ቃሲ ኣሮናኮ፥ ‹ኑና ካሌꬂያ ፆሳታ ኑስ ኦꬃ። ኣይስ ጊኮ፥ ሃይሲ ኑና ጊብፄፌ ኤሂዳ ሙሴይ፥ ዋኒዳኮ ኑኒ ኤሮኮ› ያጊዶሶና።

⁴¹ሄ ዎዴ ማሪ ዳኒሲዲ ኤቃ ኦꬂዶሶና። ሄ ኤቃስ ያርሾ ያርሺዲ ባንታ ኩሼን ኦꬂዳ ኦሱዋን ኡፋይቲዶሶና።

⁴²ሺን ፆሳይ ኤንታው ዞኮ ዛሪስ። ኤንቲ ሳሎ ፆሊንቶታ ጎይናና ሜላ ኤንታ ዬጊ ኣጊስ። ናቤታ ማፃፋን፥ ‹ኢስራዔሌ ኣሳው፥ ኦይታሙ ላይꬂ ኩሜꬂ ባዞ ቢታን ሹኪዳ ሜሂያኔ ያርሺዳ ያርሹዋ ታው ያርሺዴቲ?

⁴³ሂንቴ፥ ሂንቴው ጎይናናው ኬሲዳ ኤቃኔ ሞሎኬ ዱንካኒያ ሬፋና ጊያ ሂንቴ ፆሳ ፆሊንቶ ሚሲሊያ ቶኪዴታ። ታኒ ሂንቴና ባቢሎኔፔ ሂኒ ባጋ ዬዳና› ጌቴቲዲ ፃፌቲስ።

⁴⁴«ኑ ኣዋታስ ባዞ ቢታን ማርካ ዱንካኔይ ዴዔስ። ኢያካ ፆሳይ ሙሴ ኪቲዳይሳዳኔ ኢያ ቤሲዳይሳዳ ኦꬂስ።

⁴⁵ቃሲ ኑ ኣዋቲ ሄ ዱንካኒያ ባንታ ኣዋታፔ ኤኪዲ ፆሳይ ካሴ ዬዴꬂዳ ኣይሁዴ ጊዶና ኣሳ ቢታ ኦይኪዳ ዎዴ ኢያሱራ ያ ኤኪዲ ጌሊዶሶና። ሄ ዱንካኔይ ዳዊቴ ዎዴ ጋካናዉካ ሄ ቤሳን ዴዒስ።

⁴⁶ዳዊቴይ ፆሳን ሳቤቲስ። ቃሲ ያይቆባ ጎዳይ ዴዓና ኬꬃ ኬፃናው ፆሳ ዎሲስ።

⁴⁷ሺን ኢያው ኬꬃ ኬፂዳይ ሶሎሞኔ።

⁴⁸«ሃኖሺን፥ ኡባፌ ቦላ ፆሳይ ኣሲ ኬፂዳ ኬꬃን ዴና። ናቤይ ጊዳይሳ ሜላ፥

⁴⁹‹ሳሎይ ታ ኣራታ፥ ሳዓይካ ታ ቶሆይ ዬꬊያሶ። ያቲን፥ ታው ሂንቴ ኣይ ሜላ ኬꬂ ኬፃኔ? ዎይኮ ታኒ ሼምፒያሶይ ኣዉኔ?

⁵⁰ሃ ኡባ ታ ኩሺያን ኦꬃቢኪና?› ያጌስ ጎዳይ።

⁵¹«ሂንቴ ዋኒዳ ሲዖና ኣሴ? ሂንቴ ዎዛናይ ፆሳ ቃላ ኤካናው ኣይስ ኢፂዴ? ሂንቴ ሃይꬃይ ኣይስ ቱሊዴ? ሂንቴ፥ ሂንቴ ኣዋታꬆ ኡባ ዎዴ ጌሻ ኣያናራ ኤቄቴታ።

⁵²ናቤታ ጊዶፌ ሂንቴ ኣዋቲ ጎዶናይ ኦኔ? ፆሳ ናዓይ፥ ፂሎይ ያናይሳ ካሴቲዲ ኦዲዳይሳታ ዎꬊዶሶና። ሃዒ ሂንቴ ኢያ ኣꬂ ኢሚዲ ዎꬊዴታ።

⁵³ሂንቴ ኪታንቹዋ ኩሼፔ ፆሳ ሂጊያ ኤኪዴታ፥ ሺን ኪቴቲቤኬታ» ያጊስ።

⁵⁴ኤንቲ ሄሳ ሲዒዳ ዎዴ ባንታ ዎዛናን ኢስፂፋኖሴ ቦላ ዳሮ ዪሎቲዲ፥ ባንታ ሜቴርሻ ሳፂዲ ማንዲዶሶና።

⁵⁵ሺን ኢስፂፋኖሴይ ጌሻ ኣያናን ኩሚዲ፥ ሳሎ ፑዴ ፄሊዲ፥ ፆሳ ቦንቹዋኔ ዬሱሳ ፆሳ ኡሻቻ ባጋን ኤቂዳይሳ ቤዒስ።

⁵⁶«ሄኮ፥ ታኒ ሳሎይ ዶዬቲን፥ ኣሳ ናዓይ፥ ፆሳ ኡሻቻ ባጋን ኤቂዳይሳ ቤዓይስ» ያጊስ።

⁵⁷ቃላ ꬎቁ ኦꬂዲ ዋሲሼ፥ ባንታ ሃይꬃ ኦይኪዲ ኢሲፌ ኢያኮ ዎፂዶሶና