Text copied!
CopyCompare
Buk Baibel long tokples Kandas - Aposel - Aposel 7

Aposel 7:5-57

Help us?
Click on verse(s) to share them!
5O God ke pitar tar tu du piso utmakai tano sur anunu, o tu nat na nubual lik. Awu ut. Ikut i liliman taru sur numur in pitar tar a piso ri tano ma torom a kum tumtubunu numur. Una du bung, ra o God i uliliman tari, o Abaram katu nutunu utmakai.
6Ra o God i watungi tano lena, ‘A kum tumtubum numur tam, det in kis na usiro una usiro na tamon, ma det in papam na karabus, ma din ban laulau det a wat na mar na kilalo.
7Ikut an ukadik a taro ra det dat pas a kum tumtubum sur a pinapam na karabus. Ma numur det ra det papam na karabus det in pirso gusun a tamon ra, ma det in lotu torom iau una tamon ri.’
8O God i pam tar a kunubus tomo nam o Abaram. Ma a ukinalong ina kunubus ra, a tinotok talilis una pinindi. O Abaram i ulabo o Aisak, numur ra i sa tiwal na bung bati, o Abaram i tok talilis a pinin o Aisak. Numur o Aisak i ulabo o Jekop, ma o Jekop i ulabo a noino ma aru tumtubun dat.
9“Ma a kum tumtubun dat ra, det nuknuk laulau un o Josep, a tisindet, ra det siuru ru i sur in papam na karabus tong o Ijip. Ikut o God i kis tomo ut nami,
10ra i ulaun pasi gusun a kum maut ra i monongi. I pitar a wakak na mananos tano, ma i waruti sur o Pero, a king tagitong o Ijip, in gas nami. Ra o Pero i ukis tari sur in mugumugu una tamon Ijip, ma in mugumugu kai una rumu anun o Pero.
11“Numur a labino munurak i wanpat tong o Ijip ma o Kenan kai, ma a susut na maut i monong a taro, ma kalako utna na inangon ana kum tumtubun dat.
12Ra o Jekop i sa tasmani lena a wit kurong o Ijip, i tulu ru a kum nutnutunu, a kum tumtubun dat, tagitong o Kenan utong o Ijip a mugano inawan.
13Una manru na inawan anundet, o Josep i inanos det lena, i a tisindet. Ra o Pero kai i talapor maragom una kum tistisin o Josep.
14Numur o Josep i itula sur o tamano o Jekop, det tomo nama kum tumtubunu. Det rop a wonom mawit na noino ma limo.
15Ra o Jekop ma a kum tumtubun dat det wan ma det kis tong o Ijip. Numur det mat tong.
16A susut na kilalo numur, di los pas a sursurin det, ma di uruk det una kulam na minat, tong o Kenan una tamon Sikem. A kulam na minat ra, o Abaram i sa kul pasi tan a kum nutnutun o Amor.
17“Ra i sa milau nanan a du bung ra o God in pam sot pas anun a liliman ra i sa inanos tar o Abaram nami, a niluluk ina nundat a taro i sa ka toto bing tong o Ijip.
18Ra ara matok na king i turpasi sur in mugumugu tong o Ijip, ke talapor una pinapam anun o Josep ra i pami numugu.
19I toro tar anundat a taro, ma i ban laulau det, ra i ungongos tar det sur det in los pirso ru anundet a kum nat miso, gusun a kum rumu, ma det in madek ru det, sur det in mat.
20“Una kilalo ra, di usus o Moses uni. Ma i ara wakak na nat sakit umatan o God, ra di ugu i a tulu kalang una rumu anun o tamano.
21Numur di los pirso ru i, ra a nutun o Pero, a ino, i los pasi, ma i ugu pasi sur o nutunulik.
22Ra di ususer o Moses una kum ngas na mananos rop anun a taro Ijip, ma i ara dekdek na musano una nun a kum wasiso ma una nun a kum pinapam.
23“Ra o Moses i sa wat na noino kilalo anunu, i nuki lena in nan ma in tama tar anun a taro Israel.
24I tama ara te Ijip i um laulau ara tagun det, i kalabor torom der ra i um doko ru a te Ijip, sur in balu ara pasander.
25O Moses i nuki lena anun a taro det in tasman lele i lena, o God i tulu ru i sur in ulaun pas det, ikut ka det tasmani.
26“A bung numur tano, i tama melet aru te Israel, ra der waim, ra i nemi sur in umalmal der, ma i watungi tander lena, ‘Aru musano, mur pasano kut. Pepetlai ra mur ban laulau etalai melet mur?’
27Ikut, i ra i um laulau a pasano, i sugut gisen ru o Moses, ma i watungi tano lena, ‘Osi ra i ubek tar ui sur un mugumugu ma un tene warkurai anumet?
28Pepetlai, u nemi sur un um doko iau, elar nama te Ijip, ra nubung u um doko tari?’
29O Moses i longoro a wasiso ri, ra i kalabor eno utong o Midian. Una nun a kinkinis na usiro tong iai, i ulabo aru nutnutunu, aru musano.
30“Ra i sa wat na noino kilalo uni tiro iai, ara ensel i wanpat toromi epotor una kunabor unin nanai, una nubual kalako taro uni, milau a Tangai Sainai.
31Ra o Moses i tama i, i kisin doko uni. I wan milau sur in tama wakaki, ra i longoro in nalngan a Labino i watungi lena,
32‘Iau a God anun a kum tumtubum tagun numugu, a God anun o Abaram, o Aisak ma o Jekop.’ Ra o Moses i neneder, ma i ngara sur gong i tama i.
