ܡܙܡܘܪ̈ܐ 75:1-10

¹ܫܲܟܘܼܪܹܐ ܝܘܲܚ ܐܸܠܘܼܟ݂، ܝܵܐ ܐܲܠܵܗܵܐ، ܫܲܟܘܼܪܹܐ ܝܘܲܚ ܘܩܘܼܪܒܵܐ ܝܠܹܗ ܫܸܡܘܼܟ݂، ܕܘܼܡܵܪ̈ܘܼܟ݂ ܗܘܼܩܹܐ ܠܗܘܿܢ ܐܵܗܵܐ.

²”ܐܝܼܡܲܢ ܕܪܵܫܡܹܢ ܥܕܵܢܵܐ، ܒܬܪܘܼܨܘܼܬܵ‌ܐ ܒܸܬ ܕܵܝܢܹܢ ܐܵܢܵܐ.

³”ܦܫܝܼܪܹܐ ܝܢܵܐ ܐܲܪܥܵܐ ܘܟܠܵܝܗ‌ܝ ܥܵܡܪ̈ܵܢܘܼܗ̇، ܐܵܢܵܐ ܡܘܼܩܘܹܐ ܠܝܼ ܣܛܘܼܢܘܼ̈ܗ̇. ܣܹܠܵܗ

⁴”ܐܡܝܼܪܝܼ ܠܚܵܬܪ̈ܵܢܹܐ: ’ܠܵܐ ܚܵܬܪܝܼܬܘܿܢ،‘ ܘܠܪ̈ܲܫܝܼܥܹܐ: ’ܠܵܐ ܡܲܪܡܝܼܬܘܿܢ ܪܹܝܫܵܐ.

⁵’ܠܵܐ ܡܲܪܡܝܼܬܘܿܢ ܠܡܪܵܘܡܵܐ ܪܹܝܫܵܘܟ݂ܘܿܢ، ܐܵܦܠܵܐ ܗܲܡܙܸܡܝܼܬܘܿܢ ܒܩܕܵܠܵܐ ܪܵܡܵܐ.‘“

⁶ܣܵܒܵܒ ܠܵܐ ܡ̣ܢ ܡܲܕܢܚܵܐ ܘܠܵܐ ܡ̣ܢ ܡܲܥܪܒ݂ܵܐ، ܘܠܵܐ ܡ̣ܢ ܒܲܪܝܼܵܐ ܟܹܐ ܐܵܬܝܵܐ ܪܵܡܘܼܬܵ‌ܐ.

⁷ܐܸܠܵܐ ܐܲܠܵܗܵܐ ܝܠܹܗ ܕܲܝܵܢܵܐ، ܠܐܵܗܵܐ ܟܹܐ ܡܲܟܸܦ ܘܠܐܵܗܵܐ ܟܹܐ ܡܲܪܸܡ.

⁸ܣܵܒܵܒ ܟܵܣܵܐ ܒܐܝܼܕܵܐ ܕܡܵܪܝܵܐ ܝܠܹܗ، ܘܚܲܡܪܵܐ ܡܸܛܝܵܐ ܝܠܹܗ، ܡܸܠܝܵܐ ܝܠܹܗ ܡܙܵܓ݂ܵܐ ܘܡܸܢܹܗ ܟܹܐ ܕܵܪܹܐ، ܫܲܪܝܼܪܵܐܝܼܬ، ܒܸܬ ܫܵܬ‌ܝܼ ܡܸܢܹܗ، ܘܕܘܼܪܕܹܗ ܒܸܬ ܠܵܡܨܝܼ ܟܠܵܝܗ‌ܝ ܪ̈ܲܫܝܼܥܹܐ ܕܐܲܪܥܵܐ.

⁹ܐܝܼܢܵܐ ܐܵܢܵܐ ܒܸܬ ܡܲܕܥܸܢ ܐܵܗܵܐ ܠܥܵܠܲܡ، ܒܸܬ ܙܵܡܪܹܢ ܠܐܲܠܵܗܵܐ ܕܝܲܥܩܘܿܒ݂، ܕܐܵܡܹܪ:

¹⁰”ܒܸܬ ܫܵܡܛܹܢ ܟܠܹܗ ܚܲܝܠܵܐ ܕܪ̈ܲܫܝܼܥܹܐ، ܒܸܬ ܦܵܝܫܝܼ ܡܘܼܪܡܹܐ ܪܹ̈ܝܫܹܐ ܕܙܲܕܝܼܩܹ̈ܐ.“