APOSETOLO EDIA KARA 7:5-57

⁵A tano sisina taina se henia; oibe, aena ihadaina gabuna taina asine henia. Ḡau tamona, e gwau henia hamata do baine henia, bona ia murinai garana danu baine henidia. Una negana ai Abraham na asi natuna.

⁶Dirava ese ma e hamaoroa eto, garana loḡora idau tano ai bae ha noho, bena una tano taudia ese isiaidia ilao-henidia taudia ai bae halaodia, bona bae hahisidia laḡani sinahu-hani.

⁷Dirava ma eto, Hesiai taudia ai baine halaodia besena na lau ese baina hahemaoro henia; gabeamo idia na bae raka lasi, iniseni ai bae toma henigu diho.

⁸Peritome taravatuna danu e henia. Taunabunai, Abraham ese Isaak e havaraia, bona dina ihataurahanina ai e peritomea. Isaak ese danu Iakob e havaraia; bona Iakob ese eda iduhu ikwaradia taudia gwauta-raruosi e havaradia.

⁹Hari iduhu ikwaradia taudia ese Iosef e vaḡeḡe henia, Aigupto taudia ediai e hoia. A Dirava ese e bamoa,

¹⁰bona ena hisihisi iboudiai amo e hamauria; hahenamo bona aonega danu e henia, Farao, Aigupto pavapavana, vairanai; bena Farao ese siahu e henia, Aigupto tanona bona iena ruma taudia baine lohiadia.

¹¹A doe be Aigupto idoinai bona Kanaan ai e vara, hisi ani bada danu; bena seneda e hitolodia maseva.

¹²Iakob e kamaonai Aigupto na mai uitina, bena ia ese seneda e siaidia lao, nega gini-gunana.

¹³Nega iharuana ai Iosef sibona ese kakana e hahedinarai henidia; bona Iosef besena haridia Farao danu e kamonai.

¹⁴Bena Iosef ese gwau-kau e siaia, tamana Iakob bona varavarana iboudiai danu e vavedia, taunimanima hitu-ahui laima.

¹⁵Bena Iakob na Aigupto ela; unuseni ai e mase; bona seneda danu unuseni ai e mase.

¹⁶Bena Sekem e huadia lao, gara lalonai e atodia; una gara na Abraham ese Hamoro natuna edia amo silver monidia ai e hoia.

¹⁷Dirava ena gwauhamata Abraham enai ihamomokanina negana e kahirakahira ai, taunimanima Aigupto ai vada e vara rohorohova bona e hutumava;

¹⁸ema bona pavapava idauna ta Aigupto vada e lohiaia; ia na asi dibana Iosef.

¹⁹Ia ese seneda e dibaḡanidia bona e hahisidia; bona e haduadia, natudia karukarudia bae negedia, bena bae mase.

²⁰Una negana ai Mose vara, raho-namo merona bena hua toi tamana ena ruma ai e ubua.

²¹Bena e negea; to Farao natuna kekenina ese e abia, natuna ai e haloa.

²²Taunabunai, Aigupto taudia edia aonega idoinai na Mose e hadibmaia; bena ena hereva bona ena ḡaukara na mai siahudia.

²³Ena laḡani e hari-ahui negana ai lalona vada e hadaia, varavarana Israel taudia baine igodia ita eto.

²⁴Tau ta e itaia, Aigupto tauna ese e hadikaia, bena e durua, Aigupto tauna e alaia mase.

²⁵Ia banava eto varavarana lalodia bae parara, Dirava ese ia imana amo baine hamauridia, to asi dibadia.

²⁶Kerukeru tatau rarua e heatuva ai dekediai e kau, bena ia ese e hamarumarudia toho, eto “Tatau e, umui raruosi na varavara; dahaka dainai o hahedika hehenimu?”

²⁷A varavarana e hadikaiava tauna ese e doria oho, eto “Oi be daika ese emai lohia bona emai hahemaoro tauna ai vada e halaomu”?

²⁸O uramu bavalagu a, varani Aigupto tauna o alaia na heto?”

²⁹Mose ese una hereva e kamonai, bena e heau ela, Midian tanona ai eha noho, unuseni ai natuna mamaruanedia rarua e havaradia.

³⁰Laḡani hari-ahui e ore, bena aneru ta ese tano ḡaḡaena ai, ororo ladana Sinai ai, e hahedinarai henia, au ḡiniḡini e arava hururuna lalonai.

³¹Mose ese e itaia, bena e hoa. Itana totona e raka kahiva ai Lohiabada gadona ese e hereva henia, eto,

³²Lau na tubumu tamamu edia Dirava; Abraham bona Isaak bona Iakob edia Dirava. Mose na e heude-heudle, au iraraitaona vada e gari.

³³bena Lohiabada ese e hamaoloa, eto, Emu tamaka a daki oho, badina be o ginimu gabuna na tano helaḡana.