33Ra a Labino i watungi tano lena, ‘Un palos ru aru su, uni a du piso ra u tur uni, anungi ut.
34A sa tama a kum ngunungut ra i monong anung a taro ra det kis tong o Ijip, ma a sa longoro anundet a tinangis. Iri a sa wan pirso, sur an ulangolango pas det. Wan urin, sur an tulu melet ru ui utong o Ijip.’
35“Numugu a taro Israel det ban lulu ru o Moses nama wasiso lenri, ‘Osi ra i ubek tar ui sur un mugumugu ma un tene warkurai anumet?’ Ikut, i ut ra, o God i tulu ru i sur in mugumugu ma in ulangolango pas a taro. I tulu ru i nama wasiso anun a ensel ra i wanpat toromi unin nanai ra i kunabor.
36Ra o Moses i mugu pirso pas det tagitong o Ijip, i pam a kum utna na ukisin ma a kum ukinalong tong o Ijip ma tong una Merek na Tasi, ma tiro kai una nubual kalako taro uni, i elar nama wat na noino kilalo.
37O Moses ut i watung tari tan a taro Israel lena, ‘O God in tulu ru tu poropet elar nam iau tagun a kum tumtubu mot ut.’
38O Moses i kis tomo nama kum tumtubun dat tagun numugu, a taro Israel, una nubual kalako taro uni. Ra a ensel i wasiso toromi una Tangai Sainai. O Moses i los pas a wasiso na nilaun, ma i tumus ukai tari sur anundat uniri.
39“Ikut a kum tumtubun dat tagun numugu ka det nem na longoro o Moses. Det rosumur gusuni, ma det nuknuk melet utong o Ijip.
40Ra det watungi tan o Aron lena, ‘Un pam pas anundat lako kum god sur det in mugu dat, uni o Moses, ra i mugu pirso pas dat tagitong o Ijip, ka dat tasmani mo ra asau kura i sa wanpat uni.’
41Una du bung ra, det pam pas a nat na bulumakau nama gol, ma det gas una pinapam na lamandet ra det etabor toromi.
42Ikut o God i rosumur gusun det, ma i madek ru det sur det in lotu torom a kum nangnang, elar nami ra di sa tumus tari una buk anun a kum poropet lena, ‘Mot a taro Israel, una wat na noino kilalo ra mot kis una nubual kalako taro uni, ka mot etabor torom iau, ma ka mot um doko tu wewegua sur mot in etabor nami torom iau.
43Mot ser los a rumu na lotu anun a torotoro na god Molek, ma a malalar in in nangnang anun o Repan, anumot a torotoro na god. A kum torotoro na god ri mot pam pas det, sur mot in lotu torom det. I mo ra an rakon ru mot’ ma mot in nan lakai ru o Babilon ma utong sakit.
44“A kum tumtubun dat tagun numugu det los nanan a rumu na sel una nubual kalako taro uni. A rumu na sel ra, i upuaso i lena o God i kis tomo nam det. Ra di sa pam tari murmur a wasiso anun o God torom o Moses, elar nama malalar ra i tama tari.
45Ma a kum tumtubun dat tagun numugu det pitari torom a kum nutnutun det. Ra det bulung det los nanani ra o Josua i mugu det, sur det in los a kum tamon gusun a taro tagun a kum gapman ra o God i lu ru det. Ra i kis tiro iai, tuk una kilalo anun o Dewid,
46i ra o God i nem doko i. Ra o Dewid i saring o God sur in mulaot sur in pam tu rumu, sur a taro det in lotu uni, torom o God, i ra o God anun o Jekop.
47A rumu ra, o Solomon i pami.
48Ikut o God a Labino Sakit ke kis una kum rumu ra a taro det pami, elar nami ra a poropet i watungi lena,
49‘A Labino i watungi lena: A langit, i anung a kiskis na king, ma a rakrakon bual, a utna ra a ubek aru kiking netes uni. Pepetlai, i topas mot sur mot in pam tu rumu anung? Awai i anung a nubual na mana?
50Pepetlai, awu sur iau, a pam a kum utna rop ri?’”
51Ra o Stiwen i watungi tan a taro na kiwung lena, “Mot a kum tene pitarngat mot, a balamot i bakbak gusun o God ma a talngamot i kutkut. Mot turbat liklik a Tokodos na Nion, elar nama kum tumtubu mot tagun numugu det ser pami.
52A kum tumtubu mot tagun numugu det ban laulau a kum poropet rop. Det um doko det ra det wasiso mugu una inawan pat urin anun a Tene Tokodos, i ra uniri mot usobor tari, ma mot um doko ru i.
53Mot ra mot sa los ukai a Warkurai anun o God, ra a kum ensel det pitar tari torom mot, ikut ka mot muri.”
54Ra a taro na kiwung det longoro a kum wasiso anun o Stiwen, det kankan doko, ma det karot bum toromi.
55O Stiwen i bukus nama Tokodos na Nion, ma i tatado usapat una langit, ra i tama a minamar anun o God, ma o Iesu kai, kura i tur taru una papor sot na laman o God.
56Ra i watungi lena, “Tama i! A tama a langit i papos, ma a Nutun a Musano kura i tur taru una papor sot na laman o God.”
57Ra det bari nama labino walngandet, det song bat a kum taltalngan det, ma det kalabor bat pasi.

Read Aposel 7Aposel 7
Compare Aposel 7:5-57Aposel 7:5-57