5थेनीगदेसे क्रिङ्बान, “चुसे यहूदिया अञ्चलदेन गालील अञ्चलहेन्से चुधोनाला म्हिगदेदा ह्राङला ताम लोप्सी न्होङ्ना लबा मुला” भिसी भिजी।
6जमाहेन्से पिलातससे “चु म्हि गालीलला हिन्ना?” भिसी ङ्योइजी।
7येशू हेरोदसे शासन लबा अञ्चलला चीम भिसी था याङ्माहेन्से पिलातससे येशूदा हेरोद मुबा ग्लारी पुइजी। थे धुइरी हेरोद यरूशलेमरी मुबा।
8येशूदा म्राङ्माहेन्से हेरोद ल्हानान ताङ्जी। तिग्दा भिसम थेसे येशूला बारेरी थेःबासे लमा ल्हानान धिनहेन्से येशूदा च्याबा सेम लमुबा। ओच्छे थेसे येशूसे लबा तिगै उदेकला गे च्याम्याङ्ला भिसी आश लबा मुबा।
9थेतबासेलमा थेसे येशूदा ल्हानान ताम ङ्योइजी तर येशूसे तिगै जोहाब आपिन्नी।
10ओच्छे परमेश्वरला मन्दिररी पूजा लबा मुल म्हिगदेदेन यहूदी धर्मगुरुगदे क्रिङ्बान येशूदा दोष लबारी छ्याइजी।
11जमाहेन्से हेरोददेन थेला सिपाहीगदेसे येशूदा खिसी लबान बेइज्जत लजी। ओच्छे येशूदा ग्लेसे क्वान्बा ह्रङ्बा क्वान क्वान्सी पिन्सी पिलातस मुबा ग्लारी दोःसी पुइजी।
12ङाच्छा हेरोददेन पिलातस आढिक्बा मुबा। तर थे धिनकुनुहेन्से थेन्नी ढिक्जी।