³⁴Momokani, egu taunimanima Aigupto ai edia hisihisi vada na itaia, edia ḡanaḡana danu vada na kamonai, bena ihamauridia totona vada na diho nama. Harihari baina siaimu, Aigupto baola.

³⁵Hari Mose na idia ese e ihi-ihiraia, eto “Daika ese emai lohia bona emai hahemaoro tauna ai vada e halaomu?”: Mose na bunai Dirava ese e siaia, edia lohia bona edia hahemaoro tauna ai vada e halaoa; bona au ginigini lalonai e itaia aneruna ese e durua.

³⁶Una tau ese e hakaudia lasi, hoa karadia bona toa danu e karava Aigupto ai bona Davara Kakakakana ai bona tano ḡaḡaena ai, laḡani hariahui lalodiai.

³⁷Una Mose ese danu Israel taudia e hamaorodia, eto, Dirava ese peroveta tauna ta do baine haginia umui emui ai, varavaramui edia amo, lau bamogu.

³⁸Una tau danu tano ḡaḡaena ai hegogo lalonai, bona Sinai ororona dorina ai ia ida e hereva-hereva aneruna ida, bona ita seneda ida, e nohova. Ia ese mauri herevadia e abi, ita ma baine henida helaoreana.

³⁹A seneda na ia ikamonai-henina asie urava; e dadaraia, bona lalodia ai Aigupto ma e ura henia louva.

⁴⁰Bona idia ese Aaron e hereva henia, eto “Dirava haida a karadia ita eda, ita vairadai bae raka; badina be asi dibada hari Mose, Aigupto amo e hakauda lasi tauna, na ede eha heto”.

⁴¹Una negana ai idia ese boromakau natuna laulauna ta e karaia, bena boubou ḡauna danu una kaivakuku vairanai e atoa; imadia ai e kara ḡaudia na e moalelaiva.

⁴²Bena Dirava na edia amo e raka oho, sibodia guba ḡaudia bae toma heni diho, peroveta taudia edia buka ai e torea heḡereḡerena eto, Israel taumui e, laḡani hari-ahui tano ḡaḡaena ai o alava boromakaudia bona boubou ḡaudia na vairagu ai o ato a?

⁴³Lasi, Molok ena dabua dubuna, bona dirava ta ladana Refan ena hisiu, o loalaiva, laulaudia bunu o karava, ba toma henidia diho helaoreana. Babulon unukahana do baina laohaimui.

⁴⁴Dabua dubuna, taravatu ihahedinaraina ḡauna, na seneda ese tano ḡaḡaena ai e abia; e karaia Dirava ese Mose e haduaia bona Mose ese oromana e itaia heḡereḡerena.

⁴⁵Bona seneda haida, gabeai e vara taudia, ese ma e abia, Iosua negana ai e huaia mai, idau bese taudia edia tano iabina negana ai; unu idau bese taudia na Dirava ese seneda vairadia amo e luludia ohova, ema bona David negana.

⁴⁶David ese Dirava ena hahenamo e abia, bona e noinoi, Iakob ena Dirava ena dubu baine karaia eto.

⁴⁷To ena dubu ihaginina be Solomon.

⁴⁸Ḡau tamona, Herea Mikamika na taunimanima imadia ese e karava rumadia ai se nohomu; peroveta tauna ena hereva heḡereḡerena eto,

⁴⁹Lohiabada na e tomu, Guba be egu helai gabuna, Tanobada be aegu ihadaidia ḡauna, Ruma edehetomana ba karaia lauegu? Egu laḡa-ani gabuna be edena?

⁵⁰Ini ḡau iboudiai na imagu amo asina kara a?

⁵¹Aio auka taumui e, lalomui bona taiamui e kara asie peritomedia taudia na heheto, umui ese nega idoinai Lauma Helaḡa o laoa ahumu. Tamamui edia kara na umui ese danu doini o badinamu.

⁵²Peroveta tauna be daika umui senemui ese asie daḡedaḡe henia? Kara Maoromaoro Tauna maina e gwauraia gunava taudia na idia ese e aladia mase; harihari umui ese ia taona vada o torea, bona vada o alaia mase.

⁵³Umui na aneru ese e heni taravatuna vada o abia, to asio badinaia.

⁵⁴Idia ese unu hereva e kamonai ai, e badu dikadika, gadigadidia danu e haheḡiri henia.

⁵⁵A Stefano na Lauma Helaḡa ese e rohea; bena guba ai e gaga dae, Dirava hairaina e itaia, bona Iesu danu, Dirava idibana kahana ai gini.

⁵⁶Bena ia eto, Guba na itaiamu, e hekehomu, Taunimanima Natuna danu na itaiamu, Dirava idibana kahana ai gini.

⁵⁷Bena idia na e lolo badabada, bona taiadia e kodobe. Bena dekena e heau lao, e abia,